ຊາລ້າ ເໝົາ 3 ປະຕູ ຊ່ວຍ ລີເວີພູລ ຊະນະ ນ້ອງໃຫມ່! ພຣີເມ່ຍລີກ 2020-21 ນັດທຳອິດ

ຊາລ້າ ເໝົາ 3 ປະຕູ ຊ່ວຍ ລີເວີພູລ ຊະນະ ນ້ອງໃຫມ່! ພຣີເມ່ຍລີກ 2020-21 ນັດທຳອິດ

September 13, 2020 0 By admin

ການແຂ່ງຂັນເຕະບານ ພຣີເມ່ຍລີກ ອັງກິດ ນັດທຳອິດ ລະດູການ 2020-21 ຄືນວັນທີ 12 ກັນຍາຜ່ານມາ, ຫົງແດງ ລີເວີພູລ ແຊ້ມເກົ່າ ເປີດບ້ານແອນຟິວ ຕ້ອນຮັບນ້ອງໃຫມ່ ນົກຍູງທອງ ລີດ ຢູໄນເຕັດ ທີ່ກັບຄືນສູ່ລີກສູງສຸດອີກຄັ້ງໃນຮອບ 16 ປີ. ທັງສອງສູ້ກັນໄດ້ຢ່າງມ່ວນມັນ ໂດຍສະເພາະນ້ອງໃຫມ່ໃຕເກີນຮ້ອຍ ທຸ້ມສຸດໂຕເພື່ອໄດ້ຜົນງານທີ່ດີກັບບ້ານ.

ແຊ້ມເກົ່າ ນຳກ່ອນຈາກການສັງຫານຈຸດໂທດຂອງ ໂມຮາເໝັດ ຊາລ້າ ພຽງ 4′ ນາທີ, ແຕ່ທີມຢາມທວງຄືນໃນນາທີ 12′ ຈາກ: ແຈັກ ຮາຣີສັນ, ຫົງແດງ ນຳຄັ້ງທີສອງຈາກ: ເວີຈິວ ຟານໄດ໋ ນາທີ 20′ ທີມຢາມກໍໄລ່ຕີສະເໝີຄືນນາທີ 30′ ຈາກ: ແພັດທຣິກ ແບມຟ໋ອດ ເຈົ້າບ້ານນຳຄັ້ງທີສາມຈາກ: ໂມຮາເໝັດ ຊາລ້າ ນາທີ 33′ ແລະ ຈົບຕັ້ງທີໜຶ່ງ ແຊ້ມພຣີເມ່ຍລີກ ນຳແຊ້ມເດີແຊ້ມປ້ຽນຊິບ 3-2.

ມາເຄິ່ງຫລັງ ລີດ ຢູໄນເຕັດ ໄລ່ຕີສະເໝີຄັ້ງທີສາມຈາກ: ມາເຕອຸສ ຄລິກ ນາທີ 66′ ທ້າຍເກມແຊ້ມເກົ່າບຸກໜັກກວ່າເກົ່າຫວັງເອົາປະຕູໄຊໃຫ້ໄດ້ ແລະ ມາໄດ້ຈຸດໂທດຈາກຈັງຫວະ ໂຣດີຣໂກ້ ໂມເຣໂນ້ ກອງໜ້າໃຫມ່ຊາວແອັສປາຍ ທີ່ຍ້າຍມາຈາກ ບາເລັນເຊຍ ລາຄາແພງສຸດຂອງສະໂມສອນ 30 ລ້ານປອນ ລົງມາເປັນຕົວສຳຮອງສະກັດ ຟາບິນໂຢ້ ໃນເຂດໂທດ ແລະ ເປັນ ໂມຮາເໝັດ ຊາລ້າ ຮັບໜ້າທີ່ສັງຫານ ນາທີ 88′ ເປັນປະຕູໄຊໃຫ້ ລີເວີພູລ ແຊ້ມເກົ່າ ຊະນະ ນ້ອງໃຫມ່ ລີດ ຢູໄນເຕັດ ແບບວຸດວິດ 4-3.

+ ໂມຮາເໝັດ ຊາລ້າ ກາຍເປັນນັກເຕະ ລີເວີພູລ ຄົນທຳອິດໃນຮອບ ປີ ສາມາດຍິງແຮັດທຣິກ ນັດເປີດສະໜາມ ລີກສູງສຸດ ຕໍ່ຈາກ John Aldridge ລະດູການ 1988–89. ພ້ອມກັນນີ້ ໂມ ຊາລ້າ ຍັງເປັນນັກເຕະຄົນທຳອິດຂອງ ລີເວີພູລ ສາມາດຍິງປະຕູໃນນັດເປີດລະດູການ 4 ຄັ້ງຕິດຕໍ່ກັນ, ລວມທັງ ເປັນນັກເຕະຄົນ 2 ຂອງພຣີເມ່ຍລີກ ທີ່ເຮັດໄດ້ແບບນີ້ ຕໍ່ຈາກ Teddy Sheringham ລະດູການ 1992-93-1995-96.

+ ລີເວີພູລ ບໍ່ເສຍໃນບ້ານ 60 ນັດຕິດຕໍ່ກັນ ໃນນີ້ ຊະນະ 49 ສະເໝີ 11 ເປັນສະຖິຕິດີສຸດອັນດັບ 3 ໃນອັງກິດ ຮອງຈາກ ເຊວຊີ 86 ນັດ ໃນປີ 2008 ແລະ ສະຖິຕິເກົ່າຂອງຕົນເອງທີ່ສ້າງໄວ້ 63 ນັດໃນປີ 1980.

ນັດຕໍ່ໄປ ລີເວີພູລ ຈະໄປຢາມ ເຊວຊີ ໃນວັນທີ 20 ກັນຍານີ້ ຂະນະທີ່ ລີດ ຢູໄນເຕັດ ຈະລົງຫລິ້ນເກມ ລີກຄັບ ຮອບ 2 ພົບກັບ ເຮົ່າ ຊິຕີ້ ໃນວັນທີ 16 ກັນຍານີ້.

ໄຮໄລ້ການແຂ່ງຂັນຕາມລິ້ງລຸ່ມນີ້:

Photo: Liverpool FC