ດ່ານສາກົນ ຂົວມິດຕະພາບ ລາວ-ໄທ ແຫ່ງ ທີ 2 ສະຫວັນນະເຂດ – ມຸກດາຫານ ສຶບຕໍ່ປະຕິບັດມາດຕະການປ້ອງພະຍາດໂຄວິດ-19

ດ່ານສາກົນ ຂົວມິດຕະພາບ ລາວ-ໄທ ແຫ່ງ ທີ 2 ສະຫວັນນະເຂດ – ມຸກດາຫານ ສຶບຕໍ່ປະຕິບັດມາດຕະການປ້ອງພະຍາດໂຄວິດ-19

September 4, 2020 0 By admin

ວິທະຍຸກະຈາຍສຽງ ສະຫວັນນະເຂດ, ໂດຍປະຕິບັດຕາມ ແຈ້ງການ ຂອງກອງບັນຊາການ ປກສ ແຂວງສະຫວັນນະເຂດ ສະບັບເລກທີ 176/ປກສ.ສຂ ລົງວັນທີ 10 ສິງຫາ 2020 ເລື່ອງ : ເພີ່ມທະວີການຈັດຕັ້ງປະຕິບັດ ມາດຕະການຜ່ອນຜັນ ເພື່ອປ້ອງກັນ, ຄວບຄຸມ ສະກັດກັ້ນ ການແຜ່ລະບາດຂອງພະຍາດ ໂຄວິດ -19 ໃນປະຈຸບັນບັນດາປະເທດເພື່ອນມິດສາກົນ ພວມປະເຊີນໜ້າກັບການແຜ່ລະບາດຂອງພະຍາດ ໂຄວິດ-19 ອີກຄັ້ງໃໝ່ ໂດຍສະເພາະປະເທດເພື່ອນບ້ານໃກ້ຄຽງ ກໍ່ມີໂຕເລກຜູ້ຕິດເຊື້ອພະຍາດເພີ່ມຂື້ນ ເພື່ອເປັນເຈົ້າການ ປະກອບສ່ວນໃນການຕ້ານ ການແຜ່ລະບາດຂອງເຊື້ອພະຍາດໂຄວິດ -19 ກຳລັງປ້ອງກັນຄວາມສະຫງົບ ແຂວງສະຫວັນນະເຂດ ໄດ້ ເພີ່ມທະວີການຈັດຕັ້ງປະຕິບັດ ມາດຕະການຜ່ອນຜັນ ເພື່ອປ້ອງກັນ, ຄວບຄຸມ ສະກັດກັ້ນ ການແຜ່ລະບາດຂອງພະຍາດ ໂຄວິດ -19 ຢ່າງເຂັ້ມງວດ.

ໂດຍສະເພາະ ຫ້ອງສັນຕິບານ ປກສ ແຂວງ ເປັນເຈົ້າການ ເພີ່ມທະວີການຊີ້ນຳ-ນຳພາ ກຳລັງວິຊາສະເພາະ ເຂັ້ມງວດ ຕິດຕາມກວດກາ ຄົນເຂົ້າ-ອອກເມືອງ ຕາມປະຕູດ່ານ ພ້ອມກັນນັ້ນກໍ່ໄດ້ມີການປະສານສົມທົບ ກັບ ກຳລັງ ປ້ອງກັນຊາດ ເຄື່ອນໄຫວ ກວດກາລາດຕະເວນຂອບເຂດຊາຍແດນ ສະກັດກັ້ນການລັກລອບ ເຂົ້າ-ອອກເມືອງ ແບບບໍ່ຖືກຕ້ອງ ກໍລະນີພົບເຫັນມີການລະເມີດແມ່ນຈະໄດ້ນຳຕົວໄປກວດຫາເຊື້ອ ພ້ອມທັງ ດຳເນີນມາດຕະການຕາມຂັ້ນຕອນຂອງກົດໝາຍ.


ສະເພາະສະຫວັນນະເຂດ ທີ່ດ່ານສາກົນຂົວມິດຕະພາບ2 ໃນໄລຍະ ເດືອນສິງຫາ ເຖິງ ກັນຍາ 2020 ແມ່ນ ມີແຮງງານລາວ ກັບມາຈາກປະເທດໄທ ທັງໝົດ 1.035 ຄົນ, ຍິງ 475 ຄົນ, ເດັກ 28 ຄົນ ດ່ານສາກົນຂົວມິດຕະພາບ ໄດ້ເອົາໃຈໃສ່, ຄວບຄຸມ ສະກັດກັ້ນ ການແຜ່ລະບາດຂອງພະຍາດ ໂຄວິດໂຄວິດ -19 ຢ່າງເຂັ້ມງວດ ເປັນຕົ້ນແມ່ນ ຊີດນ້ຳຢາຂ້າເຊື້ອ ທີ່ແຮງງານລາວນຳມາ, ໃສ່ຜ້າອັດປາກ-ອັດດັງ, ໃຫ້ລ້າງມືດ້ວຍເຈວ ຫຼື ເຫຼົ້າ 90, ການສະແກນວັດແທກອຸນຫະພູມ, ມີການສຳພາດເອົາຂໍ້ມູນ ເພື່ອຂື້ນບັນຊີແຈ້ງ ແລະ ສົ່ງໜ່ວຍສະເພາະກິດຂອງແຂວງ ທີ່ສູນກັກກັນ ເດິ່ນບານຫຼັກ4 ເພື່ອແຍກກັກຕົວ 14 ວັນ ເພື່ອປະຕິບັດຕາມຂັ້ນຕອນມາດຕະການປ້ອງກັນເຊື້ອພະຍາດຕໍ່ໄປ,

ສຳລັບລົດບັນທຸກສິນຄ້າລະຫວ່າງປະເທດ ແມ່ນໄດ້ປະຕິບັດເຊັ່ນດຽວກັນກັບພາກສ່ວນອື່ນໆທີ່ເດິນທາງຂ້າມດ່ານດັ່ງກ່າວ ໂດຍໃຫ້ຄົນຂັບ ແລະ ຜູ້ທີ່ໂດຍສານມາກັບລົດບັນທຸກ ທຸກຄົນຕ້ອງໄດ້ ປະຕິບັດຕາມມາດຕະການປ້ອງກັນຄວບຄຸມການແຜ່ລະບາດຂອງເຊື້ອພະຍາດຢ່າງເຂັ່ມງວດກ່ອນຈື່ງອະນຸຍາດໃຫ້ຜ່ານໄດ້, ສຳລັບແຮງງານລາວ ແລະ ປະຊົນລາວທີ່ຕ້ອງການກັບລາວ ຜ່ານດ່ານສາກົນຂົວມິດຕະພາບ2ແມ່ນສາມາດ ມາໄດ້ແຕ່ຕ້ອງປະຕິບັດຕາມມາດຕະການປ້ອງກັນຄວບຄຸມການແຜ່ລະບາດຂອງພະຍາດ -19 ໂຄວິດຢ່າງເຂັ້ມງວດ, ສ່ວນຜູ້ມີຄວາມຈຳເປັນທີ່ຈະຂ້າມໄປປະເທດໄທ ແມ່ນຕ້ອງໄດ້ຮັບການອະນຸຍາດຈາກທາງການໄທກ່ອນ.