ຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນຈັດກອງປະຊຸມປຶກສາຫາລືຄັ້ງທີ 8, ໜ້າວຽກກໍ່ສ້າງພື້ນຖານໂຄງລ່າງຄືບໜ້າເກືອບ90%

ຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນຈັດກອງປະຊຸມປຶກສາຫາລືຄັ້ງທີ 8, ໜ້າວຽກກໍ່ສ້າງພື້ນຖານໂຄງລ່າງຄືບໜ້າເກືອບ90%

June 23, 2020 0 By admin

ຂ່າວສານຫລວງພະບາງ Luangprabang News, ກະຊວງໂຍທາທິການ ແລະ ຂົນສົ່ງ ຈັດກອງປະຊຸມຄະນະຊີ້ນໍາໂຄງການກໍ່ສ້າງທາາງລົດໄຟລາວ-ຈີນ ຄັ້ງທີ 8 ໃນວັນທີ 22 ມິຖຸນາ 2020 ຢູ່ຫໍປະຊຸມໃຫຍ່ຫ້ອງວ່າການປົກຄອງແຂວງຫລວງພະບາງໂດຍການເປັນປະທານຂອງ ທ່ານ ປອ ບຸນທອງ ຈິດມະນີ ຮອງນາຍົກລັດຖະມົນຕີ, ຫົວຫນ້າຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນ, ທ່ານ ປອ. ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະຂົນສົງ, ຮອງຫົວຫນ້າຄະນະຊີ້ນໍາກໍ່ສ້າງທາງລົດໄຟລາວ-ຈີນ, ມີບັນດາຄະນະຄຸ້ມຄອງການກໍ່ສ້າງທາງລົດໄຟລາວ-ຈີນ, ກົມທາງລົດໄຟ, ລັດວິສາຫະກິດທາງລົດໄຟແຫ່ງຊາດລາວເຂົ້າຮ່ວມ.


ໃນກ້ອງປະຊຸມຄະນະຊີ້ນໍາໂຄງການກໍ່ສ້າງທາາງລົດໄຟລາວ-ຈີນ ຄັ້ງທີ 8 ນໍາໂດຍທ່ານ ປອ. ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະຂົນສົງໄດ້ລາຍງານກ່ຽວກັບຄວາມຄືບຫນ້າການຈັດຕັ້ງປະຕິບັດໂຄງການກໍ່ສ້າງທາງລົດໄຟລາວ-ຈີນ ມາເຖິງ ວັນທີ 31 ພຶດສະພາ 2020 ສໍາລັບວຽກທີ່ພົ້ນເດັ່ນຂອງບໍລິສັດຮັບເຫມົາກໍ່ສ້າງ, ຢູ່ບັນດາແຂວງ ແລະ ນະຄອນຫລວງວຽງຈັນມາຮອດປັດຈຸບັນປະຕິບັດສໍາເລັດ 89,43% ຂອງວຽກງານກໍ່ສ້າງພື້ນຖານໂຄງລ່າງທາງລົດໄຟທຽບໃສເດືອນ 4/2020 ເພີ່ມຂຶ້ນ 0,23%, ເຈາະອຸໂມງໃນຈໍານວນທັງຫມົດ 75 ອຸໂມງ, ເຊິ່ງເຈາະໄດ້ 223.600ແມັດ, ທຽບໃສ່ເດືອນ 4/2020 ເພີ່ມຂຶ້ນ 4.585 ແມັດໃນນີ້ເຈາະທະລຸແລ້ວ 65 ອຸໂມງ, ລົງມືກໍ່ສ້າງຂົວ 164 ແຫ່ງ ໃນຈໍານວນທັງຫມົດ.

ສໍາເລັດການວາງຂາງຂົວ 746 ຊ່ວງເສົາ, ກວມເອົາ 36,60% ຂອງການອອກແບບທັງຫມົດ, ການວາງລ່າງແມ່ນເລີ່ມແຕ່ບ້ານຫ້ວຍນໍ້າເຢັນ ເມືອງນາຊາຍທອງ ນະຄອນຫລວງວຽງຈັນ ຫາແຂວງຫລວງພະບາງສໍາເລັດ 49,7 ກິໂລແມັດຂອງຄວາມຍາວທັງຫມົດ 409 ກິໂລແມັດ.

ສໍາເລັດການປັກຂອບເຂດສະຖານີໂດຍສານໃນເນື້ອທີ 150 ເຮັກຕາ, ສໍາເລັດການປັກຫລັກຂອບເຂດສະຫງວນແລວທາງລົດໄຟຄວາມຍາວ 17 ກິໂລແມັດ, ປັກຫລັກຂອບເຂດສະຖານີສິນຄ້າວຽງຈັນໃຕ້ 3 ຈຸດ, ປັກສໍາເລັດແລ້ວ 2 ຈຸດຄື: ຈຸດສູນເຕັກນິກເນື້ອທີ່ 57,1 ເຮັກຕາ ແລະຈຸດສາງພັກສິນຄ້າເນື້ອທີ່ 50 ເຮັກຕາ, ສ່ວນຈຸດຄຽນສິນຄ້າກໍາລັງຢູ່ໃນຂັ້ນຕອນການອອກແບບ. ສໍາລັບໂຄງການກໍ່ສ້າງທາງລົດໄຟລາວ-ຈີນແມ່ນຈະໃຫ້ສໍາເລັດ 100% ໃນກາງປີ 2021.

.