ແຕ່ງຕັ້ງທ່ານ ໂພໄຊ ໄຊຍະສອນ ເປັນເລຂາພັກແຂວງ, ຮັກສາການເຈົ້າແຂວງໆສາລະວັນ ຄົນໃໝ່ ແທນທ່ານສີສຸວັນ ວົງຈອມສີ

ແຕ່ງຕັ້ງທ່ານ ໂພໄຊ ໄຊຍະສອນ ເປັນເລຂາພັກແຂວງ, ຮັກສາການເຈົ້າແຂວງໆສາລະວັນ ຄົນໃໝ່ ແທນທ່ານສີສຸວັນ ວົງຈອມສີ

September 11, 2020 0 By admin

ໜັງສືພິມສາລະວັນ, ໃນວັນທີ 11 ກັນຍານີ້, ຢູ່ທີ່ສະໂມສອນແຂວງສາລະວັນ ໄດ້ມີພິທີມອບ-ຮັບ ໜ້າທີ່ເລຂາພັກແຂວງ ເຈົ້າແຂວງສາລະວັນ ລະຫວ່າງ ສະຫາຍ ສີສຸວັນ ວົງຈອມສີ ກຳມະການສູນກາງພັກ ອະດີດເລຂາພັກແຂວງ ເຈົ້າແຂວງໆສາລະວັນ ຜູ້ເກົ່າ ກັບ ສະຫາຍ  ໂພໄຊ ໄຊຍະສອນ ເລຂາຄະນະບໍລິຫານງານພັກແຂວງ ຮັກສາການເຈົ້າແຂວງໆສາລະວັນ ຜູ້ໃໝ່.

ໂດຍເປັນກຽດເຂົ້າຮ່ວມຂອງ ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ ແຫ່ງ ສປປ ລາວ, ມີຮອງຫົວໜ້າຄະນະຈັດຕັ້ງສູນກາງພັກ, ພາກສ່ວນທີ່ກ່ຽວຂ້ອງຂັ້ນສູນກາງ, ມີບັນດາສະຫາຍການນຳຂັ້ນແຂວງ, ການນຳພະແນກການ, ກົມກອງອ້ອມຂ້າງແຂວງ, ເຈົ້າເມືອງ 8 ຕົວເມືອງ ແລະ ພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມ.


ໂດຍປະຕິບັດຕາມມະຕິຕົກລົງຂອງກົມການເມືອງສູນກາງພັກ ວ່າດ້ວຍການອະນຸມັດໃຫ້ພະນັກງານການນຳຂັ້ນສູງ ອອກພັກການ ຮັບອຸດໜູນບຳນານ ສະບັບເລກທີ 116/ກມສພ, ລົງວັນທີ 19 ສິງຫາ 2020, ຕົກລົງໃຫ້ ສະຫາຍ ສີສຸວັນ ວົງຈອມສີ ກຳມະການສູນກາງພັກ ເລຂາພັກແຂວງ ເຈົ້າແຂວງໆສາລະວັນ ເກີດເມື່ອວັນທີ 15 ສິງຫາ 1954 ລວມອາຍຸກະສຽນ 66 ປີ, ເຂົ້າການປະຕິວັດເມື່ອວັນທີ 21 ກຸມພາ 1973 ລວມອາຍຸການ 47 ປີ ອອກພັກການ ຮັບອຸດໝູນບໍານານ.

ພ້ອມນີ້ກໍ່ໄດ້ຜ່ານມະຕິຕົກລົງຂອງກົມການເມືອງສູນກາງພັກ ສະບັບເລກທີ 117/ກມສພ, ລົງວັນທີ 19 ສິງຫາ 2020 ວ່າດ້ວຍການປະກາດແຕ່ງຕັ້ງ ສະຫາຍ ໂພໄຊ ໄຊຍະສອນ ກຳມະການສຳຮອງສູນກາງພັກ ເປັນເລຂາຄະນະບໍລິຫານງານພັກແຂວງສາລະວັນ ແລະ ດຳລັດຂອງນາຍົກລັດຖະມົນຕີ ເລກທີ 492/ນຍ ລົງວັນທີ 20 ສິງຫາ 2020 ແຕ່ງຕັ້ງ ທ່ານ ປອ ໂພໄຊ ໄຊຍະສອນ ເປັນຜູ້ຮັກສາການເຈົ້າແຂວງໆສາລະວັນ.

ເນື່ອງໃນໂອກາດດຽວກັນນັ້ນ, ສະຫາຍ ສີສຸວັນ ວົງຈອມສີ ກໍ່ໄດ້ຜ່ານບົດສະຫຼຸບໂດຍຫຍໍ້ກ່ຽວກັບການຊີ້ນຳ-ນຳພາຂອງຄະນະບໍລິຫານງານພັກແຂວງ ໃນໄລຍະຜ່ານມາ, ເຊິ່ງຄະນະພັກ-ອົງການປົກຄອງທຸກຂັ້ນໃນທົ່ວແຂວງ ໄດ້ສຸມທຸກກຳລັງກາຍ ແລະ ສິຕິປັນຍາ ເພື່ອນຳພາ, ຊີ້ນຳ, ບັນຊາ ແລະ ຈັດຕັ້ງປະຕິບັດດ້ວຍຄວາມເປັນເຈົ້າການ, ບຸກທະລຸ ແລະ ຂຸດຄົ້ນນຳໃຊ້ທຸກທ່າແຮງບົ່ມຊ້ອນຂອງທ້ອງຖິ່ນ, ສ້າງເງື່ອນໄຂ, ກາລະໂອກາດດຶງດູດຍາດແຍ່ງການຊ່ວຍເຫລືອ ແລະ ການລົງທຶນຈາກພາຍໃນ ແລະ ຕ່າງປະເທດເຂົ້າໃນການພັດທະນາແຂວງສາລະວັນ ພາຍໃຕ້ການຮ່ວມຈິດຮ່ວມໃຈ ແລະ ສາມັກຄີເອກະພາບໃນທົ່ວພັກ, ທົ່ວປວງຊົນຊາວ ແຂວງສາລະວັນໃນການຊີ້ນຳໆພາໃນໄລຍະຜ່ານມາ.

ຈາກນັ້ນ, ໃນພິທີກໍ່ໄດ້ມີການເຊັນບົດບັນທຶກມອບ-ຮັບ ໜ້າທີ່ຢ່າງເປັນທາງການ ລະຫວ່າງ ສະຫາຍ ສີສຸວັນ ວົງຈອມສີ ກັບ ສະຫາຍ ປອ ໂພໄຊ ໄຊຍະສອນ ໂດຍຊ້ອງໜ້າ ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ ແຫ່ງ ສປປ ລາວ ແລະ ຜູ້ເຂົ້າຮ່ວມໃນພິທີເປັນສັກຂິພິຍານ.


ໃນຕອນທ້າຍ, ສະຫາຍ ພັນຄຳ ວິພາວັນ ຮອງປະທານປະເທດ ແຫ່ງ ສປປ ລາວ ກໍ່ໄດ້ໂອ້ລົມ ແລະ ຊີ້ທິດເຍືອງທາງ ເພື່ອເປັນບ່ອນອີງໃຫ້ກັບຄະນະພັກ-ອົງການປົກຄອງແຂວງ ໃນການນໍາພາ ແລະ ຊີ້ນໍາວຽກງານໃນຕໍ່ໜ້າ.