ເມືອງເກົ່າສຸວັນນະໂຄມຄຳ ສະຖານທີ່ທ່ອງທ່ຽວທາງດ້ານປະຫວັດສາດທີ່ໜ້າຫຼົງໄຫຼ ໃຜໄປບໍ່ແກ້ວຢ່າລືມໄປຢາມ

ເມືອງເກົ່າສຸວັນນະໂຄມຄຳ ສະຖານທີ່ທ່ອງທ່ຽວທາງດ້ານປະຫວັດສາດທີ່ໜ້າຫຼົງໄຫຼ ໃຜໄປບໍ່ແກ້ວຢ່າລືມໄປຢາມ

September 11, 2020 0 By admin

ເມືອງເກົ່າສຸວັນນະໂຄມຄຳມີສະຖານທີ່ຕັ້ງຢູ່ເຂດ ບ້ານດອນທາດ ເມືອງຕົ້ນເຜິ້ງ ແຂວງບໍ່ແກ້ວ ເຊິ່ງ ຫ່າງຈາກເທດສະບານເມືອງຕົ້ນເຜິ້ງ ປະມານ 5 ກິໂລແມັດ, ແຕ່ຖ້າຫາກນັບຄວາມໄກຈາກເທດສະບານເມືອງຫ້ວຍຊາຍ ໄປທາງທິດຕາເວັນຕົກ ປະມານ 40 ກິໂລແມັດ ເວົ້າໄດ້ວ່າເປັນສະຖານທີ່ທ່ອງທ່ຽວສໍາຄັນອີກແຫ່ງໜຶ່ງ ທີ່ມີຄວາມສະດວກສະບາຍໃນການເດີນທາງເຂົ້າເຖິງ.


ອີງຕາມ ຕຳນານຂອງປະເທດສີລັງກາ ທ່ານ ຝຣັ່ງຊິດ ກາເຍ ໄດ້ຂຽນໄວ້ໃນປຶ້ມ “ການສຳຫຼວດແມ່ນ້ຳຂອງ” ໃນສັດຕະວັດທີ 19 ໄດ້ເວົ້າໄວ້ວ່າ: ເມືອງເກົ່າສຸວັນນະໂຄມຄຳໄດ້ປາກົດຕົວຂຶ້ນໃນສະຕະວັດ ທີ 5 ຂອງຄຣິສຕະສັງກາດ. ຄຽງຄູ່ກັນນັ້ນ,ອິງຕາມຕຳນານນ້ຳຖ້ວມໂລກ ໄດ້ເວົ້າເຖິງພະຍາສີສັດຕະນາກທີ່ເກີດເມືອງໜອງກະແສແສນຍ່ານໄດ້ນຳຈໍານວນພົນເສນາອາມາດ ແລະ ພີ່ນ້ອງ 7 ເຊື້ອໂຄດເດີນທາງລ່ອງທະລຸລົງຕາມລຳນ້ຳຂອງ ມາປະສົມປະສານກັນກັບເຊື້ອພະຍານາກຢູ່ເຂດ ເມືອງຫຼວງພະບາງ ຈົນໄດ້ກາຍເປັນນາກ 15 ຕະກຸນໃນໄລຍະຕໍ່ມາ.

ຄຽງຄູ່ກັນນັ້ນ, ໃນຕຳນານຊາວເມືອງໂພທິສານຫຼວງ (ສີໂຄດຕະບອງ ຫຼື ໂຄຕະປຸລະ) ຍັງຮູ້ອີກວ່າ ແມ່ນເຊື້ອສາຍຂອມ ເຊິ່ງເມືອງນີ້ໄດ້ມີການເຕີບໃຫຍ່ຂຶ້ນຢ່າງໄວວາພຽງແຕ່ 3 ປີ ເທົ່ານັ້ນກໍ່ມີບ້ານເຮືອນຂອງໄພ່ພົນເຖິງໜຶ່ງແສນຫຼັງ. ຕໍ່ມາເມືອງສຸວັນນະໂຄມຄຳໄດ້ມີການປະພຶດທີ່ບໍ່ຊື່ສັດຕໍ່ພໍ່ຄ້າເຊິ່ງເປັນຊາວນາກຫຼວງພະບາງ ອັນເປັນສາເຫດກໍ່ໃຫ້ເກີດຄວາມຜິດຂ້ອງຕ້ອງຖຽງກັນ; ພວກເຂົາເຈົ້າຈຶ່ງໄດ້ຍົກໄຜ່ພົນຂຶ້ນເມືອທຳລາຍເມືອງສຸວັນນະໂຄມຄຳຈົນຮາບກ້ຽງ ຈົນເຮັດໃຫ້ຊາວເມືອງແຕກຕື່ນໄປທົ່ວທຸກສາລະທິດ ເຊັ່ນ: ທິດອຸມຸງ, ສີຊັດຊະນາໄລ ແລະ ຫຼວງພະບາງເຫຼົ່ານີ້ເປັນຕົ້ນ.

ເມືອງສຸວັນນະໂຄມຄຳແຫ່ງນີ້ນັບໄດ້ວ່າໄດ້ຜ່ານຂະບວນການຖືກທຳລາຍ ແລະ ໄດ້ຮັບການຟື້ນຟູມາຫຼາຍຄັ້ງຫຼາຍຫົນພາຍໃຕ້ຊື່ຕ່າງໆ ກວ່າຈະກາຍມາເປັນສະພາບນະຄອນຮ້າງທີ່ເຫຼືອພຽງຮ່ອງຮອຍປະໄວ້ ເຊິ່ງແຂວງບໍ່ແກ້ວໄດ້ຈັດເປັນແຫຼ່ງທ່ອງທ່ຽວລະດັບແຂວງ ໂດຍອິງຕາມການສຳຫຼວດໃນເບື້ອງຕົ້ນພົບວ່າມີ 44 ບູຮານສະຖານກໍ່ສ້າງດ້ວຍອິດ ແລະ ປະທາຍອັນເປັນພຸດທະສິມມາ, ພະທາດ, ພະພຸດທະຮູບ, ນ້ຳສ້າງ ແລະ ອື່ນໆ ທີ່ຍັງຄົງຫຼົງເຫຼືອຈາກໂຈນປຸ້ນສົມບັດ ທັງໄທ ແລະ ລາວ.

ແຕ່ສິ່ງທີ່ຊົງຄວາມງົດງາມສະຫງ່າຕະການໃນສະໄໝກ່ອນນັ້ນໄດ້ແກ່ພະພຸດທະອົງປາງສະມາທິ ເປັນພະພຸດທະຮູບອົງໃຫຍ່ທີ່ມີໜ້າຕັກກ້ວາງ 7,10 ແມັດ, ສູງ 7,22 ແມັດ (ບໍ່ນັບຍອດເກດ), ບ່າແຕ່ລະຂ້າງ 1,10 ແມັດ, ດ້ານຂ້າງແຕ່ກະໂພກຫາເຂົ່າ 3,60 ແມັດ ເຊິ່ງນັບວ່າເປັນພະພຸດທະຮູບອົງໜຶ່ງທີ່ໃຫຍ່ທີ່ສຸດໃນປະເທດລາວ ແລະ ໃນຍ່ານອາຊີອາຄະເນ.

ນອກນັ້ນ, ກໍ່ຍັງມີປູສະນີຍະສະຖານທີ່ຍັງຄົງຫຼົງເຫຼືອຢູ່ຈຳນວນໜຶ່ງ ເຊິ່ງສັນນິຖານໄດ້ວ່າ: ແມ່ນມາຈາກຍຸກຂອງນະຄອນຊຽງແສນເປັນສ່ວນໃຫຍ່ ເປັນຕົ້ນແມ່ນໃນສະໄໝເຈົ້າໄຊຍະເສດຖາທິຣາດ ໂດຍພະອົງໄດ້ໃຫ້ການສະຖາປະນາ, ບູລະນະໃຫ້ເປັນນະຄອນທີ່ສວຍສົດງົດງາມລຽບສອງຝັ່ງແມ່ນ້ຳຂອງ ແລະ ຕໍ່ມາກໍ່ໄດ້ຖືກພັງທະລາຍລົງໂດຍການຮຸກຮານຂອງກອງທັບພະມ້າ ທີ່ຍັງຫຼົງເຫຼືອໄວ້ພຽງແຕ່ຮ່ອງຮອຍປະຫວັດສາດ, ທັງເປັນສະຖານທີ່ອະນຸລັກ ແລະຫວງຫ້າມ, ເປັນອຸທິຍານບ່ອນສຶກສາຫາຄວາມຮູ້, ບ່ອນທ່ອງທ່ຽວແລະພັກຜ່ອນຍ່ອນອາລົມຂອງນັກຄົ້ນຄວ້າ, ນັກສຶກສາ, ນັກນິຍົມຂອງເກົ່າ ແລະສະຫງວນວັດທະນາທຳທີ່ຫຼາກຫຼາຍກໍ່ຄືທຳມະຊາດທີ່ສ່ວຍງາມປອດໂປ່ງໃຫ້ແກ່ຄົນຮຸ່ນຫຼັງໄດ້ຮຽນຮູ້ຕໍ່ໄປ.

ບົດຂ່າວ: ແຫຼ່ງທ່ອງທ່ຽວທາງດ້ານປະຫວັດສາດເມືອງເກົ່າສຸວັນນະໂຄມຄຳ, ຄັດຈາກ: ປຶ້ມແຫຼ່ງທ່ອງທ່ຽວແຂວງບໍ່ແກ້ວ, ໂດຍ: ບຸນເພັດ ໄຊຍະວົງ