ສກຂ ຫົວພັນ ຈັດກິດຈະກຳ ສະຫຼອງວັນສາກົນແຫ່ງການຮຽນຮູ້ໜັງສື ຄົບຮອບ 55 ປີ

ສກຂ ຫົວພັນ ຈັດກິດຈະກຳ ສະຫຼອງວັນສາກົນແຫ່ງການຮຽນຮູ້ໜັງສື ຄົບຮອບ 55 ປີ

September 8, 2020 0 By admin

ວັນທີ 7 ກັນຍາ 2020 ນີ້ ຢູ່ທີ່ ຫ້ອງປະຊຸມ ພະແນກ ສກຂ ຫົວພັນ ໄດ້ມີພິທີເລົ່າມູນເຊື້ອ ສະເຫຼີມສະຫຼອງວັນສາກົນແຫ່ງການຮຽນຮູ້ໜັງສື ຄົບຮອບ 55 ປີ ( 8 ກັນຍາ 1965-8 ກັນຍາ 2020 ໂດຍເປັນກຽດການເຂົ້າຮ່ວມຂອງ ທ່ານ ມົນທອງ ລຽນຕິຄຸນ ຫົວໜ້າພະແນກ ສກຂ ພ້ອມດ້ວຍຄະນະ, ມີຫົວໜ້າຂະແໜງ 13 ຂະແໜງ, ຫົວໜ້າສູນ 3 ສູນ, 3 ອົງການຈັດຕັ້ງມະຫາຊົນ, ພະນັກງານ ແລະ ພາກສ່ວນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ

ເພື່ອເປັນການປະກອບສ່ວນ ແລະ ຊຸກຍູ້ ວັນສາກົນແຫ່ງການຮຽນຮູ້ໜັງສື ໃຫ້ມີເນື້ອໃນ ແລະ ບັນຍາກາດຟົດຟື້ນມ່ວນຊື່ນ, ເປັນການເຜີຍແຜ່ໃຫ້ທົ່ວສັງຄົມຮັບຮູ້ວັນດັ່ງກ່າວພ້ອມທັງມີຄວາມເຂົ້າໃຈຕໍ່ກັບຄວາມສຳຄັນ ແລະ ການເຕີບໃຫຍ່ຂະຫຍາຍຕົວຂອງການສຶກສາເວົ້າລວມ, ເວົ້າສະເພາະແມ່ນວຽກງານການສຶກສານອກໂຮງຮຽນ, ຈິ່ງເຮັດໃຫ້ວັນດັ່ງກ່າວເປັນວັນທີ່ມີຄວາມໝາຍຄວາມສຳຄັນຢ່າງຍິ່ງຕໍ່ກັບປະຊາຊາດໃນໂລກ ໂດຍສະເພາະແມ່ນຜູ້ດ້ອຍໂອກາດ, ພາດໂອກາດທາງດ່ານການສຶກສາເປັນຕົ້ນແມ່ນ: ຄວາມບໍ່ຮູ້ໜັງສື, ການຮຽນບໍ່ຈົບການສຶກສາຂັ້ນພື້ນຖານ, ເຊິ່ງມັນໄດ້ກາຍເປັນອຸປະສັັກຢ່າງໃຫຍ່ຫຼວງຕໍ່ກັບການພັດທະນາຄົນກໍ່ຄືການພັດທະນາຊັບພະຍາກອນມະນຸດ, ການພັດທະນາເສດຖະກິດຂອງຊາດ, ຂອງສັງຄົມ, ຂອງຕົນເອງ ແລະ ຄອບຄົວ, ດ້ວຍເຫດຜົນດັ່ງກ່າວປະຊາຊົນຜູ້ຮັກຫອມສັນຕິພາບ ປະຊາທິປະໄຕ ແລະ ຮັກຄວາມເປັນທຳຢູ່ໃນທົ່ວໂລກຈິ່ງໄດ້ພ້ອມກັນສະເໜີທວງເອົາສິດໃນການສຶກສາຮໍ່າຮຽນ ແນໃສ່ເຮັດໃຫ້ປະຊາຊົນຫຼຸດພົ້ນອອກຈາກການບໍ່ຮູ້ໜັງສື ແລະ ຮຽນບໍ່ຈົບຊັ້ນປະຖົມ ຫຼື ສູງກ່ວານັ້ນມາຮອດປີ 1986 ກອງປະຊຸມໃຫຍ່ຂອງອົງການອຸຍເນັດສະໂກຄັ້ງວັນທີ 14 ຈິ່ງມີມະຕິຮັບຮອງເອົາວັນທີ 8 ກັນຍາ ຂອງທຸກໆປີ ໃຫ້ເປັນວັນສາກົນແຫ່ງການຮຽນຮູ້ໜັງສື ພ້ອມກັນນັ້ນກໍ່ໄດ້ຮຽກຮ້ອງໃຫ້ທຸກໆປະເທດທີ່ເປັນສະມາຊິກຂອງ ອົງການສະຫະປະຊາຊາດ ຈັດຕັ້ງສະເຫຼີມສະຫຼອງວັນດັ່ງກ່າວທຸກໆປີ

ມາຮອດຕອນແລງວັນດຽວກັນ ກໍ່ໄດ້ຈັດກິດຈະກຳແຂ່ງຂັນກິລາ ມິດຕະພາບ 2 ປະເພດຄື: ເປຕັງ ແລະ ບານເຕະ ຂຶ້ນຢູ່ທີ່ເດີ່ນບານຫຍ້າທຽມ ຈະເລີນຊຳ ເຊິ່ງເຕັມໄປດ້ວຍບັນຍາກາດເບີກບານມ່ວນຊື່ນ

ທີ່ມາ: ພະແນກສຶກສາທິການ ແລະ ກິລາແຂວງຫົວພັນ