4 ປີ  ສປປລາວ ສົ່ງອອກກາເຟໄດ້ 146.000 ໂຕນ ມູນຄ່າຫຼາຍກ່າວ300 ລ້ານໂດລາ

4 ປີ  ສປປລາວ ສົ່ງອອກກາເຟໄດ້ 146.000 ໂຕນ ມູນຄ່າຫຼາຍກ່າວ300 ລ້ານໂດລາ

September 3, 2020 0 By admin

ສະມາຄົມກາເຟລາວໄດ້ເປີດກອງປະຊຸມໃຫຍ່ຄັ້ງທີ VIII ຂຶ້ນຢ່າງເປັນທາງການ ໃນຕອນບ່າຍວັນທີ 28 ສິງຫາ 2020 ນີ້ ທີ່ໂຮງແຮມຈໍາປາສັກແກຣນ ນະຄອນປາກເຊ ແຂວງຈໍາປາສັກເພື່ອຕີລາຄາວຽກງານຮອບດ້ານ ແລະ ປັບປຸງການຈັດຕັ້ງຂອງສະມາຄົມກາເຟລາວຊຸດໃໝ່ .ໃຫ້ກຽດເຂົ້າຮ່ວມກອງປະຊຸມໃຫຍ່ໃນຄັ້ງນີ້ມີ ທ່ານ ຄໍາມູນ ວິພົງໄຊ ຮອງລັດຖະມົນຕີກະຊວງພາຍໃນ,ທ່ານ ມະໄລທອງ ກົມມະສິດ ຮອງເຈົ້າແຂວງໆຈໍາປາສັກ,ມີຫົວໜ້າພະແນກການກ່ຽວຂ້ອງ,ປະທານ,ຮອງປະທານ,ຄະນະບໍລິຫານງານ ແລະສະມາຊິກສະມາຄົມກາເຟລາວເຂົ້າຮ່ວມ.


ໃນກອງປະຊຸມທ່ານ ນາງ ບຸນເຮືອງ ແຄຣໍລິດດັງ ປະທານສະມາຄົມກາເຟລາວ ໄດ້ກ່າວໄຂກອງປະຊຸມ ແລະ ຜ່ານບົດລາຍງານສະພາບການປະຕິບັດວຽກງານຮອບດ້ານຂອງສະມາຄົມກາເຟລາວ ຕະຫຼອດໄລຍະ 4 ປີ ກ່ວານັບແຕ່ປີ 2016 ຫາ ເດືອນມິຖຸນາ ປີ2020 ທີ່ຜ່ານມາ, ຊຶ່ງຍົກໃຫ້ເຫັນຜົນສໍາເລັດໃນການຈັດງານບຸນມະໂຫລານກາເຟລາວປີ 2018 ຜ່ານມາ ທີ່ນະຄອນວຽງຈັນ ໃນ 3 ກິດຈະກໍາຫຼັກຄື: ງານວາງສະແດງສິນຄ້າ,ງານສໍາມະນາດ້ານເຕັກນິກຂອງການພັດທະນາກາເຟ,ການແຂ່ງຂັນສີມືຂອງການຊົງກາເຟ ອັນໄດ້ເປັນການໂຄສະນາ,ເອກອ້າງຜະລິດຕະພັນສິນຄ້າກາເຟທີ່ແປຮູບໄດ້ຫຼາກຫຼາຍ ສູ່ສາຍຕາສັງຄົມ ແລະ ຊອກຕະຫຼາດຈໍາໜ່າຍ,ເພີ່ມລາຍໄດ້ໃຫ້ແກ່ຊາວສວນກໍຄືຜູ້ປະກອບການດ້ານກາເຟໃຫ້ດີຂຶ້ນ.

ເຮັດໃຫ້ກາເຟລາວ ເປັນທີ່ຕ້ອງການຂອງຕະຫຼາດພາຍໃນ ແລະຕ່າງປະເທດ.ຊຶ່ງໃນໄລຍະ 4 ປີ ກ່ວາການສົ່ງອອກກາເຟຂອງສະມາຊິກມາຄົມກາເຟລາວ ບັນລຸໄດ້ 146.000 ກວ່າໂຕນ,ມູນຄ່າ 308 ລ້ານກວ່າໂດລາ .ສ່ວນຕະຫຼາດກາເຟລາວກໍມີທັງບັນດາປະເທດອາຊີ,ເອີຣົບ ແລະ ອາເມລິກາ.

ໃນກອງປະຊຸມໃຫຍ່ຍັງໄດ້ຜ່ານແຜນການເຄື່ອນໄຫວ,ກົດລະບຽບສະບັບປຸງໃໝ່ສະໄໝທີVIII ຂອງສະມາຄົມ ແລະທີ່ສໍາຄັນໄດ້ປ່ອນບັດຄັດເລືອກເອົາຄະນະບໍລິຫານງານສະມາຄົມກາເຟລາວຊຸດໃໝ່ ເຊິ່ງມີຜູ້ສະໝັກ 11 ທ່ານ,ເລືອກເອົາ 9 ທ່ານ. ຜ່ານການປ່ອນບັດແລະດໍາເນີນກອງປະຊຸມໃຫຍ່ຄັ້ງປະຖົມມະລືກໄດ້ເລືອກເອົາ:ທ່ານ ນາງ ບຸນເຮືອງ ແຄຣໍລິດດັງ ປະທານກຸ່ມບໍລິສັດດາວເຮືອງ ເປັນປະທານສະມາຄົມກາເຟລາວ; ທ່ານ ແສງຈັນ ຄໍາມຸນທາ ບໍລິສັດແສງໄຊການຄ້າ ເປັນຮອງປະທານສະມາຄົມກາເຟລາວ; ທ່ານ ສີສຸກ ວົງພັກດີ ບໍລິສັດເພັດສະຫວ່າງຮ່ວມພັດທະນາກາເຟລາວ ເປັນຮອງປະທານສະມາຄົມກາເຟລາວ.


ທ່ານ ໄຊຊະນະ ວິໄລສັກ ບໍລິສັດສີວິໄລ ຈະເລີນການຄ້າເປັນກໍາມະການບໍລິຫານງານສະມາຄົມກາເຟລາວ; ທ່ານ ນາງ ແສງເພັດ ໂພທິວົງ ບໍລິສັດຈໍາປາສັກຈະເລີນການກະເສດ ເປັນກໍາມະການບໍລິຫານງານສະມາຄົມກາເຟລາວ; ທ່ານ ບຸນເອື້ອນ ສີລາເພັດ ສະຫະກອນໃຈກາເຟລາວ ເປັນກໍາມະການບໍລິຫານງານສະມາຄົມກາເຟລາວ;ທ່ານ ອາລິຍະ ແດງກາຍະພິຈິດ ບໍລິສັດໄຊຈະເລີນການຄ້າຂາອອກ-ຂາເຂົ້າ ເປັນກໍາມະການບໍລິຫານງານສະມາຄົມກາເຟລາວ; ທ່ານ ນາງ ສູນທອນ ນະພອນສັກ ກຸ່ມຜູ້ຜະລິດກາເຟ ເມືອງເລົ່າງາມ ເປັນກໍາມະການບໍລິຫານງານສະມາຄົມກາເຟລາວ; ທ່ານ ບຸນຍູ້ ດວງສະຫງ່າ ກຸ່ມຜູ້ຜະລິດກາເຟເມືອງປາກຊ່ອງເປັນກໍາມະການບໍລິຫານງານສະມາຄົມກາເຟລາວ.