ບໍລິສັດ ລຸກຢາວ  ໄດ້ຮັບອະນຸຍາດໃຫ້ເຂົ້າຊອກຄົ້ນ, ສຳຫລວດ ແລະ ສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກ ແຮ່ຄຳ ແລະ ແຮ່ຕິດພັນ ຢູ່ ແຂວງໄຊສົມບູນ

ບໍລິສັດ ລຸກຢາວ ໄດ້ຮັບອະນຸຍາດໃຫ້ເຂົ້າຊອກຄົ້ນ, ສຳຫລວດ ແລະ ສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກ ແຮ່ຄຳ ແລະ ແຮ່ຕິດພັນ ຢູ່ ແຂວງໄຊສົມບູນ

September 10, 2020 0 By admin

ພິທີເຊັນບົດບັນທຶກຄວາມເຂົ້າໃຈ MOU ເພື່ອຊອກຄົ້ນ, ສຳຫລວດ ແລະ ສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກ ແຮ່ຄຳ ແລະ ແຮ່ຕິດພັນ ຢູ່ເຂດບ້ານນ້ຳຊານ ເມືອງລ້ອງແຈ້ງ ແລະ ເມືອງອະນຸວົງ ແຂວງໄຊສົມບູນ ລະຫວ່າງອົງການປົກຄອງ ແຂວງໄຊສົມບູນ ຕາງນ້າໂດຍພະແນກແຜນການ ແລະ ການລົງທຶນ ແຂວງ ແລະ ບໍລິສັດ ລຸກຢາວ ຈຳກັດ ໄດ້ຈັດຂຶ້ນໃນວັນທີ 9 ກັນຍາ ນີ້ ທີ່ສະໂມສອນກອງບັນຊາການທະຫານ ແຂວງ

ໂດຍການເຂົ້າຮ່ວມຂອງທ່ານ ພົຕ ຄຳລຽງ ອຸທໄກສອນ ເຈົ້າແຂວງໄຊສົມບູນ, ມີທ່ານ ພົຕ ວົງຄຳ ພົມມະກອນ ຫົວນ້າກົມໃຫຍ່ພະລາທິການກອງທັບ ກະຊວງປ້ອງກັນປະເທດ, ທ່ານ ນາງ ຈັນສະຫວາດ ບຸບຜາ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ທ່ານ ບຸນມີ ພຸດທະວົງ ຮອງລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ທ່ານ ທ່ານ ຫງ້ວຽນ ແມ້ງເຊິນ ບໍລິສັດ ລຸກຢາວ ຈຳກັດ ພ້ອມດ້ວຍພະແນກການອ້ອມຂ້າງແຂວງ ແລະ ພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.


ບໍລິສັດ ລຸກຢາວ ຈຳກັດ ເປັນບໍລິສັດເອກະຊົນຕ່າງປະເທດ ຂອງຫວຽດນາມ ຊຶ່ງໄດ້ຮ່ວມມືກັບບໍລິສັດ ບໍ່ຄຳເອັດດີ ໄຊສົມບູນ ຈຳກັດ ແລະ ກົມເສດຖະກິດ ກະຊວງປ້ອງກັນປະເທດ ໃນການລົງນາມບົດບັນທຶກຄວາມເຂົ້າໃຈ ແລະ ຈະຈັດຕັ້ງປະຕິບັດການຊອກຄົ້ນ, ສຳຫລວດ ແລະ ສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກ ແຮ່ຄຳ ແລະ ແຮ່ຕິດພັນ ຢູ່ເຂດບ້ານນ້ຳຊານ ເມືອງລ້ອງແຈ້ງ ແລະ ເມືອງອະນຸວົງ ແຂວງໄຊສົມບູນ ມີເນື້ອທີທັງໝົດ 15,64 ກິໂລຕາແມັດ ແຕ່ພື້ນທີ່ທັບຊ້ອນເຂດສຳປະທານຂອງບໍລິສັດ ພູເບ້ຍມາຍນິ່ງ ຈຳກັດ 13,87 ກິໂລຕາແມັດ ແມ່ນໃຫ້ສະຫງວນໄວ້ກ່ອນ ຖ້າຫາກບໍລິສັດ ພູເບ້ຍມາຍນິ່ງ ສົ່ງຄືນລັດຖະບານແລ້ວຈຶ່ງຈັດຕັ້ງຕາມລະບຽບການ ໄລຍະເວລາຂອງບົດບັນທຶກສະບັບນີ້ ແມ່ນ 24 ເດືອນ ພາຍຫລັງເຊັນບົດບັນທຶກແລ້ວ ຝ່າຍບໍລິສັດ ຕ້ອງດຳເນີນການຊອກຄົ້ນ, ສຳຫລວດ, ສ້າງບົດວິພາກເສດຖະກິດເຕັກນິກ ແລະ ບົດສຶກສາຜົນກະທົບຕໍ່ສິ່ງແວດລ້ອມສັງຄົມ ແລະ ທຳມະຊາດ.

ພ້ອມນີ້ ບໍລິສັດ ຕ້ອງປະກອບສ່ວນພັນທະຕ່າງໆ ໃນໄລຍະຈັດຕັ້ງປະຕິບັດບົດບັນທຶກສະບັບນີ້ ຄື: ທຶນພັດທະນາສັງຄົມ 10.000 ໂດລາສະຫະລັດ, ທຶນພັດທະນາທ້ອງຖິ່ນເມືອງອະນຸວົງ ແລະ ເມືອງລ້ອງແຈ້ງ ເມືອງລະ 7.000 ໂດລາ, ທຶນຝຶກອົບຮົມສົ່ງເສີມວິຊາການ 6.000 ໂດລາ, ເງິນຕິດຕາມ ແລະ ຄຸ້ມຄອງ 6.000 ໂດລາ ແລະ ເງິນຕິດຕາມໂຄງການ 6.000 ໂດລາ ສ່ວນເງິນຕິດຕາມທາງດ້ານສິ່ງແວດລ້ອມ ບໍລິສັດຈະປະກອບສ່ວນຕາມແຜນການປະເມີນສິ່ງແວດລ້ອມ ທີ່ໄດ້ຮັບຮອງຈາກພະແນກຊັບພະຍາກອນ ແລະ ສິ່ງແວດລ້ອມແຂວງ. ໃນໂອກາດນີ້ ທ່ານ ພົຕ ຄຳລຽງ ອຸທະໄກສອນ ເຈົ້າແຂວງໄຊສົມບູນ ໄດ້ມີຄຳເຫັນໂອ້ລົມ ຊຶ່ງທ່ານໄດ້ ສະແດງຄວາມຍ້ອງຍໍຊົມເຊີຍ ຕໍ່ບໍລິສັດ ທີ່ໄດ້ປະກອບສ່ວນອັນສຳຄັນ ເຂົ້າໃນການສ້າງສາພັດທະນາແຂວງ ໃນຄັ້ງນີ້ ເພາະວ່າມັນເປັນການພັດທະນາຊີວິດການເປັນຢູ່ຂອງປະຊາຊົນໃນຂອບເຂດພື້ນທີ່ໃກ້ຄຽງ ໃຫ້ມີຊີວິດການເປັນຢູ່ທີ່ດີຂຶ້ນ ທ່ານໄດ້ຮຽກຮ້ອງໃຫ້ຝ່າຍບໍລິສັດ ຈົ່ງຍົກສູງຄວາມຮັບຜິດຊອບ ໃນການຈັດຕັ້ງປະຕິບັດບັນທຶກສະບັບນີ້ ຢ່າງເຂັ້ມງວດ ພ້ອມທັງ ຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງ ຈົ່ງເປັນເຈົ້າການ ໃນການຕິດຕາມ ກວດກາ ການປະຕິບັດໂຄງການຢ່າງໃກ້ສິດ.

ຈາກນັ້ນ ທັງສອງຝ່າຍກໍໄດ້ລົງນາມເຊັນບົດບັນທຶກຮ່ວມກັນ ຕາງໜ້າໃຫ້ອົງການປົກຄອງແຂວງໂດຍ ທ່ານ ຈັນທະໜອມ ວົງສົມຈິດ ຫົວໜ້າພະແນກແຜນການ ແລະ ການລົງທຶນ ແຂວງ, ທ່ານ ບຸນທຽມ ໄຊສົງຄາມ ຫົວໜ້າພະແນກພະລັງງານ ແລະ ບໍ່ແຮ່ແຂວງ, ທ່ານ ເຈົ້າເມືອງໆລ້ອງແຈ້ງ ແລະ ເມືອງອະນຸວົງ ແລະ ຕາງໜ້າຝ່າຍບໍລິສັດ ໂດຍ ທ່ານ ຫງ້ວຽນ ແມ້ງເຊິນ ອຳນວຍການໃຫຍ່ ບໍລິສັດ ລຸກຢາວ ຈຳກັດ ແລະ ທ່ານ ພົ.ວ ຄຳມີ ຫລ້າບຸນທັນ ຫົວໜ້າກົມເສດຖະກິດກະຊວງປ້ອງກັນປະເທດ ແລະ ທ່ານ ເຈິນ ຕ໋ວນ ຕູ໋ ຕາງໜ້າບໍລິສັດ ບໍ່ຄຳເອັສດີ ໄຊສົມບູນ ໂດຍຊ່ອງໜ້າພາກສ່ວນທີ່ກ່ຽວຂ້ອງທັງສອງຝ່າຍ ເຂົ້າຮ່ວມເປັນສັກຂີພີຍານ.