ແຂວງຈຳປາສັກ ປະກາດເປັນແຂວງຈົບຊັ້ນມັດທະຍົມຕອນຕົ້ນບຳລຸງຢ່າງເປັນທາງການ

ແຂວງຈຳປາສັກ ປະກາດເປັນແຂວງຈົບຊັ້ນມັດທະຍົມຕອນຕົ້ນບຳລຸງຢ່າງເປັນທາງການ

September 10, 2020 0 By admin

ແຂວງຈຳປາສັກປະກາດເປັນແຂວງຈົບຊັ້ນມັດທະຍົມຕອນຕົ້ນບຳລຸງຢ່າງເປັນທາງການໃນຕອນເຊົ້າວັນທີ 9 ກັນຍາ 2020 ນີ້ຢູ່ທີ່ສະໂມສອນຫຼັກ 4 ໂດຍໃຫ້ກຽດເຂົ້າຮ່ວມ ຂອງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕິກະຊວງສຶກສາທິການ ແລະກິລາ,ທ່ານ ປອ ວິໄລວົງ ບຸດດາຄຳ ເຈົ້າແຂວງໆຈຳປາສັກ, ມີທ່ານການນໍາກະຊວງ,ບັນດາແຂວງພາກໃຕ້,ພະແນກການອ້ອມຂ້າງແຂວງ,ນະຄອນ,ເມືອງ,ພະນັກງານຄູອາຈານເຂົ້າຮ່ວມຢ່າງຫຼວງຫຼາຍ.


ໃນພິທີອັນສະຫງ່າລາສີ ທ່ານ ປອ ວິໄລວົງ ບຸດດາຄຳ ເຈົ້າແຂວງໆຈຳປາສັກໄດ້ກວ່າໄຂພີທີປະກາດແຂວງຈຳປາສັກເປັນແຂວງຈົບຊັ້ນມັດທະຍົມຕອນຕົ້ນບຳລຸງໂດຍມີເນື້ອໃນວ່າ:ໂດຍສືບຕໍ່ປະຕິບັດແນວທາງນະໂຍບາຍຂອງພັກແລະລັດຖະບານກໍຄືຍຸດທະຍາດພັດທະນາການສືກສາແລະກິລາທີ່ກະຊວງສຶກສາທີການແລະກິລາວາງອອກໂດຍສະເພາະແມ່ນການປະຕິບັດຄຳສັ່ງຂອງນາຍຍົກລັດຖະມົນຕິເລກທີ 06 /ນຍ ລົງວັນທີ 8 ສິງຫາ1992 ວ່າດ້ວຍການສືບຕໍ່ແກ້ໄຂບັນຫາການລົບລ້າງຄວາມບໍ່ຮູ້ໜັງສືຄືນໃໜ່.ເພື່ອຈັດຕັ້ງປະຕິບັດຜັນຂະຫຍາຍຄຳສັ່ງດັ່ງກ່າວກະຊວງສຶກສາທີການ ແລະກິລາໄດ້ປະສານສົມທົບກັບອົງການປົກຄອງທ້ອງຖິ່ນ ແລະຜູ້ບໍລິຫານການສຶກສາ ແລະກິລາແຕ່ລະຂັ້ນເປີດຂະບວນການຮຽນການສອນໃຫ້ແກ່ປະຊາຊົນບໍ່ຮູ້ໜັງສືໃນເກນອາຍຸ 15 – 45 ປີ ຢ່າງກວ້າງຂວາງໃນທົ່ວປະເທດ ແລະດ້ວຍຄວາມມຸ້ງໜັ້ນດັ່ງກ່າວຈິ່ງເຮັດໃຫ້ພຝມີຜົນສຳເລັດເປັນກ້າວໆມາ.


ສະເພາະແຂວງຈຳປາສັກຂອງພວກເຮົາໄດ້ປະກາດລົບລ້າງຄວາມບໍ່ຮູ້ໜັງສືສຳລັບປະຊາຊົນທົ່ວແຂວງຢ່າງເປັນທາງການໃນປີ1983 ແລະ ສືບຕໍ່ດຳເນີນການຮຽນ-ການສອນບຳລຸງໃນຊັ້ນປະຖົມສຶກສາໃຫ້ແກ່ປະຊາຊົນຢ່າງຕໍ່ເນື່ອງມາຮອດວັນທີ 3 ມີຖຸນາ 2011ສາມາດປະກາດແຂວງຈຳປາສັກເປັນແຂວງຈົບຊັ້ນປະຖົມສຶກສ່ບຳລຸງທົ່ວແຂວງ.


ພາຍຫຼັງທີ່ໄດ້ສຳເລັດການສຶກສາຈົບຊັ້ນປະຖົມບຳລຸງກໍໄດ້ສຶບຕໍ່ຍົກລະດັບການສຶກສາໃນຊັ້ນມັດທະຍົມຕົ້ນໃຫ້ແກ່ປະຊາຊົນໃນເກນອາຍຸ15-35 ປີຢ່າງເປັນລະບົບຕໍ່ເນື່ອງດ້ວຍການມອບໜາຍຄວາມຮັບຜິດຊອບໃຫ້ເມືອງ,ນະຄອນໄດ້ດຳເນີນການຈັດຕັ້ງການຮຽນ-ການສອນຕົວຈິງມາຮອດປີ 2019 ຈີງໄດ້ປະກາດ 9 ຕົວເມືອງ ແລະ1ນະຄອນ ຈົບຊັ້ນມັດທິຍົມຕອນຕົ້ນບຳລຸງສຳລັບປະຊາຊົນ.ເພື່ອເປັນການຢັ້ງຢື້ນຮັບຮອງແຂວງຈຳປາສັກຈົບຊັ້ນມັດທະຍົມຕອນຕົ້ນບຳລຸງສຳລັບປະຊາຊົນ,ຄະນະກຳມະການຂັ້ນແຂວງໄດ້ສະເໜີກະຊວງສຶກສາທິການ ແລະກິລາລົງມາປະເມີນ ເຊິ່ງໄດ້ກຳນົດເອົາ 5 ເມືອງເປົ້າໜາຍ,ຜ່ານການປະເມີນຕົວຈິງເຫັນວ່າແຂວງຈຳປາສັກສາມາດຜ່ານຕາມເກມມາດຕະຖານສຳເລັດການຮຽນຈົບຫຼັກສູດ ຊັ້ນມັດທະຍົມຕອນຕົ້ນບຳລຸງ ມາຮອດວັນທີ 23 ມີຖຸນາ 2020 ລັດຖະມົນຕິກະຊວງສຶກສາທິການ ແລະກິລາ ຈິ່ງໄດ້ອະນຸມັດອອກຂໍຕົກລົງສະບັບເລກທີ 2218/ສສກ ອະນຸມັດຮັບຮອງແຂວງຈຳປາສັກເປັນແຂວງຈົບຊັ້ນມັດທະຍົມຕອນຕົ້ນບຳລຸງທົ່ວແຂວງ.


ໃນພິທີອັນມີຄວາມໜາຍຄວາມສຳຄັນ ແລະ ເປັນປະຫວັດສາດນີ້,ບໍ່ພຽງແຕ່ເປັນການປະກາດຈົບຊັ້ນມັດທະຍົມສຶກສາຕອນຕົ້ນບຳລຸງທົ່ວແຂວງຕາມເນື້ອໃນແລະຄາດໝາຍເທົ່ານັ້ນ ແຕ່ຫາກເປັນການຢັ້ງຢື້ນເຖີງໄຊຊະນະແຫ່ງການຊີ້ນຳພາຂອງພັກລັດຄວາມເອົາໃຈໃສ່ໃກ້ຊິດຕິດແທດຂອງກະຊວງສຶກສາທິການ ແລະກິລາ,ອົງການປົກຄອງທຸກຂັ້ນ,ຜູ້ບໍລິຫານການສຶກສາ,ຄູ-ອາຈານບວກໃສ່ຄວາມເປັນເຈົ້າການຂອງປະຊາຊົນບັນດາເຜົ່າ ແລະ ການປະກອບສ່ວນຈາກທຸກພາກສ່ວນສັງຄົມດ້ານວັດຖຸປັດໃຈ,ເຫື່ອແຮງ,ສະຕິປັນຍາ,ທຶນຮອນເຂົ້າໃສການພັດທະນາແຂວງຈຳປາສັກໃຫ້ກ້າວສູ່ຈຸດໜາຍສັງຄົມນິຍົມທີ່ພັກເຮົາກຳນົດໄວ້.


ໃນພິທີຜູ້ເຂົ້າຮ່ວມຍັງໄດ້ຟັງລາຍງານສະພາບຂໍ້ສະດວກ,ຂໍ້ຫຍຸ້ງຍາກ ແລະຜົນສໍາເລັດໃນການຮຽນການສອນ,ການຍົກລະດັບຊັ້ນມັດທະຍົມຕົ້ນບໍາລຸງຈາກທ່ານ ບົວໄຂ ສຸພາອອນ ຫົວໜ້າພະແນກສຶກສາທິການ ແລະ ກິລາແຂວງ,ການປະກອບຄໍາເຫັນຂອງຜູ້ຕາງໜ້າຄະນະພັກ-ອົງການປົກຄອງເມືອງ,ສຶກສາທິການ ແລະ ກິລາເມືອງ,ຄູອາສາສະໝັກໃນການສອນຍົກລະດັບບໍາລຸງ ແລະ ຜູ້ຕາງໜ້ານັກຮຽນທີ່ຮຽນຈົບມັດທະຍົມຕົ້ນບໍາລຸງ,ໄດ້ມີການປະດັບຫລຽນໄຊ,ຫຼຽນກາ ແລະ ມອບໃບຍ້ອງຍໍປະເພດຕ່າງໆ ແກ່ຜູ້ມີຜົນງານດີເດັ່ນໃນການຍົກລະດັບບໍາລຸງມຕົ້ນແກ່ປະຊາຊົນ.ພິເສດຍັງໄດ້ຟັງຄໍາເຫັນໂອ້ລົມຂອງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕິກະຊວງສຶກສາທິການ ແລະ ກິລາ ເພື່ອເປັນທິດທາງໃຫ້ຜູ້ບໍລິຫານການສຶກສາ,ຄູອາຈານ ໄດ້ນໍາໄປຄົ້ນຄວ້າ ຈັດຕັ່ງປະຕິບັດ ແລະພັດທະນາການສຶກສາໃຫ້ຖືກຕ້ອງສອດຄ່ອງກັບສະພາບຈຸດພິເສດ ແລະການພັດທະຂອງເສດຖະກິດ-ສັງຄົມໃນປະຈຸບັນ.


ພາຍຫຼັງພິທີປະກາດໄດ້ຈັດຂຶ້ນທີ່ສະໂມສອນຫຼັກ 4 ແລ້ວ,ລັດຖະມົນຕີກະຊວງສຶກສາທິການ ແລະກິລາ,ເຈົ້າແຂວງໆຈໍາປາສັກ ແລະບັນດາທ່ານການນໍາໄດ້ຮ່ວມພິທີຕັດແຖບຜ້າ,ເປີດປ້າຍ ແລະ ລັ່ນຄ້ອງ 9 ບາດ ເພື່ອເປັນສັນຍາລັກປະກາດແຂວງຈໍາປາສັກຈົບຊັ້ນມັດທະຍົມຕົ້ນບໍາລຸງຢ່າງເປັນທາງການທີ່ພະແນກສຶກສາທິການ ແລະ ກິລາແຂວງຈໍາປາສັກອີກດ້ວຍ.

ເກດສະໜາ ແກ້ວສຸວັນນະແສງ