ເທັນນິສ Adrian Tour 2020 ກວດພົບນັກເທັນນິສ ຕິດເຊື້ອໂຄວິດ-19 ຄົນທີ 2

ເທັນນິສ Adrian Tour 2020 ກວດພົບນັກເທັນນິສ ຕິດເຊື້ອໂຄວິດ-19 ຄົນທີ 2

June 23, 2020 0 By admin

ບໍຣນ້າ ໂຄຣິກ ນັກເທັນນິສອັນດັບ 33 ຂອງໂລກ ໄວ 23 ປີ ຊາວໂຄຣເອເຊຍ ກາຍເປັນນັກເທັນນິສຊື່ດັງຂອງໂລກ ຄົນທີ 2 ກວດພົບຕິດເຊື້ອໂຄວິດ-19 ໃນລະຫວ່າງການເຂົ້າຮ່ວມແຂ່ງຂັນເທັນນິສ ລາຍການພິເສດ Adrian Tour 2020 ະໜາມທີ 2 ທີ່ຊາດ້າ ປະເທດໂຄຣເອເຊຍ, ທີ່ ໂນວັກ ໂຢໂຄວິກ ມື 1 ຂອງໂລກເປັນຜູ້ຈັດ ໃນວັນທີ 20-22 ມິຖຸນາຜ່ານມາ ຕໍ່ຈາກຈີກໍຣ ດີມີຕັອຟ ນັກເທັນນິສຊາວບຸນກາຣີ ອັນດັບ 19 ຂອງໂລກ.

ບໍຣນ້າ ໂຄຣິກ ເຂົ້າກວດເຊື້ອ ຫລັງຈາກ ຈີກໍຣ ດີມີຕັອຟ  ໄວ 29 ປີ ອະດີດມື 3 ຂອງໂລກ ແຂ່ງຂັນກັບຕົນສຳເລັດ ເມື່ອວັນທີ 20 ມິຖຸນາ ແລະ ຜົນອອກມາເປັນບວກ ມີເຊື້ອໂຄວິດ-19 ເຮັດໃຫ້ ບໍຣນ້າ ໂຄຣິກ ຮີບຟ້າວໂພສແຈ້ງທາງສື່ອອນລາຍ, ບອກຄົນໃກ້ຕົວ ແລະ ທຸກຄົນທີ່ສຳຜັດໃກ້ຊິດກັບຕົນ, ຂະນະນີ້ ບໍຣນ້າ ໂຄຣິກ ກຳລັງໄດ້ຮັບການປິ່ນປົວໂດຍດ່ວນ.

ນອກຈາກນີ້ ວິກເຕີ ທອຍກີ້ ຊາວແຊັກບີ້ ມື 184 ຂອງໂລກ ເຄີຍຂຶ້ນສູ່ອັນດັບທີ 12 ຂອງໂລກ ທີ່ເຂົ້າຮ່ວມລາຍການດຽວກັນ ກໍກວດພົບຕິດເຊື້ອໂຄວິດ-19 ສ່ວນຜູ້ອື່ນໆ ລວມທັງ ໂນວັກ ໂຢໂຄວິກ ກຳລັງລໍຖ້າຜົນ ແລະ ຕິດຕາມອາການ, ຂະນະທີ່ ອາເລັກຊານເດີ ຊະເວເຣຟ ມື 7 ຂອງໂລກຊາວເຢຍລະມັນ, ມາຣິນ ຊີລິກ ມື 37 ຂອງໂລກຊາວໂຄຣເອເຊຍ ແລະ ອັງເດຣ ຣູເບຟ ມື 14 ຂອງໂລກຊາວຣັດເຊຍ ກວດຄັ້ງທຳອິດບໍ່ພົບເຊື້ອ ແຕ່ຕ້ອງຈຳກັດບໍລິເວນຕົວເອງ 14 ວັນ ເພື່ອກວດເຊື້ອອີກຄັ້ງ.

ທາງດ້ານ ແດນ ອີແວ້ນ ມື 28 ຂອງໂລກຊາວສະຫະຣາຊອານາຈັກ ໃຫ້ທັດສະນະວ່າ: ” ຝ່າຍຈັດການແຂ່ງຂັນຕ້ອງຮັບຜິດຊອບຕໍ່ສິ່ງທີ່ເກີດຂຶ້ນ, ໂດຍສະເພາະ ການຈັດກຸ່ມສະເຫລີມສະຫລອງໃນລະຫວ່າງການແຂ່ງຂັນ ທີ່ຝືນມາດຕະການ, ຖືວ່າເປັນບົດຮຽນທີ່ສຳຄັນສຳລັບທຸກຄົນ ”.

ສຳລັບການແຂ່ງຂັນລາຍການນີ້ ໃນສະໜາມທີໜຶ່ງ ທີ່ນະຄອນຫລວງເບວເກດ ປະເທດແຊັກບີ້ ຝ່າຍຈັດງານໄດ້ອະນຸຍາດໃຫ້ຜູ້ຊົມເຂົ້າສະໜາມປະມານ 4000 ຄົນ ແລະ ຈັດງານປາຕີ້ແບບຝືນມາດຕະການ.

Photo: Adria Tour, Yahoo