ແຕ່ງຕັ້ງ ສະຫາຍ ພັນເອກ ຕ່າງຕາ ຕາດເວີນຄຳ ຂຶ້ນເປັນຫົວໜ້າການທະຫານ ກອງພົນທະຫານຮາບທີ 4

ແຕ່ງຕັ້ງ ສະຫາຍ ພັນເອກ ຕ່າງຕາ ຕາດເວີນຄຳ ຂຶ້ນເປັນຫົວໜ້າການທະຫານ ກອງພົນທະຫານຮາບທີ 4

September 9, 2020 0 By admin

ໃນວັນທີ 8 ກັນຍາ 2020 ນີ້, ກະຊວງປ້ອງກັນປະເທດລົງປະກາດການຈັດຕັ້ງນຳພາ-ບັນຊາຂັ້ນກອງພົນ ຢູ່ທີ່ສະໂມສອນກອງພົນທະຫານຮາບທີ 4 ໂດຍເປັນກຽດເຂົ້າຮ່ວມຂອງ ສະຫາຍ ພົນຕີ ແອສະໄໝ ເລືອງວັນໄຊ ຄະນະປະຈຳພັກກະຊວງ ຮອງລັດຖະມົນຕີກະຊວງປ້ອງກັນປະເທດ, ມີ ສະຫາຍ ພົນຈັດຕະວາ ພູມີ ດາລາເພັດ ຄະນະພັກກົມໃຫຍ່ເສນາທິການກອງທັບ ຫົວໜ້າກົມພະນັກງານ, ມີກົມຈັດຕັ້ງພັກ, ຄະນະພັກ-ຄະນະບັນຊາກອງພົນທະຫານຮາບທີ 4, ກອງບັນຊາການທະຫານແຂວງສະຫວັນນະເຂດ, ປກສ ແຂວງສະຫວັນນະເຂດ, ການນຳເມືອງອຸທຸມພອນ, ກອງພັນໃຫຍ່ 644, ໂຮງໝໍບໍລິເວນ 109, ໂຮງງານປະສານເຫຼົ່າພາກກາງ, ສາງນ້ຳມັນເລກ 9, ສາງອໍ4 ແລະ ກົມກອງທີ່ຂຶ້ນກັບກອງພົນທີ 4 ຕະຫຼອດຮອດພະນັກງານຫຼັກແຫຼ່ງທົ່ວກອງພົນທີ່ 4 ເຂົ້າຮ່ວມ.


ສະຫາຍ ພົນຈັດຕະວາ ພູມີ ດາລາເພັດ ຄະນະພັກກົມໃຫຍ່ການເມືອງກອງທັບ ຫົວໜ້າກົມພະນັກງານ ຂຶ້ນຜ່ານດຳລັດຂອງນາຍົກລັດຖະມົນຕີ ແລະ ຂໍ້ຕົກລົງຂອງກະຊວງປ້ອງກັນປະເທດວ່າດ້ວຍການປັບປຸງບຸລະນະລະບົບກົງຈັກການຈັດຕັ້ງນຳພາ-ບັນຊາຂັ້ນກອງພົນຢູ່ກອງພົນທີ4 ເພື່ອປະຕິບັດຕາມກົດໝາຍນາຍທະຫານຂອງກອງທັບປະຊາຊົນລາວ ສະບັບປັບປຸງ ປີ2018 ໃນພາກທີ II ໝວດທີ 4 ມາດຕາ 26 ວ່າດ້ວຍການແຕ່ງຕັ້ງຍົກຍ້າຍນາຍທະຫານ ເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ວຽກງານຢູ່ກອງພົນທະຫານຮາບທີ 4 ເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ວຽກງານຂອງກງພົນທະຫານຮາບທີ 4ອີງຕາມທິດທາງກ່ຽວກັບການປັບປຸງບຸລະນະລະບົບກົງຈັກການຈັດຕັ້ງນຳພາ-ບັນຊາຂັ້ນກອງພົນ, ໃນກຳລັງປະກອບອາວຸດໃຫ້ເຂັ້ມແຂງ, ໜັກແໜ້ນຮອບດ້ານ ເພື່ອເຮັດສຳເລັດໜ້າທີ່ປົກປັກຮັກສາ ແລະ ສ້າງສາພັດທະນາປະເທດຊາດ.

ນາຍົກລັດຖະມົນຕີ ອອກຂໍ້ຕົກລົງ ສະບັບເລກທີ 487/ນຍ ລົງວັນທີ 20/08/2020 ຕົກລົງແຕ່ງຕັ້ງ ສະຫາຍ ພັນເອກ ຕ່າງຕາ ຕາດເວີນຄຳ ຂຶ້ນເປັນຫົວໜ້າການທະຫານ ກອງພົນທະຫານຮາບທີ 4, ກະຊວງປ້ອງກັນປະເທດ ອອກຂໍ້ຕົກລົງ ສະບັບເລກທີ 3128/ກປທ ລົງວັນທີ 27/07/2020 ຕົກລົງ ແຕ່ງຕັ້ງ ສະຫາຍ ພັນໂທ ບຸນທັນ ແກ້ວພູວົງ ເປັນຮອງຫົວໜ້າການທະຫານກອງພົນທະຫານຮາບທີ 4 ທັ້ງເປັນຫົວໜ້າຫ້ອງເສນາທິການ ກອງພົນທະຫານຮາບທີ 4 ແລະ ຂໍ້ຕົກລົງບົ່ງຕົວແຕ່ງຕັ້ງເພີ່ມເຕີມຂອງກະຊວງປ້ອງກັນປະເທດ ຕົກລົງ ແຕ່ງຕັ້ງ ສະຫາຍ ພັນເອກ ຕ່າງຕາ ຕາດເວີນຄຳ ເປັນຮອງເລຂາຄະນະພັກກອງພົນທີ 4, ຄະນະປະຈຳພັກກອງພົນທີ 4 ແລະ ແຕ່ງຕັ້ງ ສະຫາຍ ພັນໂທ ບຸນເຮືອງ ຄຳມິງສະຫວັນ ຮອງຫ້ອງເສນາທິການ ເປັນຄະນະພັກກອງພົນທີ4.


ໂອກາດນີ້ ສະຫາຍ ພົນຕີ ແອສະໄໝ ເລືອງວັນໄຊ ຄະນະປະຈຳພັກກະຊວງ ຮອງລັດຖະມົນຕີກະຊວງປ້ອງກັນປະເທດ ກໍ່ໄດ້ມີຄຳ ແລະ ເຫັນໂອລົມ ເໜັ້ນໜັກໃຫ້ ຜູ້ທີ່ຮັບໜ້າທີ່ໃໝ່ຈົ່ງຍົກສູງບົດບາດໃນການຊີ້ນຳ-ນຳພາ ສືບຕໍ່ເຊື່ອມຊຶມ 4 ໜ້າທີ່ໃຫຍ່ 26 ແຜນງານ ຂອງອົງຄະນະພັກກະຊວງປ້ອງກັນປະເທດວາງອອກ, ຖືເອົາວຽກງານສຶກສາອົບຮົມການເມືອງນຳພາແນວຄິດເປັນກົກເຂົ້າໃນສະພາບການປະຈຸບັນ, ເພີ່ມທະວີຄວາມສາມັກຄີພາຍໃນ, ພາຍນອກໃຫ້ເປັນປຶກແຜ່ນ, ປະຕິບັດຫຼັກການລວມສູນປະຊາທິປະໄຕແບ່ງວຽກໃຫ້ບຸກຄົນຮັບຜິດຊອບ, ສືບຕໍ່ປັບປຸງກົມກອງຮອບດ້ານໃຫ້ມີທ່າກ້າວປ່ຽນແປ່ງໃໝ່ເລື້ອຍໆ, ກໍ່ສ້າງພັກ-ພະນັກງານ 3 ລຸ້ນ ໃຫ້ບັນລຸໄດ້ຕາມຄາດໝາຍທິດທາງແຜນການຂອງພັກ-ລັດວາງອອກ ຢ່າງເຂັ້ມງວດ.


ຂ່າວໂດຍ: ບົວຄຳ ທອງລັດສະໝີ (ນັກຂ່າວກອງພົນທີ 4)
ພາບໂດຍ: ອະນຸສັກຈູມມະນີວົງ(ນັກຂ່າວກອງພົນທີ 4)