ແຂວງບໍ່ແກ້ວໄຂສົກຮຽນໃໝ່ ສົກຮຽນ 2020-2021

ແຂວງບໍ່ແກ້ວໄຂສົກຮຽນໃໝ່ ສົກຮຽນ 2020-2021

September 1, 2020 0 By admin

ໜັງສືພິມບໍ່ແກ້ວ Bokeo Newspaper, ເນື່ອງໃນໂອກາດ ມື້ໄຂສົກຮຽນໃໝ່ 01 ກັນຍາ ແລະ ວັນເປີດສົກຮຽນໃໝ່ຂອງກະຊວງສຶກສາກໍ່ຄືສະຖາບັນການສຶກສາໃນຂອບເຂດທົ່ວປະເທດ ສຳລັບແຂວງບໍ່ແກ້ວ ມີ 5 ເມືອງ,ເມືອງຫ້ວຍຊາຍ, ເມືອງຕົ້ນເຜິ້ງ, ເມືອງປາກທາ, ເມືອງຜາອຸດົມ ແລະ ເມືອງເມິງ ປະກອບດ້ວຍຫຼາຍໂຮງຮຽນແຕ່ຊັ້ນປະຖົມຈົນເຖິງ ວິທະຍາໄລ ຄື ມສ ສັນຕິພາບ, ມປາຍ ຫ້ວຍຊາຍ , ມສ ສົງ, ວິທະຍາໄລແສງນະພາ,ໂຮງຮຽນວິຊາຊີບປາກງາວ ແລະ ແຫ່ງອື່ນໆ ແມ່ນໄດ້ພ້ອມກັນ ໄຂສົກຮຽນໃໝ່ຢ່າງເປັນທາງການ, ໄປພ້ອມໆກັນກັບໂຮງຮຽນແຫ່ງຕ່າງໆໃນຂອບເຂດທົ່ວປະເທດ.

ການສຶກສາ ແມ່ນການສ້າງຊັບພະຍາກອນມະນຸດຊັບພະຍາກອນບຸກຄົນ, ເປັນກໍາລັງແຮງ, ເປັນປັດໃຈສໍາຄັນຍິ່ງ ທີ່ມີລັກສະນະຕັດສິນກວ່າໝູ່ ໃນການພັດທະນາປະເທດຊາດ ຂອງທຸກຍຸກທຸກສະໄໝ.


ວຽກງານການສຶກສາ, ພັກເຮົາຍາມໃດກໍ່ໃຫ້ທິດທາງ,ນະໂຍບາຍ ທີ່ໜັກແໜ້ນຕະຫຼອດມາວ່າ : ການສຶກສາຕ້ອງໄປກ່ອນກ້າວໜຶ່ງ. ຕະຫຼອດໄລຍະທີ່ຜ່ານມາ ລັດຖະບານທຸກຍຸກ ທຸກສະໄໝ ໄດ້ເອົາໃຈໃສ່ວຽກງານການພັດທະນາການສຶກສາ ຢ່າງບໍ່ຢຸດຢັ້ງ ແລະ ໄດ້ມີການພັດທະນາ ເປັນຮູບປະທຳຕະຫຼອດມາ ແລະ ຈະສືບຕໍ່ໃຫ້ຄວາມເອົາໃຈໃສ່ວຽກງານພັດທະນາການສຶກສາ ຂອງຊາດເຮົາຕໍ່ໄປ ເພື່ອສ້າງຄົນລາວ ໃຫ້ມີຄວາມຮູ້, ຄວາມສາມາດສູງຂຶ້ນ ແລະ ເພື່ອໃຫ້ກາຍເປັນກໍາລັງແຮງໃນການປົກປັກຮັກສາ ແລະ ສ້າງສາປະເທດຊາດ ໃຫ້ຈະເລີນກ້າວໜ້າ ສືບຕໍ່ໄປ ຢ່າງບໍ່ຢຸດຢັ້ງ. ດັ່ງນັ້ນ, ພາລະໜ້າທີ່ຂອງຜູ້ບໍລິຫານການສຶກສາ, ຄູອາຈານ ຈຶ່ງເປັນຜູ້ທີ່ມີຄວາມຮັບຜິດຊອບພິເສດ ຕໍ່ພາລະກິດການສຶກສາຂອງຊາດ ຂອງພວກເຮົາ ໃນປະຈຸບັນ ແລະ ອະນາຄົດ.


ໃນສົກຮຽນຜ່ານມາ ປະເທດເຮົາໄດ້ຮັບຜົນກະທົບ ຢ່າງໜັກໜ່ວງ ຕໍ່ການຮຽນ, ການສອນ ຢູ່ໃນທົ່ວປະເທດ ເນື່ອງຈາກການລະບາດຂອງເຊື້ອພະຍາດອັກເສບປອດ COVID-19 ນອກນັ້ນ ກໍ່ໄດ້ສົ່ງຜົນກະທົບໃນວົງກວ້າງ, ແຕ່ເພື່ອເຮັດໃຫ້ການໄຂສົກຮຽນໃໝ່ ສົກປີ 2020-2021 ໄດ້ມີບັນຍາກາດທີ່ດີ ແລະ ທັນກັບເວລາຕາມປະຕິທິນປີການສຶກສາຂອງແຕ່ລະຊັ້ນ, ແຕ່ລະສາຍ.

ຜູ້ບໍລິຫານການສຶກສາ, ຄະນະພັດທະນາການສຶກສາທຸກຂັ້ນ ແລະ ທຸກພາກສ່ວນໃນສັງຄົມ ລວມທັງພາກເອກະຊົນ ຈົ່ງເປັນເຈົ້າການຮ່ວມກັນກະກຽມຄວາມພ້ອມ ແລະ ອໍານວຍຄວາມສະດວກຕາມເງື່ອນໄຂ ແລະ ຄວາມສາມາດຕົວຈິງຂອງຂະແໜງການ ແລະ ທ້ອງຖິ່ນ ໂດຍສະເພາະແມ່ນການຊັບຊ້ອນບັນຈຸຄູສອນ, ກະກຽມອາຄານສະຖານທີ່ຫ້ອງຮຽນ, ອຸປະກອນການສອນ-ການຮຽນ, ບ່ອນທີ່ພັກອາໄສຂອງຄູຢູ່ເຂດຫ່າງໄກສອກຫຼີກ ແລະ ດ້ານທີ່ຈໍາເປັນອື່ນໆ ເພື່ອຮັບໃຊ້ໃຫ້ແກ່ການເປີດສົກຮຽນ ແລະ ຮັບໃຊ້ແກ່ການສອນ-ການຮຽນຕະຫຼອດຮອດສົກຮຽນ ໃໝ່ໃຫ້ໄດ້ຮັບຜົນດີ.

ພ້ອມທັງມີມາດຕະການປ້ອງກັນເຊື້ອພະຍາດອັກເສບປອດໂຄວິດ-19 ໂດຍການໝັ່ນລ້າງມືດ້ວຍສະບູ່ ຫຼື ນໍ້າຢາຂ້າເຊື້ອ, ສະໜອງຜ້າອັດປາກອັດດັງ, ກວດວັດອຸນຫະພູມຢ່າງເປັນປະຈຳ ໃຫ້ກາຍເປັນຄວາມເຄີຍຊິນໃນການດຳລົງຊີວິດປະຈຳວັນ ຂອງປະຊາຊົນເຮົາໂດຍສະເພາະບັນດານັກຮຽນນັກສຶກສາ, ຊາວໜຸ່ມ, ເຍົາວະຊົນ ແລະ ອະນຸຊົນ ຂອງພວກເຮົາ.


ຂຽນບົດໂດຍ: ຄຳພັນ ແກ້ວມະນີ