ເສັ້ນທາງສາຍຫຼັກ ໃຈກາງນະຄອນຫຼວງວຽງຈັນ ແລະ ສວນປະຕູໄຊ ຈະຖືກປັບປຸງໃຫ້ມີຄວາມງາມ ກຽມໃສ່ສະຫຼອງວັນຊາດຄົບຮອບ45ປີ

ເສັ້ນທາງສາຍຫຼັກ ໃຈກາງນະຄອນຫຼວງວຽງຈັນ ແລະ ສວນປະຕູໄຊ ຈະຖືກປັບປຸງໃຫ້ມີຄວາມງາມ ກຽມໃສ່ສະຫຼອງວັນຊາດຄົບຮອບ45ປີ

September 5, 2020 0 By admin

ເສັ້ນທາງສາຍຫຼັກ ໃຈກາງນະຄອນຫຼວງວຽງຈັນ ແລະ ສວນສາທາລະນະ ປະຕູໄຊ ຈະໄດ້ຮັບການປັບປູງໃໝ່ ໃຫ້ມີຄວາມສະຫວ່າງສະໄຫວສວຍງາມຂຶ້ນ ພາຍຫລັງໄດ້ຮັບທຶນການຊ່ວຍເຫຼືອລ້າຈາກລັດຖະບານ ສປ ຈີນ  ມູນຄ່າ 87, 5 ລ້ານຢວນ ໂດຍຈະເລີ່ມລົງມືປັບປຸງໃນກາງເດືອນກັນຍານີ້ ແລະ ໃຫ້ແລ້ວທັນສະເຫລີມສະຫຼອງວັນຊາດສປປລາວ ຄົບຮອບ45ປີ.

ທ່ານ ຊົງເລົາ ຢົງນູ ຫົວໜ້າພະລັງງານ ແລະ ບໍ່ແຮ່ ນະຄອນຫຼວງວຽງຈັນ (ນວ)ໃຫ້ສຳພາດຕໍ່ໜັງສືພິມວຽງຈັນໃໝ່ ເມື່ອມໍ່ໆມານີ້ວ່າ: ການຈັດຕັ້ງປະຕິບັດໂຄງການໄຟເຍືອງທາງໃນ ນວ ທີ່ໄດ້ຮັບການຊ່ວຍລ້າຈາກລັດຖະບານ ສປ ຈີນ ໂດຍອີງໃສ່ສັນຍາຮ່ວມມືດ້ານເສດຖະກິດ ເຕັກນິກ ລະຫວ່າງລັດຖະບານ ສປປ ລາວ ແລະ ສປ ຈີນ ວ່າ ດ້ວຍການສະຫນອງການຊ່ວຍເຫຼືອລ້າຈໍານວນ 1 ຕື້ ຢວນ ເພື່ອນໍາໃຊ້ເຂົ້າໃນການພັດທະນາລະບົບແສງ ສະຫວ່າງໃນ ນວ.

ໃນປີ 2016-2017 ທ່ານເຈົ້າຄອງ ນວ ໄດ້ຊີ້ນໍາພະ ແນກພະລັງງານ ແລະ ບໍ່ແຮ່ ນວ ສ້າງແຜນໂຄງການ ກ່ຽວກັບການຄົ້ນຄວ້າ ການປະຕິຮູບລະບົບໄຟເຍືອງ ທາງແສງສະຫວ່າງສາທາລະນະຢູ່ ນວ ດັ່ງນັ້ນ ຈຶ່ງໄດ້ ສຶກສາສໍາຫຼວດວຽກງານດັ່ງກ່າວສໍາເລັດໃນທ້າຍປີ 2017 ມາຮອດປີ 2018 ໄດ້ຂຽນບົດເພື່ອຊອກຫາ ແຫຼ່ງທຶນມາພັດທະນາ ຫຼັງຈາກສໍາເລັດໂຄງການ ຄົ້ນຄວ້າ ການປະຕິຮູບລະບົບໄຟແສງສະຫວ່າງ ສາທາລະນະໃນ ນວ ພະແນກພະລັງງານ ແລະ ບໍ່ແຮ່ ນວ ໄດ້ຂຽນບົດສະເຫນີໂຄງການຂໍການຊ່ວຍເຫຼືອ ຈາກລັດຖະບານ ສປ ຈີນ ແລະ ໄດ້ຮັບການຕອບຮັບ ໃນທ້າຍປີ 2012 ມູນຄ່າ 300 ລ້ານຢວນ ເພື່ອ ໂຄງການຍົກລະດັບລະບົບໄຟຟ້າເຂດຊານເມືອງ ແລະ ສ່ວນຫນຶ່ງໃນເຂດຕົວເມືອງຢູ່ ນວ ເຊິ່ງຝ່າຍຈີນ ໄດ້ສົ່ງທີມງານວິຊາການ ເຂົ້າມາກວດກາພາກ ສະຫນາມຂອງໂຄງການຮ່ວມກັບຝ່າຍລາວ ນໍາໂດຍ ພະແນກພະລັງງານ ແລະ ບໍ່ແຮ່ ຮ່ວມກັບບັນດາ ພະແນກການ ເມືອງຕ່າງໆໃນລະຫວ່າງເດືອນເມສາ ຫາພຶດສະພາ 2019.

ມາຮອດເດືອນພຶດສະພາ 2020 ທາງການຈຶ່ງໄດ້ຮັບ ແຈ້ງການຊ່ວຍເຫຼືອໄລຍະທີ 1 ໃນ 2 ຫນ້າວຽກ ມູນ ຄ່າ 87,5 ລ້ານຢວນ ສຸມໃສ່ການປັບປຸງລະບົບນໍ້າພຸ ລະບົບໄຟເຍືອງສວນປະຕູໄຊ ແລະ ຍົກລະດັບລະບົບໄຟເຍືອງທາງໃນ 7 ເສັ້ນທາງເຂດໃຈກາງ ເມືອງຂອງ ນວ ປະກອບມີ:

1.ຖະຫນົນລ້ານຊ້າງ ຍາວ 999 ແມັດ; 2.ຖະຫນົນ 23 ສິງຫາ ແຕ່ປະຕູໄຊຫາວົງວຽນນ້ອຍ ຂ້າງເດີນທາດຫຼວງ; 3.ຖະຫນົນຫນອງບອນ ແຕ່ 4 ໄຟອໍານາດຫນອງບອນ ຫາຖະຫນົນ 23 ສິງຫາ ໄປຫາວົງວຽນ 450 ປີ; 4.ຖະຫນົນໄກສອນພົມວິຫານ ແຕ່ວົງວຽນ 450 ປີ ກັບມາຮອດສວນປະຕູໄຊ;

5.ຖະຫນົນມະໂຫສົດ ແຕ່ 3 ແຍກຫໍຄໍາ ຫາໂຮງຫມໍ ມະໂຫສົດ ຫາ 3 ແຍກຕາຝັ່ງເຈື່ອນແຄມຂອງ; 6.ຖະຫນົນຕາຝັ່ງເຈື່ອນ ແຕ່ 3 ແຍກຂ້າງສວນເຈົ້າ ອະນຸວົງ ຫາວົງວຽນປາກປາສັກ; 7.ຖະຫນົນເສດຖາທິລາດ ແຕ່ວົງວຽນປາກປ່າສັກ ຫາ 4 ແຍກມະໂຫສົດ.

ໃນຈໍານວນ 7 ເສັ້ນທາງນີ້ ນັບແຕ່ເສັ້ນທາງເບີ 1 ຫາ ເບີ 5 ຈະໄດ້ປັບປຸງລະບົບດ້ວຍການປ່ຽນລະບົບໄຟ ເຍືອງທາງໃຫມ່ ແລະ ຈະເອົາລະບົບສາຍໄຟເຍືອງ ທາງລົງໃຕ້ດິນ ສ່ວນເສັ້ນທາງເບີ 6 ແລະ ເບີ 7 ຈະ ປັບປຸງໂດຍໃຊ້ລະບົບສາຍໄຟເກົ່າ.

ໂຄງການດັ່ງກ່າວ ຈະຕ້ອງເຮັດໃຫ້ສໍາເລັດລະບົບນໍ້າພຸ ສວນປະຕູໄຊ ເສັ້ນທາງເບີ 1 ແລະ ເບີ 4 ຊ່ວງວົງວຽນ 450 ປີ ຫາ ປະຕູໄຊ ເພື່ອຄໍານັບຮັບຕ້ອນວັນຊາດທີ 2 ທັນວາ ຄົບຮອບ 45 ປີ ຄາດວ່າຈະເລີ່ມຈັດຕັ້ງປະຕິບັດວຽກນັບແຕ່ກາງເດືອນກັນຍາເປັນຕົ້ນໄປ.

ແຫຼງທີ່ມາ: ໜັງສືພິມວຽງຈັນໃໝ່