ອາວເຟຣດ ຣີໂດ້ ອະດີດຄູຝຶກບານເຕະທີມຊາດລາວ ຊຸດຊີເກມ 2009 ເສຍຊີວິດໃນໄວ 70 ປີ!!

ອາວເຟຣດ ຣີໂດ້ ອະດີດຄູຝຶກບານເຕະທີມຊາດລາວ ຊຸດຊີເກມ 2009 ເສຍຊີວິດໃນໄວ 70 ປີ!!

September 8, 2020 0 By admin

ອາວເຟຣດ ຣີໂດ້ (Alfred Riedl) ອະດີດຄູຝຶກບານເຕະທີມຊາດລາວ ຊາວອັອສເຕຣຍ (ໂອຕຣິດ) ໄດ້ເຖິງແກ່ມໍລະນະກຳໃນວັນທີ 7 ກັນຍາ 2020 ລວມອາຍຸໄດ້ 70 ປີ. ອາວເຟຣດ ຣີໂດ້ ຖືວ່າເປັນຄູຝຶກປະຫວັດສາດຂອງບານເຕະທີມຊາດລາວ ສາມາດນຳທີມເຂົ້າເຖິງຮອບຮອງຊະນະເລີດ ໃນງານມະຫາກຳກິລາຊີເກມ ຄັ້ງທີ 25 ທີ່ ສປປ ລາວ ໄດ້ຮັບກຽດເປັນເຈົ້າພາບຄັ້ງທຳອິດ ໃນປີ 2009.

ຊຶ່ງຕະຫລອດອາຊີບຄູຝຶກຂອງ ອາວເຟຣດ ຣີໂດ້ ປະສົບການໂຊກໂຊນເຄີຍຄຸມ 15 ທີມ, ໃນນີ້ທີມຊາດ 6 ທີມ: ໂອຕຣິດ, ລິດເທິນສະຕາຍ, ຫວຽດນາມ, ສປປ ລາວ, ປາເລັສຕິນ ແລະ ອິນໂດເນເຊຍ, ສ່ວນອີກ 9 ທີມເປັນລະດັບສະໂມສອນໃນປະເທດໂອຕຣິດ, ໂມຣັອກໂຄ, ເອຢິບ, ຫວຽດນາມ, ຄູເວດ, ແບນຊິກ ແລະ ອິນໂດເນເຊຍ. ຜົນງານພົ້ນເດັ່ນ ນຳທີມຊາດຫວຽດນາມ ໄດ້ຮອງແຊ້ມອາຊຽນ ປີ 1998 ຮອງແຊ້ມຊີເກມ 3 ສະໄໝ ປີ 1999, 2003, 2005 ຮອງແຊ້ມຄິງຄັບ ປີ 2006 ແລະ ຄຸມທີມຊາດອິນໂດເນເຊຍ ໄດ້ຮອງແຊ້ມອາຊຽນ 2 ສະໄໝ ປີ 2010, 2016.

ອາວເຟຣດ ຣີໂດ້ ມາຊ່ວຍທີມຊາດລາວ 2 ຄັ້ງ, ຄັ້ງທີ 1 ປີ 2009-2010 ນຳທີມເຂົ້າຮອບຮອງຊະນະເລີດ ຊີເກມ ຄັ້ງທີ 25 ທີ່ ສປປ ລາວ ເປັນເຈົ້າພາບໃນປີ 2009 ແລະ ຄັ້ງທີ 2 ປີ 2011-2012 ໃນຕຳແໜ່ງຜູ້ອຳນວຍການດ້ານເຕັກນິກ ((Technical Director).

Photo: AFF, Indosport