ບໍລິສັດ ກຸນຈະເລີນ ໄຊສົມບູນ ຈະເຂົ້າສຶກສາຄວາມເປັນໄປໄດ້ໃນການລົງທຶນ ປູກຂີງດໍາ, ພິກໄທ, ໝາກເຜັດ ແລະ ປູກພຶດຜັກຕ່າງໆ ຢູ່ເມືອງອະນຸວົງ

ບໍລິສັດ ກຸນຈະເລີນ ໄຊສົມບູນ ຈະເຂົ້າສຶກສາຄວາມເປັນໄປໄດ້ໃນການລົງທຶນ ປູກຂີງດໍາ, ພິກໄທ, ໝາກເຜັດ ແລະ ປູກພຶດຜັກຕ່າງໆ ຢູ່ເມືອງອະນຸວົງ

September 13, 2020 0 By admin

ພິທີ ເຊັນບົດບັນທຶກຄວາມເຂົ້າໃຈ ( MOU ) ເພື່ອສຶກສາ-ສໍາຫລວດ ຄວາມເປັນໄປໄດ້ ທາງດ້ານເສດຖະກິດ-ເຕັກນິກ ໂຄງການປູຂີງດໍາ, ພິກໄທ, ໝາກເຜັດ ແລະ ປູກພຶດຜັກຕ່າງໆ ຢູ່ເຂດບ້ານທົ່ງຄູນ (ບ້ານພູແຮ່ເກົ່າ) ເມືອງອະນຸວົງ, ແຂວງໄຊສົມບູນ ລະຫວ່າງ ອົງການປົກຄອງແຂວງໄຊສົມບູນ ເຊິ່ງຕາງໜ້າເຊັນໂດຍພະແນກແຜນການ ແລະ ການລົງທຶນແຂວງ ກັບ ບໍລິສັດ ກຸນຈະເລີນ ໄຊສົມບູນ ຈໍາກັດ ໄດ້ຈັດຂຶ້ນໃນຕອນບ່າຍຂອງວັນທີ 11 ກັນຍາ ນີ້ ທີ່ສະໂມສອນກອງບັນຊາການທະຫານແຂວງ

ໂດຍການເຂົ້າຮ່ວມເປັນສັກຂີພິຍານຂອງທ່ານ ພົຕ ຄໍາລຽງ ອຸທະໄກສອນ, ເຈົ້າແຂວງໄຊສົມບູນ, ມີປະທານສະພາປະຊາຊົນແຂວງ, ບັນດາຮອງເຈົ້າແຂວງ, ການນໍາເມືອງອະນຸວົງ, ປະທານ ບໍລິສັດ ກຸນຈະເລີນ ໄຊສົມບູນ ຈໍາກັດ ພ້ອມດ້ວຍຫົວໜ້າພະແນກ-ຮອງພະແນກການ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ໃນພິທີ ທ່ານ ບຸນລິດ ສຸພັດດີ, ຮອງຫົວໜ້າພະແນກແຜນການ ແລະ ການລົງທຶນ ແຂວງ ໄດ້ຂຶ້ນລາຍງານກ່ຽວກັບຂໍ້ມູນພື້ນຖານຂອງໂຄງການ ແລະ ເນື້ອໃນຂອງບົດບັນທຶກ ທີ່ຈະໄດ້ລົງນາມກັນ ຊຶ່ງໂຄງການດັ່ງກ່າວແມ່ນໂຄງການສຶກສາ-ສໍາຫລວດ ຄວາມເປັນໄປໄດ້ ທາງດ້ານເສດຖະກິດ-ເຕັກນິກ ໂຄງການປູຂີງດໍາ, ພິກໄທ, ໝາກເຜັດ ແລະ ປູກພຶດຜັກຕ່າງໆ ຢູ່ເຂດບ້ານທົ່ງຄູນ (ບ້ານພູແຮ່ເກົ່າ) ເມືອງອະນຸວົງ, ແຂວງໄຊສົມບູນ ໃນເນື້ອທີ່ 236 ເຮັກຕ້າ ຂອງບໍລິສັດ ກຸນຈະເລີນ ຈໍາກັດ ເປັນບໍລິສັດເອກະຊົນພາຍໃນ ເຊິ່ງເປັນບໍລິສັດລູກ ໃນກຸ່ມຂອງບໍລິສັດ ທີເຮັດບີ ກຣຸບ ຈໍາກັດ ເຊິ່ງໄລຍະເວລາຂອງບົດບັນທຶກຄວາມເຂົ້າໃຈສະບັບນີ້ ແມ່ນ 18 ເດືອນ

ໃນນັ້ນ ໜ້າວຽກໂຄງການຂອງບໍລິສັດທີ່ຈະຕ້ອງໄດ້ຈັດຕັ້ງປະຕິບັດ ຄື: ສຶກສາ-ສໍາຫລວດ, ສ້າງບົດວິພາກເສດຖະກິດ-ເຕັກນິກ ແລະ ບົດສຶກສາຜົນກະທົບ ຕໍ່ສິ່ງແວດລ້ອມ-ສັງຄົມ ແລະ ທໍາມະຊາດເບື້ອງຕົ້ນ ແລະ ໃນການປະຕິບັດພັນທະແມ່ນທາງບໍລິສັດຕ້ອງປະກອບສ່ວນພັນທະຕ່າງໆ ໃນໄລຍະຈັດຕັ້ງປະຕິບັດອາຍຸຂອງບົດບັນທຶກຄວາມເຂົ້າໃຈ ເປັນຕົ້ນ: ເງິນຕິດຕາມ ແລະ ຄຸ້ມຄອງ, ເງິນຕິດຕາມທາງດ້ານວິຊາການ ແລະ ຕ້ອງປະກອບສ່ວນເງິນໃນການຕິດຕາມກວດກາສິ່ງແວດລ້ອມ-ສັງຄົມ ແລະ ທໍາມະຊາດ ຕາມແຜນຄຸ້ມຄອງ, ຕິດຕາມກວດກາ.

ໂອກາດດັ່ງກ່າວ ທ່ານ ພົຕ ຄໍາລຽງ ອຸທະໄກສອນ, ເຈົ້າແຂວງໄຊສົມບູນ ໄດ້ມີຄໍາເຫັນໂອລົມຕໍ່ພິທີ ຊຶ່ງທ່ານໄດ້ຍົກໃຫ້ເຫັນເຖິງຄວາມໝາຍ-ຄວາມສໍາຄັນ ໃນການສ້າງສາພັດທະນາແຂວງໄຊສົມບູນ ພ້ອມນີ້ ທ່ານຍັງໄດ້ສະແດງຄວາມຍ້ອງຍໍຊົມເຊີຍ ຕໍ່ບໍລິສັດ ທີ່ໄດ້ປະກອບສ່ວນທຶນຮອນ ໃນການພັດທະນາແຂວງຂອງພວກເຮົາ ກໍຄືໂຄງການສຶກສາ-ສໍາຫລວດ ຄວາມເປັນໄປໄດ້ ທາງດ້ານເສດຖະກິດ-ເຕັກນິກ ໂຄງການປູຂີງດໍາ, ພິກໄທ, ໝາກເຜັດ ແລະ ປູກພຶດຜັກຕ່າງໆ ໃນຄັ້ງນີ້ ຊຶ່ງຈະເປັນການປະກອບສ່ວນທີ່ສໍາຄັນ ເຂົ້າໃນການພັດທະນາເສດຖະກິດ-ສັງຄົມ ຂອງແຂວງ ກໍຄືການສ້າງວຽກເຮັດງານທໍາໃຫ້ແກ່ປະຊາຊົນ.

ຈາກນັ້ນ ທັງສອງຝ່າຍກໍໄດ້ລົງນາມເຊັນບົດບັນທຶກຮ່ວມກັນ ລະຫວ່າງ ອົງການປົກຄອງແຂວງໄຊສົມບູນ ຊຶ່ງຕາງໜ້າໂດຍ ທ່ານ ຈັນທະໜອມ ວົງສົມຈິດ, ຫົວໜ້າພະແນກແຜນການ ແລະ ການລົງທຶນ ແຂວງ ກັບ ທ່ານ ສີສະໝຸດ ເກສອນ, ຮອງຜູ້ອໍານວຍການບໍລິສັດ ກຸນຈະເລີນ ຈໍາກັດ ໂດຍຊ້ອງໜ້າ ການນໍາແຂວງ ແລະ ພະຍານທັງສອງຝ່າຍ ເປັນສັກຂີພິຍານ.

ພາບ-ຂ່າວ: ສຸກສັນ ອ້ວນລິທິກຸນ