ເຊວຊີ ຈ່າຍ 71 ລ້ານປອນ! ໄດ້ ຄາຍ ຮາແວັດ ເສີມທັບຄົນທີ 5 ກ່ອນເລີ່ມລະດູການໃຫມ່!!

ເຊວຊີ ຈ່າຍ 71 ລ້ານປອນ! ໄດ້ ຄາຍ ຮາແວັດ ເສີມທັບຄົນທີ 5 ກ່ອນເລີ່ມລະດູການໃຫມ່!!

September 5, 2020 0 By admin

ສິງຟ້າ ເຊວຊີ ທີມຊັ້ນນຳໃນ ພຣີເມ່ຍລີກ ອັງກິດ ສືບຕໍ່ເສີມທັບຢ່າງຕໍ່ເນື່ອງ ຫລ້າສຸດ ອອກມາຢືນຢັນໄດ້ ຄາຍ ຮາແວັດ ກອງກາງດາວເດັ່ນ ໄວ 21 ປີ ຊາວເຢຍລະມັນຂອງສະໂມສອນ ໄບເອີ ເລເວີຄູເຊັນ ມູນຄ່າ 71 ລ້ານປອນ ເຊັນສັນຍາ 5 ປີ ເປັນສະຖິຕິແພງສຸດອັນດັບສອງຂອງສະໂມສອນ ຮອງຈາກ ເກປາ ຜູ້ຮັກສາປະຕູຊາວແອັສປາຍ ທີ່ຊື້ມາຈາກ ແອັດເລຕິກ ບິວເບົາ 71.6 ລ້ານປອນ ໃນປີ 2018.

ເຊວຊີ ຍັງຈະຈ່າຍເພີ່ມອີກຈຳນວນໜຶ່ງ ຖ້າ ຄາຍ ຮາແວັດ ສາມາດຊ່ວຍ ເຊວຊີ ຄວ້າແຊ້ມ ຫລື ຜົນງານດີ, ຮາແວັດ ຈະກາຍເປັນນັກເຕະຄົນທີ 5 ທີ່ເຊວຊີ ຊື້ມາເສີມທັບຊຸດໃຫຍ່ກ່ອນເລີ່ມລະດູການໃຫມ່ ຕໍ່ຈາກ: ຮາຄິມ ຊີເຢັກ ປີກຊາວໂມຣັອກໂຄຈາກ ອາແຈັກ 36 ລ້ານປອນ, ຕີໂມ ແວເນີ້ ກອງໜ້າຊາວເຢຍລະມັນຈາກ ອາຣແບ ໄລຊິກ 47.7 ລ້ານປອນ, ເບັນ ຊິວເວວ ກອງຫລັງຊາວອັງກິດຈາກ ເລັສເຕີ ຊິຕີ້ 45 ລ້ານປອນ, ມາລາງ ຊາຣ ກອງຫລັງຊາວຝຣັ່ງເຊື້ອສາຍເຊເນການຈາກ ນິດຊ໌ ແລະ ເຕຍໂກ້ ຊິນວາ ກອງຫລັງຊາວເບຣຊິນຈາກ PSG ໄດ້ມາຟຣີ ເພາະໝົດສັນຍາກັບສັງກັດເກົ່າ. ນັ້ນໝາຍວ່າ: ເຊວຊີ ກາຍເປັນທີມທີ່ໃຊ້ເງິນຊື້ນັກເຕະໄປຫລາຍສຸດໃນໂລກໃນໄລຍະນີ້ ລວມ 199.7 ລ້ານປອນ.

ຄາຍ ຮາແວັດ ເປັນນັກເຕະທີ່ຫລາຍທີມໃຫຍ່ຕ້ອງການ ເພາະຜົນງານເດັ່ນກັບ ເລເວີຄູເຊັນ ໃນສອງລະດູການຫລັງສຸດ ລົງຫລິ້ນ 87 ນັດ ຍິງ 38 ປະຕູ ສະເພາະລະດູການຜ່ານມາ ລົງຫລິ້ນ 45 ນັດ ຍິງ 18 ປະຕູ.

Photo: Bayer 04 Leverkusen, Chelsea Football Club