ໂດມີນິກ ທິ່ມ ສ້າງປະຫວັດສາດເປັນຊາວ ອັອສເຕຣຍ ຄົນທຳອິດ ເຂົ້າຊິງເທັນນິສ US Open 2020

ໂດມີນິກ ທິ່ມ ສ້າງປະຫວັດສາດເປັນຊາວ ອັອສເຕຣຍ ຄົນທຳອິດ ເຂົ້າຊິງເທັນນິສ US Open 2020

September 12, 2020 0 By admin

ການແຂ່ງຂັນເທັນນິສ ແກຣນສະແລມ ຢູເອັສ ໂອເພັນ (US Open) ປະຈຳປີ 2020 ທີ່ນິວຢ໊ອກ, ສະຫະລັດອາເມຣິກາ ໃນລະຫວ່ງວັນທີ 29 ສິງຫາ – 13 ກັນຍານີ້ ເດີນທາມາເຖິງໂຄ້ງສຸດທ້າຍ ເມື່ອສຳເລັດການແຂ່ງຂັນໃນຮອບຮອງຊະນະເລີດ ໃນວັນທີ 11 ກັນຍາຜ່ານມາ.

ປະເພດຊາຍດ່ຽວ: ໂດມີນິກ ທິ່ມ ມື 2 ຂອງລາຍການຈາກອັອສເຕຣຍ (ໂອຕຣິດ) ໄວ 27 ປີ ເອົາຊະນະ ດານິວ ເມັດເວເດຟ ມື 3 ຂອງລາຍການຈາກຣັດເຊຍ ຮອງແຊ້ມປີຜ່ານມາ 3-0 ເຊັດ: 6-2, 76(9/7), 76(7/5) ສ້າງປະຫວັດສາດກາຍເປັນນັກເທັນນິສຊາວໂອຕຣິດ (ອັອສເຕຣຍ) ຄົນທຳອິດສາມາດເຂົ້າຊິງລາຍການນີ້ ໄປລຸ້ນແຊ້ມແກຣນສະແລມລາຍການທຳອິດໃນຊີວິດ ພາຍຫລັງເຂົ້າຊິງ 3 ລາຍການກ່ອນໜ້ານີ້ເສຍທັງ 3 ຄັ້ງ (ເຟັນ ໂອເພັນ 2018, 2019 ແລະ ອັອສເຕຣລ້ຽນ ໂອເພັນ 2020).

ໂດມີນິກ ທິ່ມ ໄປຊິງກັບ ອາເລັກຊານເດີ ຊະເວເຣຟ ໄວ 23 ປີ ມື 5 ຂອງລາຍການຈາກ ເຢຍລະມັນ ທີ່ສ້າງສະຖິຕິໃຫມ່ໃນຕົນເອງ ເຂົ້າຊິງຊະເລີດລະດັບແກຣນສະແລມຄັ້ງທຳອິດ ພາຍຫລັງຊະນະ ເປົາໂບ ຄາເນໂຣ້ ບາສຕ້າ ມື 20 ຂອງລາຍການຈາກແອັສປາຍ 3-2 ເຊັດ, ເສຍກ່ອນ 2 ເຊັດທຳອິດ ແຕ່ແຊງຊະນະໃນ 3 ເຊັດຫລັງ: 3-6, 2-6, 6-3, 6-4, 6-3 ກາຍເປັນນັກເທັນນິສຊາວເຢຍລະມັນຄົນທຳອິດໃນຮອບ 26 ປີ ທີ່ເຂົ້າຊິງລາຍການນີ້ ຕໍ່ຈາກ ມິກເຊວ ສະຕິກ ໃນປີ 1994. ຮອບຊິງຈະມີຂຶ້ນໃນວັນທີ 13 ກັນຍານີ້.

ສ່ວນວັນທີ 12 ກັນຍາເປັນຄູ່ຊິງປະເພດຍິງດ່ຽວ: ນາໂອມິ ໂອຊາກະ ມື 4 ຂອງລາຍການຈາກຍີ່ປຸ່ນ ແຊ້ມປີ 2018 ພົບກັບ ວິກຕໍເຣຍ ອາຊາເຣນກ້າ ອະດີດຮອງແຊ້ມ 2 ສະໄໝຈາກເບລາຣຸສ.

Photo: US Open Tennis Championships