ເຊັນ MOU ໂຄງການສຶກສາສໍາຫລວດຂໍ້ມູນທາງດ້ານນໍ້າມັນ ແລະ ອາຍແກັດທໍາມະຊາດ ຢູ່ແຂວງໄຊສົມບູນ

ເຊັນ MOU ໂຄງການສຶກສາສໍາຫລວດຂໍ້ມູນທາງດ້ານນໍ້າມັນ ແລະ ອາຍແກັດທໍາມະຊາດ ຢູ່ແຂວງໄຊສົມບູນ

June 23, 2020 0 By admin

Media Laos, ພິທີເຊັນບົດບັນທຶກຄວາມເຂົ້າໃຈ ( MOU ) ໂຄງການສໍາຫລວດ, ສຶກສາຂໍ້ມູນທາງດ້ານນໍ້າມັນ ແລະ ອາຍແກັດທໍາມະຊາດ,ໂຄງການສຶກສາສໍາຫລວດຄວາມເປັນໄປໄດ້, ໂຄງການສົ່ງເສີມການປູກພືດອິນຊີ ໂດຍນໍາໃຊ້ເຕັກໂນໂລຊີ ທາງຊີວະພາບ ແບບປະສົມປະສານ ໃນຂອບເຂດ 5 ເມືອງ ແລະ ໂຄງການສຶກສາ, ສໍາຫລວດຄວາມເປັນໄປໄດ້ໃນການລົງທຶນສົ່ງເສີມການປູກ, ອະນຸລັກ ແລະ ປຸງແຕ່ງໃບຊາປ່າ ( ຊາໝ້ຽງ ) ຢູ່ບ້ານໜອງພູນໄຊ, ເມືອງລ້ອງແຈ້ງ ແຂວງໄຊສົມບູນ ລະຫວ່າງພະແນກແຜນການ ແລະ ການລົງທຶນ ແຂວງໄຊສົມບູນ ກັບບໍລິສັດ ເຮັດບີການຄ້າຂາອອກ-ຂາເຂົ້າ ຈໍາກັດ ໄດ້ຈັດຂຶ້ນໃນຕອນເຊົ້າຂອງວັນທີ 23 ມິຖຸນາ ນີ້ ທີ່ສະໂມສອນເມືອງອະນຸວົງ ໂດຍການເຂົ້າຮ່ວມເປັນສັກຂີພິຍານຂອງທ່ານ ພົຕ ຄໍາລຽງ ອຸທະໄກສອນ, ເຈົ້າແຂວງໄຊສົມບູນ, ມີທ່ານ ຈັນທະບູນ ລັດຕະນະວົງ, ຮອງຫົວໜ້າຫ້ອງວາການສູນກາງພັກ ທັງຫົວໜ້າຄະນະຊ່ວຍວຽກພັດທະນາເຂດຈຸດສຸມໃຈກາງ, ທ່ານ ຄໍາບຸນນັດ ໄຊຍະນົນ, ຮອງລັດຖະມົນຕີກະຊວງກະສິກໍາ ແລະ ປ່າໄມ້, ຄະນະຊ່ວຍວຽກພັດທະນາເຂດຈຸດສຸມໃຈກາງ, ທ່ານ ຢີງ ຈິນຊຽງ, ປະທານບໍລິສັດ ເຮັດບີການຄ້າຂາອອກ-ຂາເຂົ້າ ຈໍາກັດ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.


ໃນພິທີ ທ່ານ ຈັນທະໝອນ ວົງສົມຈິດ, ຫົວໜ້າພະແນກແຜນການ ແລະ ການລົງທຶນ ແຂວງ ໄດ້ຂຶ້ນລາຍງານກ່ຽວກັບຂໍ້ມູນພື້ນຖານຂອງ 3 ໂຄງການ ໃນນັ້ນໂຄງການບໍ່ນໍ້າມັນ ແລະ ອາຍແກັສທໍາມະຊາດ ກ່ອນທີ່ບໍລິສັດຈະໄດ້ດໍາເນີນການຊອກຄົ້ນ, ສໍາຫລວດ ແລະ ສຶກສາຄວາມເປັນໄປໄດ້ ທາງດ້ານເສດຖະກິດ-ເຕັກນິກ ບໍ່ນໍ້າມັນ ແລະ ອາຍແກັສ ຢູ່ພາກສະໜາມ ຊຶ່ງບໍລິສັດຕ້ອງໄດ້ຖອກເງິນຄໍ້າປະກັນ ຈຳນວນ 100.000 ໂດລາສະຫະລັດ, ສຳລັບໂຄງການສົ່ງເສີມການປູກພືດອິນຊີ ໂດຍນໍາໃຊ້ເຕັກໂນໂລຊີ ທາງຊີວະພາບແບບປະສົມປະສານໃນຂອບເຂດ 5 ເມືອງ ກໍຕ້ອງໄດ້ຖອກຄໍ້າປະກັນ ຈຳນວນ 100,000,000 ກີບ ແລະ ໂຄງການສົ່ງເສີມການປູກ, ອະນຸລັກ ແລະ ປຸງແຕ່ງພັດທະນາຜະລິດຕະພັນຊາປ່າ ( ໃບໝ້ຽງ ) ບໍລິສັດ ຕ້ອງຖອກເງິນຄໍ້າປະກັນ ຈຳນວນ 100ລ້ານກີບ.

ສໍາຫລັບໂຄງການບໍ່ນໍ້າມັນ ແລະ ອາຍແກັສທໍາມະຊາດ, ໂຄງການສົ່ງເສີມການປູກພືດອິນຊີ ໂດຍນໍາໃຊ້ເຕັກໂນໂລຊີ ທາງຊີວະພາບແບບປະສົມປະສານໃນຂອບເຂດ 5 ເມືອງ ແລະ ໂຄງການສົ່ງເສີມການປູກ, ອະນຸລັກ ແລະ ປຸງແຕ່ງພັດທະນາຜະລິດຕະພັນຊາປ່າ ( ໃບໝ້ຽງ ) ຊຶ່ງບົດບັນທຶກຄວາມເຂົ້າໃຈ MOU 3 ສະບັບນີ້ ມີອາຍຸ 24 ເດືອນ ນັບແຕ່ສອງຝ່າຍລົງລາຍເຊັນເປັນຕົ້ນໄປ ພາຍຫລັງເຊັນບົດບັນທຶກ MOU ແລ້ວ ພາຍໃນ 60 ວັນ ຫາກບໍລິສັດຍັງບໍ່ທັນມີການເຄື່ອນໄຫວວຽກງານຕ່າງໆ, ບໍ່ມາແຈ້ງໜ້າວຽກແຜນການເຄື່ອນໄຫວຂອງບໍລິສັດ ໃຫ້ອົງການປົກຄອງ ແຂວງ ແລະ ບໍ່ມາຖອກເງິນຄໍ້າປະກັນ ອົງການປົກຄອງແຂວງ ມີສິດຍົກເລີກບົດບັນທຶກຄວາມເຂົ້າໃຈ MOU ສະບັບນີ້ ທັນທີ.

ຈາກນັ້ນ ທັງສອງຝ່າຍໄດ້ຮ່ວມກັນລົງນາມ ເຊັນບົດບັນທຶກຄວາມເຂົ້າໃຈ MOU ຊຶ່ງຕາງໜ້າໃຫ້ອົງການປົກຄອງແຂວງ ລົງນາມໂດຍທ່ານ ຈັນທະໜອມ ວົງສົມຈິດ, ຫົວໜ້າພະແນກແຜນການ ແລະ ການລົງທຶນ ແຂວງ ແລະ ຕາງໜ້າບໍລິສັດໂດຍທ່ານ ຢິງ ຈິນຊຽງ, ປະທານບໍລິສັດ ເຮັດບີການຄ້າຂາອອກ-ຂາເຂົ້າ ຈໍາກັດ ພ້ອມດ້ວຍພາກສ່ວນກ່ຽວຂ້ອງທັງສອງຝ່າຍ ເຂົ້າຮ່ວມເປັນສັກຄີພິຍານ. ພ້ອມນີ້ ການນໍາແຕ່ຂອງເມືອງທີ່ກ່ຽວຂ້ອງ ຍັງໄດ້ຮ່ວມເຊັນບົດບັນທຶກຄວາມເຂົ້າໃຈກັບບໍລິສັດ ດັ່ງກ່າວຕື່ມອີກ.

ໂອກາດດັ່ງກ່າວ ທ່ານ ພົຕ ຄໍາລຽງ ອຸທະໄກສອນ, ເຈົ້າແຂວງໄຊສົມບູນ ໄດ້ມີຄໍາເຫັນໂອລົມຕໍ່ພິທີ ຊຶ່ງທ່ານໄດ້ເນັ້ນນັກໃຫ້ພາກສ່ວນທີ່ກ່ຽວຂ້ອງ ກໍຄືພະແນກແຜນການ ແລະ ການລົງທຶນ ແຂວງ ຈົ່ງເປັນເຈົ້າການສູງໃນການປະສານງານ, ລົງຕິດຕາມກວດກາ ພ້ອມທັງອໍານວຍຄວາມສະດວກດ້ານຕ່າງໆ ໃຫ້ທາງບໍລິສັດ ໄດ້ດຳເນີນການຈັດຕັ້ງປະຕິບັດໂຄງການຂອງຕົນຢ່າງຕໍ່ເນື່ອງ ແລະ ໃຫ້ຖືກຕ້ອງຕາມເນັກນິກວິຊາການຮອບດ້ານ ທັງນີ້ ກໍເພື່ອໃຫ້ບໍລິສັດໄດ້ປະກອບສ່ວນ ຢ່າງແຂງແຮງ ເຂົ້າໃນການພັດທະນາເສດຖະກິດ ຂອງແຂວງໄຊສົມບູນ ໃຫ້ມີບາດກ້າວຂະຫຍາຍຕົວດີຂຶ້ນເລື້ອຍໆ.