ທ່ານ ບົວສອນ ບຸບຜາວັນ ອະດີດນາຍົກລັດຖະມົນຕີ  ທ່ຽວຊົມແຫຼ່ງທ່ອງທ່ຽວ ນໍ້າຕົກຕາດເຍືອງ ເມືອງປາກຊ່ອງ

ທ່ານ ບົວສອນ ບຸບຜາວັນ ອະດີດນາຍົກລັດຖະມົນຕີ ທ່ຽວຊົມແຫຼ່ງທ່ອງທ່ຽວ ນໍ້າຕົກຕາດເຍືອງ ເມືອງປາກຊ່ອງ

September 5, 2020 0 By admin

ວັນທີ 5 ກັນຍາ 2020 ທ່ານ ບົວສອນ ບຸບຜາວັນ ພ້ອມຄະນະ ທ່ານ ຮອງເຈົ້າແຂວງ ອັດຕະປື  ໄດ້ຢ້ຽມຢາມ ແຫຼ່ງທ່ອງທ່ຽວ ນໍ້າຕົກຕາດເຍືອງ  ເມືອງປາກຊ່ອງ ແຂວງຈຳປາສັກ.

ການຢ້ຽມຢາມຄັ້ງນີ້ ທ່ານໄດ້ຊົມກິດຈະກຳໃໝ່ ສິລະປະວັນນະຄະດີ ທີ່ຈັດສະແດງຂຶ້ນຢູ່ຕາດເຍືອງ ເພື່ອດຶງດູດນັກທ່ອງທ່ຽວ ໄດ້ຮຽນຮູ້ສິລະປະວັດທະນະທຳບັນດາເຜົ່າຂອງລາວ.

ແຫຼ່ງທ່ອງທ່ຽວທຳມະຊາດນໍ້າຕົກຕາດເຍືອງ ເມືອງປາກຊ່ອງ ແຂວງຈຳປາສັກ ໄດ້ເລີ່ມທົດລອງນຳເອົາສີລະປະ ແລະ ວັດທະນະທຳ ທີ່ເປັນເອກະລັກຂອງຊາດ, ຂອງເຜົ່າ ແລະ ທ້ອງຖິ່ນເຂົ້າມາສະແດງ ໃນວັນເສົາ ແລະ ວັນທິດ ເພື່ອເພີ່ມສີສັນໃຫ້ແກ່ການທ່ອງທ່ຽວ.

ຕາດເຍືອງ ກໍາເນີດຈາກສາຍຫ້ວຍບັງລຽງ ຕັ້ງຢູ່ໃນເຂດຮັບຜິດຊອບຂອງບ້ານຫຼັກ 40 ເມືອງປາກຊ່ອງ, ແຂວງຈໍາປາ
ສັກ ຫ່າງຈາກບ້ານ ໄປທາງທິດຕາເວັນຕົກສ່ຽງໃຕ້ ປະມານ 1,3 ກິໂລ ແມັດ, ຫ່າງຈາກຕົວເມືອງປາກຊ່ອງ ມາທາງທິດ
ຕາເວັນຕົກ 10 ກິ ໂລແມັດ, ສາມາດນຳໃຊ້ຍານພະຫະນະທຸກປະເພດ ເຂົ້າເຖິງສະຖານທີ່ຢ່າງສະດວກສະບາຍ.

ກ່ອນເອີ້ນວ່າ: “ຕາດເຍືອງ” ກໍ່ຍ້ອນວ່າ: ຄາວປູ່ເຍີ ຜູ້ພາອາໄສຢູ່ຖິ່ນຖານແຫ່ງນີ້ ເປັນບ່ອນດຳລົງຊິວິດ, ຊອກຢູ່ຫາກິນຕາມສາຍຫ້ວຍ ບັ້ງລຽງຍ່ານນີ້ ເຄີຍພົບເຫັນເຍືອງ 2 ໂຕ ຜົວເມຍອາໄສຢູ່ໃນຖ້ຳດ້ານລຸ່ມຕາດ ເພື່ອຊອກຫາຕາມພາສາຂອງສັດ ແລະ ດ້ານໜຶ່ງສາຍຫ້ວຍຍ່ານນີ້ມີ 3-4 ຕາດ ເພື່ອຄວາມຈື່ຈຳຂົງເຂດບໍລິເວນທຳມາຫາກິນ ເຂົາເຈົ້າໄດ້ໃສ່ຊື່ຕາດແຫ່ງນີ້ວ່າ: “ຕາດເຍືອງ” ມາເທົ່າທຸກວັນນີ້.

ຕາດເຍືອງຖືເປັນສະຖານທີ່ທ່ອງທ່ຽວສຳຄັນຂອງເມືອງປາກຊ່ອງ ທີ່ໄດ້ຮັບການພັດທະນາປັບປຸງໃຫ້ມີຄວາມສວຍງາມ ມີຄວາມຫຼາກຫລາຍຂອງກາກການບໍລິການ ທັງອາຫານ, ທີ່ພັກ ເຄື່ອງທີ່ລະນຶກ. ຫຼ້າສຸດແມ່ນນຳເອົາສິລະປະວັນນະຄະດີເຂົ້າມາສະແດງຕ້ອນຮັບແຂກຕື່ມອີກ.