ຄຳມ່ວນ ທາບທາມເອົາບຸກຄະລາກອນເຂົ້າໂຄງປະກອບອົງຄະນະພັກແຂວງ ສະໄໝທີ X ຮອບທີ 2

ຄຳມ່ວນ ທາບທາມເອົາບຸກຄະລາກອນເຂົ້າໂຄງປະກອບອົງຄະນະພັກແຂວງ ສະໄໝທີ X ຮອບທີ 2

September 8, 2020 0 By admin

ກອງປະຊຸມທາບທາມເອົາບຸກຄະລາກອນ ເຂົ້າໃນໂຄງປະກອບຂອງຄະນະບໍລິຫານງານພັກແຂວງຄຳມ່ວນ ສະໄໝທີ X ຮອບທີ 2 ໄດ້ຈັດຂຶ້ນໃນວັນທີ 4 ກັນຍາ 2020 ທີ່ສະໂມສອນຫຼັກ 4 ໂດຍເປັນກຽດເຂົ້າຮ່ວມຂອງສະຫາຍ ໂອໄດ ສຸດາພອນ ກຳມະການສູນກາງພັກ, ເລຂາພັກແຂວງຄຳມ່ວນ, ສະຫາຍ ວັນໄຊ ຟອງສະຫວັນ ຮອງຫົວໜ້າຄະນະຈັດຕັ້ງສູນກາງພັກ, ມີບັນດາສະຫາຍຮອງເລຂາ, ຄະນະປະຈຳ, ຄະນະບໍລິຫານງານພັກແຂວງ, ຄະນະບໍລິຫານງານພັກເມືອງ, ອະນຸກໍາມະການກະກຽມກອງປະຊຸມໃຫຍ່ຂອງແຂວງ ຕະຫຼອດຮອດຄະນະພັກຮາກຖານ, ຄະນະໜ່ວຍພັກຂັ້ນແຂວງ ແລະ ຂັ້ນເມືອງເຂົ້າຮ່ວມ.


ສະຫາຍ ພົມມາ ພັນທະລັງສີ ຮອງເລຂາພັກແຂວງ, ຫົວໜ້າອະນຸໂຄງປະກອບບຸກຄະລາກອນ ກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງຄຳມ່ວນ ໄດ້ຜ່ານມາດຖານ, ເງື່ອນໄຂບຸກຄະລາກອນທີ່ລົງສະໝັກເຂົ້າໃນໂຄງປະກອນ ຄະນະບໍລິຫານງານພັກແຂວງ ພ້ອມທັງອະທິບາຍຊີ້ແຈງບັນດາມາດຖານ, ເງື່ອນໄຂ ແຕ່ລະດ້ານ ເພື່ອໃຫ້ກອງປະຊຸມໄດ້ຄົ້ນຄວ້າພິຈາລະນາ.

ໂອກາດດຽວກັນ ສະຫາຍ ໂອໄດ ສຸດາພອນ ແລະ ສະຫາຍ ວັນໄຊ ຟອງສະຫວັນ ກໍ່ໄດ້ພັດປ່ຽນກັນໂອ້ລົມ ແລະ ໃຫ້ທິດຊີ້ນຳເພີ່ມເຕີມ ເພື່ອໃຫ້ບັນດາສະຫາຍທີ່ເຂົ້າຮ່ວມໄດ້ເອົາໃຈໃສ່ຢ່າງເລິກເຊິ່ງ ໃນການຄົ້ນຄວ້າພິຈາລະນາເອົາບຸກຄະລາກອນເຂົ້າໃນໂຄງປະກອບ ໃຫ້ຖືກຕ້ອງຕາມມາດຖານ, ເງື່ອນໄຂ ໂດຍສະເພາະແມ່ນໃຫ້ຖືກຕາມທິດຊີ້ນໍາ ຂອງກົມການເມືອງສູນກາງພັກວາງອອກ. ຈາກນັ້ນກອງປະຊຸມກໍ່ໄດ້ດຳເນີນການປ່ອນບັດທາບທາມເອົາເປົ້າໝາຍ ບຸກຄະລາກອນໃນຮອບທີ 2 ບົນພື້ນຖານຫຼັກການປະຊາທິປະໄຕ ເພື່ອເປັນການກະກຽມຄວາມພ້ອມໃຫ້ແກ່ກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງຄຳມ່ວນ ທີ່ຈະດຳເນີນຂຶ້ນໃນກາງເດືອນຕຸລາ 2020 ທີ່ຈະມາເຖິງນີ້.

ແຫຼງທີ່ມາ:Khammouane News