ສາລະວັນ ທໍາລາຍສິນຄ້າໝົດອາຍຸ ເສື່ອມຄຸນ ລວມມູນຄ່າ 33 ລ້ານກວ່າກີບ

ສາລະວັນ ທໍາລາຍສິນຄ້າໝົດອາຍຸ ເສື່ອມຄຸນ ລວມມູນຄ່າ 33 ລ້ານກວ່າກີບ

September 3, 2020 0 By admin

ຂປລ. ແຫລ່ງຂ່າວຈາກແຂວງສາລະວັນ ໃຫ້ຮູ້ວ່າ: ໃນວັນທີ 1 ກັນຍາ ຜ່ານມາ, ຫ້ອງການສາທາລະນະສຸກ ເມືອງສາລະວັນ ສົມທົບກັບ ຂະແໜງອາຫານ ແລະ ຢາແຂວງ ແລະ ຄະນະກໍາມະການກວດກາອາຫານ ແລະ ເຄື່ອງດື່ມຂັ້ນເມືອງ ຈັດພິທີຈູດທໍາລາຍສິນຄ້າເສື່ອມຄຸນນະພາບ, ໝົດອາຍຸ ແລະ ສິນຄ້າເກືອດຫ້າມ 326 ລາຍການ ລວມມູນຄ່າ 33 ລ້ານກວ່າກີບ.

ທັງນີ້ ກໍເພື່ອເປັນການປູກຈິດສໍານຶກໃຫ້ຜູ້ບໍລິໂພກ, ຜູ້ຊື້ ແລະ ຜູ້ຂາຍ ມີຄວາມເຂົ້າໃຈກ່ອນຈະບໍລິໂພກສິນຄ້າ ຕ້ອງເບິ່ງອາຍຸການນໍາໃຊ້, ຜູ້ປະກອບການຕ້ອງມີຈັນຍາບັນ ປະຕິບັດຕາມຂໍ້ກໍານົດ, ລະບຽບກົດໝາຍ, ທັງເປັນການປົກປ້ອງບັນດາຫົວໜ່ວຍທຸລະກິດ-ການຄ້າ ເຄື່ອນໄຫວຢ່າງຖືກຕ້ອງຕາມລະບຽບການ.


ທ່ານ ດຣ ວິໄລສັກ ໄຊຍະເສນ ຫົວໜ້າຂະແໜງອາຫານ ແລະ ຢາ ໄດ້ໃຫ້ຮູ້ວ່າ: ສິນຄ້າເສື່ອມຄຸນນະພາບ, ໝົດອາຍຸ ແລະ ສິນຄ້າເກືອດ ທີ່ນຳມາທຳລາຍໃນມື້ນີ້ ແມ່ນເຈົ້າໜ້າທີ່ກ່ຽວຂ້ອງໄດ້ລົງກວດກາ ຈຸດຕະຫລາດ ແລະ ຮ້ານແຄມທາງ ທີ່ຂຶ້ນກັບເມືອງສາລະວັນ ແຕ່ວັນທີ 25-28 ສິງຫາ ຜ່ານມາ ແລະ ສາມາດກວດກາຮ້ານຂາຍເຄື່ອງອຸປະໂພກ ແລະ ບໍລິໂພກ ທັງໝົດໄດ້ 139 ຮ້ານ, ກວດພົບສິນຄ້າທີ່ໝົດອາຍຸນໍາໃຊ້-ເສຍຄຸນ ຈໍານວນ 59 ຮ້ານ, ລວມມີ 326 ລາຍການ (ລວມແຕ່ລະຮ້ານ), ໃນນັ້ນອາຫານ ແລະ ເຄື່ອງດື່ມທີ່ໝົດອາຍຸມີ 305 ລາຍການ ແລະ ເຄື່ອງສໍາອາງໝົດອາຍຸ 21 ລາຍການ.

ໂດຍ: ກິນດາວັນ