ຫຼວງນ້ຳທາ ເປີດສູນສຸຂະນາໄມ ແລະ  ສຸຂະນາໄມພືດຄົບວົງຈອນ ຢູ່ດ່ານສາກົນບໍ່ເຕ່ນ

ຫຼວງນ້ຳທາ ເປີດສູນສຸຂະນາໄມ ແລະ ສຸຂະນາໄມພືດຄົບວົງຈອນ ຢູ່ດ່ານສາກົນບໍ່ເຕ່ນ

September 1, 2020 0 By admin

ຂ່າວສານ ແຂວງຫຼວງນໍ້າທາ, ວັນທີ 28 ສີງຫາ 2020 ນີ້ຢູ່ທີ່ດ່ານສາກົນບໍ່ເຕ່ນແຂວງຫຼວງນໍ້າທາ ໄດ້ເປີດສູນສຸຂະນາໄມແລະ ສຸຂະນາໄມພືດຄົບວົງຈອນ ສ້າງຫ້ອງວິໄຈສັດຕູພືດ ISO 17025 ໂດຍການຮ່ວມມືລະຫວ່າງກົມປູກຝັງ ກະຊວງກະສິກຳ ແລະ ປ່າໄມ້ ກັບກຸ່ມບໍລິສັດສີມອນພັດທະນາກະສິກຳ ແລະ ບໍລິການຂາເຂົ້າ-ຂາອອກ ຈຳກັດຜູ້ດຽວ ໂດຍການເຂົ້າຮ່ວມຂອງ ທ່ານ ປອ ລຽນ ທິແກ້ວ  ລັດຖະມົນຕີ ກະຊວງກະສິກໍາ ແລະ ປ່າໄມ້, ທ່ານຄຳໄຫຼ ສີປະເສີດ ເລຂາພັກແຂວງ ຮອງເຈົ້າແຂວງ ແຂວງຫຼວງນໍ້າທາ,  ທ່ານ ນາງ ສີມອນ ແກ້ວວົງເພັດ ປະທານກຸ່ມບໍລິສັດສີມອນ ພັດທະນາກະສິກຳ ແລະ ບໍລິການຂາເຂົ້າ-ຂາອອກຈຳກັດຜູ້ດຽວ ມີຫົວໜ້າກົມ- ຮອງກົມປູກຝັງ ຫົວໜ້າພະແນກ-ຮອງຫົວໜ້າພະແນກການອ້ອມຂ້າງແຂວງ ແຂກຖືກເຊີນ ແລະ ພາກສ່ວນທີກ່ຽວຂ້ອງເຂົ້າຮ່ວມ.


ທ່ານ ນາງ ສີມອນ ແກ້ວວົງເພັດ ປະທານກຸ່ມບໍລິສັດສີມອນ ພັດທະນາກະສິກຳ ແລະ ບໍລິການຂາເຂົ້າ – ຂາອອກ ຈຳກັດຜູ້ດຽວໄດ້ຜ່ານປະຫວຄວາມເປັນມາຂອງບໍລິສັດ, ການກະກຽມດຳເນີນກິດຈະການ ແລະ ທິດທາງໃນຕໍ່ໜ້າ ກຸ່ມບໍລິສັດ ສີມອນ ພັດທະນາກະສິກໍາ
ແລະ ບໍລິການ ຂາເຂົ້າ-ຂາອອກ ມີປະສົບການດຳເນີນທຸລະກິດມາຫຼາຍກວ່າ 10 ປີ ເປັນຕົ້ນ ດໍາເນີນກິດຈະການໃນການຈັດສົ່ງສິນຄ້າ ເພື່ອນຳເຂົ້າ ແລະ ສົ່ງອອກ ສິນຄ້າກະສິກໍາ ຈາກ ສປ ຈີນ, ຍັງນໍາເຂົ້າສິນຄ້າຈາກໄທ ສົ່ງໄປ ສປ ຈີນ.

ນອກນັ້ນຍັງດຳເນີນການດ້ານການພັດທະນາສຸຂະນາໄມພືດ ຢູ່ດ່ານປາງໄຮ ແລະ ດ່ານສາກົນບໍ່ເຕັນ ບໍລິສັດໄດ້ຮັບການຢັ້ງຢືນມາດຕະຖານສາກົນຂອງປະເທດອົດສະຕາລິຮ່ວມມືກັບພັກ – ລັດໃນການສ້າງຕັ້ງສູນບໍລິການສຸຂະນາໄມ ແລະ ສຸຂະນາໄມພືດຄົບວົງຈອນ ເຊີ່ງຈະເຮັດໜ້າທີບໍລິການສຸຂະນາໄມພືດການອອກໃບຢັ້ງຢືນປອດສັດຕູພືດ ບໍລິການກວດກາ ແລະ ວິໄຈ ບໍລິການກຳຈັດສັດຕູພືດ ກັກກັນ ແລະ ບໍລິການປ້ອງກັນຕິດພັນກັບການສ້າງເຂດປອດສັດຕູພືດການສຳຫຼວດ ແລະການຂື້ນບັນຊີສັດຕູພືດ ສ້າງເປັນສູນທີ່ໄດ້ມາດຕະຖານຂອງ ສປ ຈີນ ແລະ ສາກົນ ຮອງຮັບໃຫ້ແກ່ການນຳເຂົ້າ-ສົ່ງອອກ ສິນຄ້າກະສິກໍາ, ອອກໃບຢັ້ງຢືມາດຕະຖານຂອງ ສປ ຈີນ ແລະ ສາກົນ ໃນການກວດກາ, ວິໄຈ ໃຫ້ໄດ້ຕາມມາດຖານທີ່ກຳນົດໄວ້ ສ້າງຄວາມເຊື່ອໝັ້ນ ແລະ ໄວ້ວາງໃຈ ໃຫ້ກັບບັນດາປະເທດຜູ້ຮັບຊື້ ແລະ ຄູ່ຄ້າ.

ຊຸກຍູ້ໃຫ້ ສປ ຈີນ ເພີ່ມລາຍການນໍາເຂົ້າສິນຄ້າ ຈາກສປປ ລາວ ໃຫ້ຫຼາຍຂຶ້ນ ເປັນສູນຕົວແບບໃນການຍົກລະດັບການບໍລິການ,ການສ້າງບຸກຄະລາກອນ ໃນວຽກງານດັ່ງກ່າວ ເພື່ອປະກອບສ່ວນໃນການພັດທະນາເສດຖະກິດ-ສັງຄົມ,ສ້າງລາຍຮັບໃຫ້ແກ່ລັດຖະບານ ແລະແກ້ໄຂຄວາມທຸກຍາກຂອງປະຊາຊົນປະກອບສ່ວນໃນການຊຸກຍູ້ປະລິມານການປູກ, ການລ້ຽງ ໃຫ້ເພີ່ມຂື້ນທາງດ້ານປະລິມານ ແລະ ຄຸນນະພາບປະກອບສ່ວນຊຸກຍູ້ໃຫ້ ສປປ ລາວ ເປັນໃຈກາງໃນການແລກປ່ຽນສີນຄ້າກະສິກຳ ແລະ ອຸດສາຫະກຳປູງແຕ່ງກະສິກຳ ລະຫວ່າງ ສປຈີນ ແລະ ບັນດາປະເທດອາຊຽນທັງພາກພື້ນ ແລະ ສາກົນ.

ໂອກາດນີ້ກໍ່ໄດ້ຮັບຊົມການສະແດງສິລະປະວັນນະຄະດີ ພ້ອມທັງຕັດແຖບຜ້າ ລັ່ນຄ້ອງ 9 ບາດເປີດສູນສຸຂະນາໄມ ແລະ ສຸຂະນາໄມພືດຄົບວົງຈອນ ສ້າງຫ້ອງວິໄຈສັດຕູພືດ ISO17025 ຢ່າງເປັນທາງການ.


ຂ່າວ: ອຸ້ມ