ຫຼວງພະບາງ ມອບໂອນການຄຸ້ມຄອງອຸດໜູນບໍານານຜູ້ທີ່ຮັບໃຊ້ການປະຕິວັດຄືນໃຫ້ຕໍາຫຼວດແລະທະຫານ

ຫຼວງພະບາງ ມອບໂອນການຄຸ້ມຄອງອຸດໜູນບໍານານຜູ້ທີ່ຮັບໃຊ້ການປະຕິວັດຄືນໃຫ້ຕໍາຫຼວດແລະທະຫານ

June 23, 2020 0 By admin

ພິທີມອບ-ໂອນ ການຄຸ້ມຄອງນາຍ ແລະ ພົນທະຫານ-ນາຍ ແລະ ພົນຕໍາຫຼວດ ທີ່ໄດ້ຮັບນະໂຍບາຍອອກພັກການ-ຮັບອຸດໜູນບໍານານ ແລະ ເສຍອົງຄະ ຍ້ອນການສູ້ຮົບ ແລະ ຮັບໃຊ້ການສູ້ຮົບ ໄດ້ຈັດຂື້ນວັນທີ 19 ມິຖຸນາ 2020 ທີ່ພະແນກແຮງງານສະຫວັດດີການສັງຄົມແຂວງຫຼວງພະບາງ ໂດຍການເປັນປະທານຂອງທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ,ມີທ່ານ ສົມຈັນ ແກ້ວຈັນດາ ຫົວໜ້າກອງບັນຊາການ ປກສແຂວງ ,ຕາງໜ້າກອງບັນຊາການ ປກຊແຂວງ,ແຂກຮັບເຊີນ ແລະ ພະນັກງານຂະແໜງແຮງງານສະຫວັດດີການສັງຄົມເຂົ້າຮ່ວມ.


ໃນພິທີໄດ້ຜ່ານຂໍ້ຕົກລົງວ່າດ້ວຍການມອບ-ໂອນການຄຸ້ມຄອງນາຍ ແລະ ພົນທະຫານ-ນາຍ ແລະ ພົນຕໍາຫຼວດ ທີ່ໄດ້ຮັບນະໂຍບາຍອອກພັກການ-ຮັບອຸດໜູນບໍານານ ແລະ ເສຍອົງຄະ ຍ້ອນການສູ້ຮົບ ແລະ ຮັບໃຊ້ການສູ້ຮົບ ຂອງກະຊວງແຮງງານ ແລະ ສະຫວັດດີການສັງຄົມ ແລະ ຂໍ້ຕົກລົງຂອງເຈົ້າແຂວງຫຼວງພະບາງ ວ່າດ້ວຍການອານຸມັດໃຫ້ພະແນກແຮງງານສະຫວັດດີການສັງຄົມແຂວງ ຈັດພິທີມອບ-ໂອນການຄຸ້ມຄອງນາຍ ແລະ ພົນທະຫານ-ນາຍ ແລະ ພົນຕໍາຫຼວດ ທີ່ໄດ້ຮັບນະໂຍບາຍອອກພັກການ-ຮັບອຸດໜູນບໍານານ ແລະ ເສຍອົງຄະ ຍ້ອນການສູ້ຮົບ ແລະ ຮັບໃຊ້ການສູ້ຮົບ ຢ່າງເປັນທາງການ. ເຊິ່ງໄລະຍະຜ່ານມາພະແນກແຮງງານ ແລະ ສະຫວັດດີການສັງຄົມຄຸ້ມຄອງມີ 3 ສູນເສຍອົງຄະທົ່ວແຂວງຄື: ສູນເສຍອົງຄະ 19 ເມືອງງອຍ ມີ 103 ຄົນ,ຍິງ 62 ຄົນ,ສູນເສຍອົງຄະ 598 ເມືອງງນານ ມີ 58 ຄົນ ຍິງ 4 ຄົນ ແລະ ສູນເສຍອົງຄະ 18 ບ້ານປາກເຊືອງ ມີ 21 ຄົນ ຍິງ 10 ຄົນ.


ສໍາລັບນາຍ ແລະ ພົນທະຫານ,ນາຍ ແລະ ພົນຕໍາຫຼວດ ບຳນານ-ເສຍອົງຄະ ຍ້ອນການສູ້ຮົບ ແລະ ຮັບໃຊ້ການສູ້ຮົບ ພ້ອມດ້ວຍຜູ້ອຸດໜູນສະມາຊິກຄອບຄົວ 342 ຄົນ,ຢູ່ສູນເສຍອົງຄະ 3 ແຫ່ງ 104 ຄົນ,ລູກພະນັກງານບຳນານ ແລະ ເສຍອົງຄະ ທີຍັງບໍ່ພົ້ນກະສຽນ 55 ຄົນ,ລູກພະນັກງານບຳນານ ແລະ ເສຍອົງຄະຢູ່ 3 ສູນ ຍັງບໍ່ພົ້ນກະສຽນ 72 ຄົນ. ຜູ້ເກີດສິດປິນປົວສຸຂະພາບ ລວມທັງຜູ້ໄດ້ຮັບອຸດໜູນໄລຍະຍາວ,ຄູ່ສົມລົດ ແລະ ລູກພະນັກງານບຳນານ ແລະ ເສຍອົງຄະ ທີ່ຍັງບໍ່ພົ້ນກະສຽນ 127 ຄົນ, ພະນັກງານບຳນານ-ສູນເສຍອົງຄະ ລວມທັງສູນເສຍອົງຄະທົ່ວແຂວງມີທັງໝົດ 573 ຄົນ.


ຈາກນັ້ນພິທີໄດ້ມີການເຊັນບົດບັນທຶກມອບ-ໂອນ ການຄຸ້ມຄອງນາຍ ແລະ ພົນທະຫານ-ນາຍ ແລະ ພົນຕໍາຫຼວດ ທີ່ໄດ້ຮັບນະໂຍບາຍອອກພັກການ-ຮັບອຸດໜູນບໍານານ ແລະ ເສຍອົງຄະ ຍ້ອນການສູ້ຮົບ ແລະ ຮັບໃຊ້ການສູ້ຮົບ ລະຫວ່າງ ພະແນກແຮງງານ ແລະ ສຫວັດດີການສັງຄົມແຂວງ ກັບ ກອງບັນຊາການທະຫານແຂວງ ແລະ ກອງບັນຊາການປ້ອງກັນຄວາມສະຫງົບແຂວງ ໂດຍມີທ່ານເຈົ້າແຂວງ ແລະ ຜູ້ເຂົ້າຮ່ວມເປັນສັກຂີພະຍານ.


ໂອກາດດັ່ງກ່າວທ່ານ ຄໍາຂັນ ຈັນທະວີສຸກ ກໍ່ໄດ້ເນັ້ນ ໃຫ້ວຽກງານ ປກສ ແລະ ປກຊ ເອົາໃຈໃສ່ເປັນເຈົ້າການຄຸ້ມຄອງປະຕິບັດຕາມນະໂຍບາຍດ້ານຕ່າງໆ ໃນຖືກຕ້ອງ ແລະ ສອດຄ່ອງຕາມລະບຽບກົດໝາຍວາງອອກ. ປະສານສົມກັບພາກສ່ວນທີ່ກ່ຽວຂ້ອງ ໃນການລົງໂຄສະນາເຜີຍແຜ່ ລະບຽບການ, ກົດໝາຍ ແລະ ນິຕິກຳຕ່າງໆ ໃຫ້ພະນັກງານບຳນານ-ເສຍອົງຄະ ໄດ້ຮັບຮູ້ເຂົ້າໃຈຕໍ່ແນວທາງການປ່ຽນແປງໃໝ່ ເພື່ອໃຫ້ເຂົ້າເຈົ້າໄດ້ປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ສ້າງພັດທະນາປະເທດຊາດ ເວົ້າລວມເວົ້າສະເພາະ ກໍ່ຄືການປະກອບສ່ວນເຂົ້າໃນການພັດທະນາເສດຖະ ກິດ-ສັງຄົມ ຂອງແຂວງຫຼວງພະບາງ ນັບມື້ໃຫ້ມີການພັດທະນາດີຂື້ນເປັນກ້າວໆ.

ຂ່າວ: ເພັດສາຄອນ ສິມມະວົງ