ວາງສີລາລຶກ ໂຄງການກໍ່ສ້າງສວນກິດຈະກຳຊາວໜຸ່ມ-ເຍົາວະຊົນແຂວງຄຳມ່ວນ

ວາງສີລາລຶກ ໂຄງການກໍ່ສ້າງສວນກິດຈະກຳຊາວໜຸ່ມ-ເຍົາວະຊົນແຂວງຄຳມ່ວນ

September 11, 2020 0 By admin

Khammouane News,ພິທີວາງສີລາລຶກໂຄງການກໍ່ສ້າງສວນກິດຈະກຳຊາວໜຸ່ມ-ເຍົາວະຊົນແຂວງຄຳມ່ວນ ໄດ້ຈັດຂຶ້ນໃນວັນທີ 10 ກັນຍາ 2020 ໂດຍມີ ທ່ານ ໂອໄດ ສຸດາພອນ ເຈົ້າແຂວງຄຳມ່ວນ, ທ່ານ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ທ່ານ ຖາວອນ ອາດສະໝຸດ ປະທານກຸ່ມບໍລິສັດລ່ອງແຈ້ງພັດທະນາຈຳກັດ ໃນນາມຜູ້ຮ່ວມພັດທະນາໂຄງການ ແລະ ພາກສ່ວນກ່ຽວຂ້ອງ ເຂົ້າຮ່ວມ.


ທ່ານ ສາຍຄຳ ພະໄຊສິດທິເດດ ເລຂາຄະນະບໍລິຫານງານຊາວໜຸ່ມ ແຂວງຄຳມ່ວນ ໄດ້ໃຫ້ຮູ້ວ່າ: ການສ້າງສວນກິດຈະກຳຊາວໜຸ່ມ-ເຍົາວະຊົນແຂວງໃນຄັ້ງນີ້ ແມ່ນຕິດພັນກັບການສ້າງຫໍມູນເຊື້ອຊາວໜຸ່ມ-ເຍົາວະຊົນ ແລະ ສູນຈຳລອງມູນເຊື້ອຂອງ ປະທານສຸພານຸວົງ ໃນເຫດການປ້ອງກັນຕົວເມືອງທ່າແຂກ 21 ມີນາ 1946 ເພື່ອໃຫ້ຊາວໜຸ່ມ-ເຍົາວະຊົນໄດ້ສຶກສາຮຽນຮູ້ເຖິງມູນເຊື້ອດັ່ງກ່າວ

ແນໃສ່ຊຸກຍູ້, ສົ່ງເສີມພອນສະຫວັນຂອງຊາວໜຸ່ມ-ເຍົາວະຊົນ ໄດ້ມີເວທີສະແດງອອກດ້ານຄວາມຮູ້, ຄວາມສາມາດຂອງເຂົາເຈົ້າ, ເປັນບ່ອນຝຶກທັກສະໃນການຮຽນ, ຫລິ້ນກິລາກາຍະກຳ ແລະ ກິດຈະກຳອື່ນໆທີ່ເປັນປະໂຫຍດ, ທັງເປັນບ່ອນເຕົ້າໂຮມຄວາມສາມັກຄີຂອງຊາວໜຸ່ມ-ເຍົາວະຊົນ ເພື່ອພັດທະນາວຽກງານຊາວໜຸ່ມ-ເຍົາວະຊົນໃນທົ່ວແຂວງ ຕິດພັນກັບການຍົກສູງບົດບາດ ການຊີ້ນຳຂອງຄະນະພັກຕໍ່ອົງການຈັດຕັ້ງຊາວໜຸ່ມ ໃນການພັດທະນາຄົນຮຸ່ນສືບທອດ ເພື່ອປະຕິບັດພາລະກິດປົກປັກຮັກສາແລະ ສ້າງສາພັດທະນາປະເທດຊາດໃນອະນາຄົດ.


ສະຖານທີ່ດັ່ງກ່າວແມ່ນຈະໄດ້ກຳນົດສິ່ງກໍ່ສ້າງເຊິ່ງປະກອບມີ: ສະໂມສອນໃນຮົ່ມ, ຫໍມູນເຊື້ອຊາວໜຸ່ມ-ເຍົາວະຊົນ, ສະລອຍນໍ້າ, ເຮືອນຝຶກຊ້ອນກິລາປ້ອງກັນຕົວ, ຫ້ອງຮຽນ IQ ຂອງເດັກ, ສູນການຮຽນຮູ້ພາສາຕ່າງປະເທດ, ສະໜາມເດັກຫລິ້ນ, ຫ້ອງວາງສະແດງ, ຫ້ອງຂາຍຜະລິດຕະພັນຊາວໜຸ່ມ-ເຍົາວະຊົນ ແລະ ສິ່ງປະກອບອື່ນໆ.


ຂ່າວ: ກອງຄຳ