ວິທະຍາໄລເຕັກນິກວິຊາຊີບແຂວງຫຼວງພະບາງ ປິດການຮຽນ-ການສອນ ປະຈໍາສົກຮຽນ 2019-2020

ວິທະຍາໄລເຕັກນິກວິຊາຊີບແຂວງຫຼວງພະບາງ ປິດການຮຽນ-ການສອນ ປະຈໍາສົກຮຽນ 2019-2020

September 7, 2020 0 By admin

ວັນທີ 7 ກັນຍາ 2020 ທີ່ວິທະຍາໄລເຕັກນິກວິຊາຊີບແຂວງຫຼວງພະບາງ ໄດ້ຈັດພິທີປິດການຮຽນ-ການສອນ ປະຈໍາສົກຮຽນ 2019-2020 ໂດຍມີທ່ານ ຊາຍສະຫວັນ ຈັນມານິດ ຮັກສາການຫົວໜ້າພະແນກສຶກສາທິການ ແລະກິລາແຂວງ,ມີຕາງໜ້າຈາກວິທະຍາໄລອ້ອມຂ້າງ,ແຂກຖືກເຊີນ ພ້ອມດ້ວຍຄູ-ອາຈານ ແລະ ນັກສຶກສາເຂົ້າຮ່ວມ.

ປີ 2019-2020 ວິທະຍາໄລ ເຕັກນິກວິຊາຊີບແຂວງຫຼວງພະບາງ ມີຄູ-ອາຈານ 133 ທ່ານ,ຍິງ 56 ທ່ານ,ນັກຮຽນທັງໝົດ 1.829 ຄົນ,ຍິງ 610 ຄົນ,ເຊິ່ງຫຼຸດຈາກປີຜ່ານມາ 389 ຄົນ,ໃນນີ້ຊັ້ນກາງລະບົບ 9+3ຈໍານວນ 487,ຍິງ 145 ຄົນ,ຊັ້ນກາງ 12+2 ຈໍານວນ 869 ຄົນ,ຍິງ 328 ຄົນ,ຊັ້ນສູງ ແລະ ຊັ້ນສູງຕໍ່ເນື່ອງ 473 ຄົນ,ຍິງ 137 ຄົນ ແລະ ຝຶກອົບຮົມລະດັບວິຊາຊີບ C1 ຈໍານວນ 50 ຄົນ,ຍິງ 41 ຄົນ.ແບ່ງອອກເປັນ 6 ພາກຄື: ພາກວິຊາອຸດສາຫະກໍາ,ເຕັກໂນໂລຊີໄຟຟ້າ,ບໍລິຫານໂຮງແຮມ ແລະ ທ່ອງທ່ຽວ,ກໍ່ສ້າງເຄຫະສະຖານ,ບໍລິຫານທຸລະກິດ ແລະ ສູນຝຶກການບໍລິການໂຮງແຮມ ແລະ ທ່ອງທ່ຽວ.ຜ່ານການຈັດຕັ້ງການຮຽນ-ການສອນໃນສົກ 2019-2020 ມີນັກສຶກສາເສັງເລື່ອນຊັ້ນທັງໝົດ 1.040ຄົນ,ຍິງ 343 ຄົນ,ສາມາດເສັງຜ່ານ 967 ຄົນ,ເສັງຈົບຊັ້ນປີສຸດທ້າຍທັງໝົດ 789 ຄົນ,ຍິງ 268 ຄົນ,ເສັງຜ່ານ 785 ຄົນ ແລະ ການຝຶກອົບຮົມມີ 194 ຄົນ,ຍິງ 124 ຄົນ.ຜ່ານຂະບວນການຮຽນ-ການສອນ ສາມາດຄັດເລືອກຄູ-ອາຈານ ໄດ້ຮັບໃບຍ້ອງຍໍຂັ້ນກະຊວງ 103 ທ່ານ,ຍິງ 45 ທ່ານ,ຍ້ອງຍໍຈາກວິທະຍາໄລ 30 ທ່ານ,ຍິງ 5 ທ່ານ ແລະ ນັກຮຽນດີເດັ່ນ ຈໍານວນ 185 ທ່ານ,ຍິງ 92 ທ່ານ,ໃນນີ້ດີເດັ່ນປະເພດ 1 ມີ 95 ຄົນ,ຍິງ 40 ຄົນ,ປະເພດ 2 ມີ 51 ຄົນ,ຍິງ 29 ຄົນ ແລະ ດີເດັ່ນປະເພດ 3 ມີ 39 ຄົນ,ຍິງ 23 ຄົນ.ໂດຍແມ່ນທ່ານ ບຸນປັນ ທໍາມະລັງກາ ຮັກສາການອໍານວຍການວິທະຍາໄລເຕັກນິກວິຊາຊີບແຂວງຫຼວງພະບາງ ເປັນຜູ້ມອບຢ່າງສົມກຽດ.

ໂອກາດດັ່ງກ່າວນີ້ທ່ານ ຊາຍສະຫວັນ ຈັນມານິດ ຮັກສາການຫົວໜ້າພະແນກສຶກສາທິການ ແລະກິລາແຂວງ ກໍໄດ້ກ່າວສະແດງຄວາມຊົມເຊີຍຕໍ່ຜົນການຮຽນ-ການສອນ ທີ່ວິທະຍາໄລຍາດມາໄດ້ ພ້ອມທັງເນັ້ນໃຫ້ນັກສຶກສາ ທີ່ຮຽນຈົບໃນແຕ່ລະຫຼັກສູດ,ແຕ່ລະສາຂາວິຊາ ຈົ່ງນໍາເອົາບົດຮຽນດັ່ງກ່າວໄປໝູນໃຊ້ເຂົ້າໃນຊີວິດປະຈໍາວັນໃນການປະກອບອາຊີບການງານຢ່າງສຸດຈະລິດ ແລະ ມີຜົນສໍາເລັດຕາມທີ່ຕົນເອງວາງໄວ້,ຕັ້ງໜ້າປະກອບສ່ວນພັດທະນາ ທ້ອງຖິ່ນ ແລະ ສັງຄົນຕາມຄວາມສາມາດຂອງຕົນ.
ຂ່າວ: ເພັດສາຄອນ ສິມມະວົງ