ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ລົງກວດກາໂຄງການກໍ່ສ້າງຢູ່ແຂວງຫຼວງນໍ້າທາ

ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ລົງກວດກາໂຄງການກໍ່ສ້າງຢູ່ແຂວງຫຼວງນໍ້າທາ

September 10, 2020 0 By admin

Media Laos, ວັນທີ 9 ກັນຍາ 2020 ທີ່ຫ້ອງວ່າການແຂວງຫຼວງນໍ້າທາ ທ່ານ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງໄດ້ກວດກາ,ຊຸກຍູ້ໂຄງການກໍ່ສ້າງນໍ້າປະປາ ເຂົ້າຮ່ວມໂດຍທ່ານ ຄໍາໄຫຼ ສີປະເສີດ ເລຂາພັກແຂວງ ເຈົ້າແຂວງໆຫຼວງນໍ້າທາ, ມີທ່ານ ນາງ ວິໄລຄໍາ ໂພສາລາດ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ມີກໍາມະການພັກແຂວງ,ຫົວໜ້າກົມ-ຮອງກົມ,ຫົວໜ້າພະແນກ – ຮອງຫົວໜ້າພະແນກ, ຫົວໜ້າໂຄງການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.


ທ່ານ ລາຢາງ ຮືຫລົ່ງ ຫົວໜ້າໂຄງການ ພັດທະນາຕົວເມືອງຕາມແນວທາງອະນຸພາກພື້ນແມ່ນໍ້າຂອງ 2 ຕົວເມືອງຫຼວງນໍ້າທາ ໄດ້ລາຍງາຍໂດຍຫຍໍ້ ໂຄງການກໍ່ສ້າງເສັ້ນທາງ ແລະ ຮ່ອງລະບາຍນ້ຳແຄມທາງ ມູນຄ່າ 7.458.704 ໂດລາສະຫະລັດ ໂດຍແມ່ນ ບໍລິສັດ ຄໍາຟອງກຣຸບ ຈໍາກັດ ເປັນຜູ້ຮັບເໝົາກໍ່ສ້າງ, ຄວາມຄືບໜ້າຮອດປັດຈຸບັນໄດ້ 15,80%, ໂຄງການກໍ່ສ້າງຂົວຂ້າມນ້ຳທາ ແລະ ເສັ້ນທາງເຂົ້າຫາຂົວ ມູນຄ່າ 2.324.427 ໂດລາສະຫະລັດ , ຜູ້ຮັບເໝົາກໍ່ສ້າງໂດຍ ບໍລິສັດ ຈຳປາຄຳກໍ່ສ້າງສ້ອມແປງຂົວ – ທາງ ແລະ ເຄຫາສະຖານ ຄວາມຄືບໜ້າຮອດປັດຈຸບັນໄດ້ 70,60%, ໂຄງການກໍ່ສ້າງສວນສາທາລະນະ, ເດີ່ນກິລາໃນຮົ່ມ ແລະ ຕະຫລາດກາງຄືນ, ມູນຄ່າ 1.533,893 ໂດລາສະຫະລັດ.

ຜູ້ຮັບເໝົາກໍ່ສ້າງໂດຍ ບໍລິສັດ ຮ່ວງຊະນະໄຊກໍ່ສ້າງ ຄວາມຄືບໜ້າຮອດປັດຈຸບັນໄດ້ 39,96%, ໂຄງການກໍ່ສ້າງຮ່ອງລະບາຍນ້ຳທຳມະຊາດ ແລະ ອ່າງບຳບັດນໍ້າເສຍ , ມູນຄ່າ 1.191.664 ໂດລາສະຫະລັດ.ຜູ້ຮັບເໝົາກໍ່ສ້າໂດຍ ບໍລິສັດ VSP ກໍ່ສ້າງຈຳກັດ.ຄວາມຄືບໜ້າຮອດປັດຈຸບັນໄດ້ 8,70%, ໂຄງການກໍ່ສ້າງສະໜາມຂີ້ເຫຍື້ອ, ມູນຄ່າ 1.617.835 ໂດລາສະຫະລັດ, ຮັບເໝົາກໍ່ສ້າງໂດຍ ບໍລິສັດ VSP ກໍ່ສ້າງຈຳກັດ ຄວາມຄືບໜ້າຮອດປັດຈຸບັນໄດ້ 74,20%.


ໂອກາດນີ້ທ່ານ ສິດທິກອນ ພະນາລາຍ ຮອງອຳນວຍການ ລັດວິສາຫະກິດນໍ້າປະປາ ແຂວງຫຼວງນໍ້າທາ ໄດ້ລາຍງານໂດຍຫຍໍ້ ໂຄງການກໍ່ສ້າງນໍ້າປະປາເທດສະບານແຂວງຫຼວງນໍ້າທາແມ່ນໄດ້ເລີມລົງມືຈັດຕັ້ງປະຕິບັດມາແຕ່ວັນທີ 12 ມີນາ 2018 ມາຮອດປັດຈຸບັນກໍ່ສ້າງສໍາເລັດ 91 % , ມີກໍາລັງການຜະລິດ 6.300 ແມ້ດກ້ອນຕໍ່ມື້,ມີ 15 ບ້ານໄດ້ຊົມໃຊ້ຕິດຕັ້ງໝໍ້ແທກນໍ້າໄດ້2.700 ໜ່ວຍ, ຮັບເໝົາກໍ່ສ້າງໂດຍ ບໍລິສັດ ຊົງເມີຍ ກໍ່ສ້າງຈຳກັດໃນມູນຄ່າ 22 ຕື້ 511 ລ້ານກວ່າກີບ ແລະ ໂຄງການກໍ່ສ້າງນໍ້າປະປາເທດສະບານເມືອງລອງ ແມ່ນໄດ້ເລີ່ມລົງມືຈັດຕັ້ງປະຕິບັດມາແຕ່ ວັນທີ 3 ກຸມພາ 2017, ໂດຍໄດ້ຮັບທຶນກູ້ຢືມຈາກ ທະນາຄານພັດທະນາອາຊີ ( ADB ) , ຮັບເໝົາໂດຍ ບໍລິສັດວຽງແກ້ວ ກໍ່ສ້າງຈຳກັດ, ໃນມູນຄ່າການກໍ່ສ້າງ 10 ຕື້ 772 ລ້ານ ກວ່າກີບ,ມີກຳລັງການຜະລິດ 1.600 ແມັດກ້ອນຕໍ່ມື້, ມີ 5 ບ້ານທີ່ໄດ້ຮັບການຊົມໃຊ້ນ້ຳປະປາ , ຕິດຕັ້ງໝໍ້ແທກນ້ຳໄດ້ 905 ໜ່ວຍ, ມາຮອດປັດຈຸບັນແມ່ນກໍ່ສ້າງສຳເລັດ 100% ພ້ອມນັ້ນ ຜູ້ເຂົ້າຮ່ວມຍັງໄດ້ຄໍາເຫັນປຶກສາຫາລືກ່ຽວກັບການຊຸ້ກຍູ້ໂຄງການກໍ່ສ້າງດັ່ງກ່າວພາຍໃນແຂວງຫຼວງນໍ້າທາ ໃຫ້ໄດ້ຕາມລະດັບຄາດໝາຍທີ່ວາງໄວ້.ພ້ອມທັງລົງຕິດຕາມກວດກາ ແລະ ຊຸກຍູ້ໂຄງການກໍ່ສ້າງສວນສາທາລະນະ, ເດີ່ນກິລາໃນຮົ່ມ, ຕະຫລາດກາງຄືນ,ອ່າງນໍ້າປະປາແຂວງ, ຮ່ອງລະບາຍນໍ້າແຄມທາງ,ຂົວຂ້າມນ້ຳທາຢູ່ບ້ານ ດອນສໍາພັນ, ເສັ້ນທາງເຂົ້າຂົວ ແລະ ເສັ້ນທາງເບຕົງ ບ້ານ ວຽງເໜືອ,ບ້ານວຽງໃຕ້ , ບ້ານ ຫຼວງ ແລະ ບ້ານຂອນ ເມືອງຫຼວງນໍ້າທາ ຕືມອີກ.


ທ່ານ ນາງ ວິໄລຄໍາ ໂພສາລາດ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ໄດ້ເນັ້ນໜັກໃຫ້ເຈົ້າຂອງໂຄງການຂັ້ນແຂວງໃຫ້ການຄຸ້ມຄອງການກໍ່ສ້າງໃຫ້ມີປະສິດທິພາບ ແລະ ໄດ້ມາດຖານ,ຕ້ອງມີລະບົບລາຍງານ,ລົງຕິດຕາມກວດກາຢ່າງໃກ້ສິດຕິດແທດ,ລົງກວດກາ ແລະ ປະສານສົມທົບກັບບໍລິສັດທີ່ຮັບເໜົາກໍ່ສ້າງເພື່ອສ້າງຄວາມປອດໄຟໃນການກໍ່ສ້າງ ແລະ ໃຫ້ສຳເລັດໄປຕາມແບບຂອງໂຄງການ ,ທິມທີ່ປຶກສາຕ້ອງໄດ້ວິໄຈການກໍ່ສ້າງໃຫ້ໄດ້ມາດຖານຕາມແບບຂອງໂຄງການວາງໄວ້ ແລະ ຕ້ອງມີວິທີແກ້ໄຂ.