ດ່ານສາກົນແດນສະຫວັນ ທໍາລາຍຊິ້ນສ່ວນເຄື່ອງໃນສັດທີ່ນໍາເຂົ້າຜິດກົດໝາຍ ຫຼາຍກວ່າ1,5ໂຕນ

ດ່ານສາກົນແດນສະຫວັນ ທໍາລາຍຊິ້ນສ່ວນເຄື່ອງໃນສັດທີ່ນໍາເຂົ້າຜິດກົດໝາຍ ຫຼາຍກວ່າ1,5ໂຕນ

September 8, 2020 0 By admin

ດ່ານສາກົນແດນສະຫວັນ ໄດ້ຈັດພິທີທໍາລາຍຊິ້ນສ່ວນເຄື່ອງໃນສັດທີ່ນໍາເຂົ້າບໍ່ຖືກຕ້ອງຕາມລະບຽບກົດໝາຍ ຢູ່ທີ່ສະໜາມຂີ້ເຫບ້ານແດນສະຫວັນ ເມືອງເຊໂປນ ໃນຕອນແລງຂອງວັນທີ 5 ກັນຍາ 2020 ຜ່ານມາ .

ໂດຍການເຂົ້າຮ່ວມເປັນສັກຂີພິຍານຂອງ ທ່ານ ກົງມາ ພຸດທະວົງ ຮອງຫົວໜ້າພາສີດ່ານແດນສະຫວັນ, ທ່ານ ກົງສັກດາ ອິນທະພູທອນ ຫົວໜ້າດ່ານກວດກາສັດຕະວະແພດ, ມີບັນດາເຈົ້າໜ້າທີ່ພາສິ, ດ່ານຕໍາຫຼວດ ຕ.ມ, ເຈົ້າໜ້າທີ່ ອ.ຢ, ເຈົ້າໜ້າທີ່ກັກກັນພືດ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ 30 ກວ່າທ່ານ.


ທ່ານ ກົງສັກດາ ອິນທະພູທອນ ໄດ້ລາຍງານຜົນຂອງການຈັດຕັ້ງປະຕິບັດກວດຢຶດຊິ້ນສ່ວນເຄື່ອງໃນສັດທີ່ນໍາເຂົ້າບໍ່ຖືກຕ້ອງຕາມລະບຽບກົດໝາຍຂອງ ສ ປ ປ ລາວ ໃນຄັ້ງນີ້ ວ່າ: ໃນເວລາ 4 ໂມງແລງ ຂອງວັນທີ 4 ກັນຍາ 2020 ເຈົ້າໜ້າທີ່ດ່ານສາກົນແດນສະຫວັນ ໄດ້ກວດກາສິນຄ້າຂາເຂົ້າ ໃນລົດຂົນສົ່ງ ຊາວຫວຽດນາມ ໝາຍເລກ 74C 03950 ເຊິ່ງພົບເຫັນສິນຄ້າປະເພດຊິ້ນສ່ວນເຄື່ອງໃນສັດຄົວແລ້ວບັນຈຸໃນແກດໂຟມຫໍ່ດ້ວຍກະສອບຊຸກເຊື່ອງມາກັບກະຕ່າໝາກໄມ້ ເພື່ອຕົບຕາເຂົ້າໜ້າທີ່, ຈໍານວນທັງໝົດ 16 ແກັດ, ມີນໍ້າໜັກ 1.540 ກິໂລກຼາມ.

ຜ່ານການກວດກາເຫັນວ່ານໍາເຂົ້າບໍ່ຖືກຕ້ອງຕາມກົດໜາຍ ບໍ່ມີເຈົ້າຂອງຮັບຜິດຊອບ ດັ່ງນັ້ນທາງຄະນະຄຸມຄອງດ່ານສາກົນແດນສະຫວັນ ຈິ່ງໄດ້ເຫັນດີຢຶດ ແລະ ອະນຸມັດທໍາລາຍສີນຄ້າຈໍານວນດັ່ງກ່າວຖິ້ມ ໂດຍການໃຊລົດຈົກດິນຂຸດຂຸມເລິກ 4-5 ແມັດ, ໂຮຍປູນຂາວ ແລ້ວນໍາຊິ້ນສວນເຄື່ອງໃນສັດນັ້ນລົງຂຸມ ພ້ອມທັງສີດຢາຂ້າເຊື້ອແລ້ວຈິ່ງຝັງດິນ

ທັງນີ້ເພື່ອຄວາມເປັນລະບຽບຮຽບຮ້ອຍ ແລະ ຮັບປະກັນຕໍ່ຜູ້ບໍລິໂພກ, ປ້ອງກັນບໍ່ໃຫ້ມີການແຜ່ລະບາດຂອງເຊື້ອພະຍາດທີ່ອາດຈະຕິດມາກັບຊິ້ນສ່ວນດັ່ງກ່າວ, ໂດຍສະເພາະໃນໄລຍະທີ່ມີການແຜ່ລະບາດຂອງເຊື້ອພະຍາດໂຄວິດ-19 ຢູ່ໃນປະຈຸບັນນີ້.

ແຫຼ່ງທີ່ມາ: ວິທະຍຸກະຈາຍສຽງ ສະຫວັນນະເຂດ