ເມືອງ ວິລະບູລີ ຈັດກອງປະຊຸມຜ່ານເນື້ອໃນປຶ້ມປະຫວັດສາດທົ່ງນາເງືອກ ເພື່ອກະກຽມສະເໜີຂຶ້ນເປັນມໍລະດົກວັດທະນະທໍາລະດັບຊາດ

ເມືອງ ວິລະບູລີ ຈັດກອງປະຊຸມຜ່ານເນື້ອໃນປຶ້ມປະຫວັດສາດທົ່ງນາເງືອກ ເພື່ອກະກຽມສະເໜີຂຶ້ນເປັນມໍລະດົກວັດທະນະທໍາລະດັບຊາດ

June 16, 2020 0 By admin

ເພື່ອເປັນການອະນຸລັກປົກປັກຮັກສາແຫຼ່ງມໍລະດົກວັດທະນະທໍາຂອງທ້ອງຖິ່ນ ກໍ່ຄືຂອງເມືອງ ວິລະບູລີ ບໍ່ໃຫ້ຖືກທໍາລາຍ ຫຼື ສູນຫາຍໄປຕາມການເວລາ.ດັ່ງນັ້ນ, ມາໃນຕອນເຊົ້າຂອງວັນທີ 15 ມິຖຸນາ 2020 ນີ້ຢູ່ທີ່ສະໂມສອນຫ້ອງວ່າການເມືອງ ວິລະບູລີ ໄດ້ຈັດກອງປະຊຸມຜ່ານເນື້ອໃນປຶ້ມປະຫວັດສາດທົ່ງນາເງືອກ ເພື່ອເປັນເອກະສານອ້າງອີງກະກຽມສະເໜີຂຶ້ນເປັນມໍລະດົກທາງດ້ານວັດທະນະທໍາລະດັບຊາດ.

ໂດຍການເຂົ້່າຮ່ວມເປັນປະທານຂອງທ່ານ ປອ ຄໍາເຜີຍ ຜັນທະຈອນ ຮອງເລຂາພັກແຂວງ ປະທານສະພາປະຊາຊົນແຂວງ ສະຫວັນນະເຂດ, ມີບັນດາທ່ານການນໍາຂອງແຂວງ, ພະແນກການທີ່ກ່ຽວຂ້ອງຂອງແຂວງ, ມີບັນດາທ່ານການນໍາຂອງເມືອງ ແລະ ຫ້ອງການທີ່ກ່ຽວຂ້ອງຂອງເມືອງ ວິລະບູລີ, ພ້ອມດ້ວຍເຖົ້າແກ່ແນວໂຮມບ້ານອ້ອມຂ້າງເຂົ້າຮ່ວມ.ຈຸດປະສົງຂອງການຈັດກອງປະຊຸມໃນຄັ້ງນີ້ກໍ່ແມ່ນເພື່ອ ລະດົມເອົາແນວຄວາມຄິດຂອງຫຼາຍພາກສ່ວນ ເປັນຂໍ້ມູນໃຫ້ແກ່ການຂຽນປຶ້ມປະຫວັດສາດທົ່ງນາເງືອກ ເພື່ອພິມຈໍາໜ່າຍອອກສູ່ສັງຄົມ ແລະ ເພື່ອເປັນເອກະສານອ້າງອີງປະກອບເຂົ້າໃນການນໍາສະເໜີທົ່ງນາເງືອກ ຂຶ້ນເປັນມໍລະດົກທາງດ້ານວັດທະນະທໍາລະດັບຊາດໃນຕໍ່ໜ້າ.

ສຳລັບທົ່ງນາເງືອກແມ່ນເປັນແຫຼ່ງມໍລະດົກສະຖານ ທີ່ມີຄວາມໝາຍສໍາຄັນ ທາງດ້ານມໍລະດົກວັດທະນະທໍາຂອງທ້ອງຖິ່ນ ເຊິ່ງມີຄວາມກ່ຽວພັນກັບບັນດາເລື່ອງເລົ່າຂານຕໍານານຂອງແຫຼ່ງທ່ອງທ່ຽວຕ່າງໆພາຍໃນເມືອງ ວິລະບູລີ ມາແຕ່ສະໄໝບູຮານນະການ, ທົ່ງນາເງືອກແຫ່ງນີ້ແມ່ນມີປະຫວັດຄວາມເປັນມາຫຼາຍກວ່າ 3.000 ປີມາແລ້ວ, ເຊິ່ງຕັ້ງຢູ່ຫ່າງຈາກບ້ານເມືອງຫຼວງ ໄປທາງທິດໃຕ້ປະມານ 1 ກິໂລແມັດ ແລະ ຢູ່ໃນເຂດສໍາປະທານຂອງໂຄງການ ຂຸດຄົ້ນຄໍາ – ທອງ ຂອງບໍລິສັດລ້ານຊ້າງມີເນໂຣນສ໌ ລິມິເຕັດ ມີເນື້ຶອທີ່ທັງໝົດລວມທັງເຂດກັນຊົນແມ່ນ 11,02 ເຮັກຕາ, ມີເນື້ອທີ່ສະເພາະແມ່ນ 3,66 ເຮັກຕາ, ມີລັກສະນະພິເສດແມ່ນເປັນທົ່ງຫຍ້າແກມສະໜົມເປັນສ່ວນໃຫຍ່, ເນັ່ງເປັນແລວຍາວຢຽດໄປຕາມທິດຕາເວັນອອກ ຫາ ທິດຕາເວັນຕົກ ຍາວປະມານ 500 ແມັດ, ກວ້າງປະມານ 30 ແມັດ.

ທ່ານ ປອ ຄໍາເຜີຍ ຜັນທະຈອນ ປະທານສະພາປະຊາຊົນແຂວງ ສະຫວັນນະເຂດໄດ້ບອກໃຫ້ຮູ້ວ່າ : ການຂຽນປຶ້ມປະຫວັດສາດທົ່ງນາເງືອກໃນຄັ້ງນີ້ ກໍ່ແມ່ນໄດ້ຮິບໂຮມເອົາບັນດາຂໍ້ມູນເລື່ອງເລົ່າຂານຕ່າງໆ ທີ່ກ່ຽວຂ້ອງກັບທົ່ງນາເງືອກ ປະກອບກັບການຄົ້ນຄ້ວາທາງດ້ານວິທະຍາສາດໃນສະໄໝໃໝ່ ມາປະກອບໃສ່ກັນ ເພື່ອເປັນຂໍ້ມູນໄວ້ໃຫ້ຄົນຮຸ່ນຫຼັງໄດ້ຄົ້ນຄວ້າສຶກສາຮໍ່າຮຽນຕໍ່ໄປ, ພ້ອມນັ້ນກໍ່ຍັງເປັນການຄົ້ນຄວ້າເກັບກໍາຂໍ້ມູນເພື່ອນໍາສະເໜີທົ່ງນາເງືອກຂຶ້ນເປັນມໍລະດົກທາງດ້ານວັດທະນະທໍາລະດັບຊາດ ແລະ ໃນໄລຍະນີ້ກໍ່ຈະໄດ້ສະເໜີຫາພາກສ່ວນທີ່ກ່ຽວຂ້ອງເພື່ອພ້ອມກັນອະນຸລັກປົກປັກຮັກສາ ແຫຼ່ງມໍລະດົກວັດທະນະທໍາດັ່ງກ່າວນີ້ໄວ້ ເປັນແຫຼ່ງທ່ອງທ່ຽວທີ່ສໍາຄັນຂອງທ້ອງຖິ່ນ ກໍ່ຄືຂອງເມືອງວິລະບູລີ ແລະ ບໍ່ໃຫ້ຖືກທໍາລາຍ ຫຼື ສູນຫາຍໄປຕາມການເວລາ.

ສໍາລັບໃນພາກບ່າຍ ບັນດາແຂກທີ່ເຂົ້າຮ່ວມປະຊຸມກໍ່ຍັງໄດ້ພ້ອມກັນໄປເບິ່ງສະຖານທີ່ຕົວຈິງຂອງທົ່ງນາເງືອກ ເພື່ອເປັນການເກັບກໍາຂໍ້ມູນຕົວຈິງ ປະກອບໃສ່ການຂຽນປຶ້້ມປະຫວັດສາດທົ່ງນາເງືອກຕື່ມອີກ ເພື່ອເຮັດໃຫ້ປຶ້້ມດັ່ງກ່າວມີເນື້ອໃນທີ່ຄົບຖ້ວນ ແລະ ສົມບູນຂຶ້ນກວ່າເກົ່າ.


ພາບ-ຂ່າວ : ນັກຂ່າວເມືອງ ວິລະບູລີ