ນາຍົກລັດຖະມົນຕີ ເຄື່ອນໄຫວຢ້ຽມຢາມ ໂຮງງານຜະລິດເຫລັກ VSI

ນາຍົກລັດຖະມົນຕີ ເຄື່ອນໄຫວຢ້ຽມຢາມ ໂຮງງານຜະລິດເຫລັກ VSI

September 11, 2020 0 By admin

ຂປລ. ໃນວັນທີ 11 ກັນຍາ 2020 ນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະໄດ້ລົງເຄື່ອນໄຫວຢ້ຽມຢາມໂຮງງານຜະລິດເຫລັກ VSI ຊຽງຄວນ ຢູ່ເມືອງຫາດຊາຍຟອງ ນະຄອນຫລວງວຽງຈັນ ເພື່ອຊຸກຍູ້ສົ່ງເສີມການຜະລິດ ແລະ ໃຫ້ທິດຊີ້ນຳໂດຍໄດ້ຮັບການຕ້ອນຮັບຈາກ ທ່ານ ຈັນ ກົ່ວທວນ ປະທານບໍລິສັດນະຄອນຫລວງອຸດສາຫະກຳເຫລັກ ຈຳກັດ.


ໂອກາດດັ່ງກ່າວ, ທ່ານ ສອນສະຫວັນ ສຸກດາລາ ຜູ້ອຳນວຍການ ໂຮງງານຜະລິດເຫລັກເສັ້ນ VSI ກໍໄດ້ລາຍງານໃຫ້ຊາບໂດຍຫຍໍ້ກ່ຽວກັບປະຫວັດຄວາມເປັນມາຂອງໂຮງງານ ແລະ ວິທີການຜະລິດຕ່າງໆ. ຫລັງຈາກນັ້ນ, ທ່ານ ທອງລຸນ ສີສຸລິດ ກໍໄດ້ສະແດງຄວາມຊົມເຊີຍຕໍ່ໂຮງງານ ກໍຄື ບໍລິສັດນະຄອນຫລວງອຸດສາຫະກຳເຫລັກ ຈຳກັດ ທີ່ສາມາດຍາດໄດ້ຜົນງານ ແລະ ສາມາດຜະລິດເຫລັກເສັ້ນທີ່ມີຄຸນນະພາບ ອອກມາຮັບໃຊ້ສັງຄົມ, ທັງສ້າງວຽກເຮັດງານທຳໃຫ້ປະຊາຊົນລາວ.

ພ້ອມກັນນີ້, ທ່ານ ນາຍົກ ຍັງຮຽກຮ້ອງມາຍັງບໍລິສັດ ສືບຕໍ່ຜະລິດເຫລັກເສັ້ນທີ່ມີຄຸນນະພາບ ໃຫ້ຫລາຍຂຶ້ນ ເພື່ອຕອບສະໜອງຢ່າງພຽງພໍກັບຄວາມຮຽກຮ້ອງຕ້ອງການຂອງສັງຄົມ.

ໃນວັນດຽວກັນ, ທ່ານ ທອງລຸນ ສີສຸລິດ ພ້ອມດ້ວຍຄະນະ ກໍໄດ້ໄປຢ້ຽມຢາມ ໂຮງງານໂຕກຽວຄອຍ ຜະລິດເຄື່ອງອຸປະກອນກ້ອງຖ່າຍຮູບສົ່ງອອກຕ່າງປະເທດ ໂດຍໄດ້ຮັບການຕ້ອນຮັບຈາກ ທ່ານ ທີລະວຸດ ຊູດຳ ຜູ້ອຳນວຍການໂຮງງານດັ່ງກ່າວ.

ຂ່າວ: ທະນູທອງ,ພາບ: ຂັນໄຊ