ລັດຖະບານ ສືບຕໍ່ປິດດ່ານ, ຮ້ານບັນເທີງ; ພ້ອມນັ້ນຍັງ ສືບຕໍ່ໂຈະການອອກວີຊ່າ, ສຶບຕໍ່ໂຈະຊົ່ວຄາວຍົນເຊົ່າເໝົາລຳ

ລັດຖະບານ ສືບຕໍ່ປິດດ່ານ, ຮ້ານບັນເທີງ; ພ້ອມນັ້ນຍັງ ສືບຕໍ່ໂຈະການອອກວີຊ່າ, ສຶບຕໍ່ໂຈະຊົ່ວຄາວຍົນເຊົ່າເໝົາລຳ

August 31, 2020 0 By admin

ລັດຖະບານ ໄດ້ອອກແຈ້ງການສືບຕໍ່ປະຕິບັດບັນດາມາດຕະການຜ່ອນຜັນ ປ້ອງກັນຄວບຄຸມພະຍາດໂຄວິດ-19 ໃນໄລຍະແຕ່ ວັນທີ 1- 30 ກັນຍາ 2020 ໂດຍສືບຕໍ່ປິດບັນດາກິດຈະການຮ້ານບັນເທີງ, ປິດດ່ານສຳລັບການເຂົ້າອອກຂອງບຸກຄົນທົ່ວໄປ. ນອກນັ້ນຍັງສືບຕໍ່ໂຈະການອອກວີຊ່າ, ສືບຕໍ່ໂຈະຊົ່ວຄາວສຳລັບຍົນເຊົ່າເໝົາລຳລະຫວ່າງປະເທດ.

ຫ້ອງວ່າການສຳນັກງານນາ ຍົກລັດຖະມົນຕີ ສະບັບເລກ ໄດ້ອອກແຈ້ງການ ເລກທີ925/ຫສຍນ ລົງວັນທີ31 ສິງຫາ 2020 ເລື່ອງການສືບຈໍ່ປະຕິບັດມາດຕະການຜ່ອນຜັນ, ມາດຕະການປ້ອງກັນ, ຄວບຄຸມ, ສະກັດກັ້ນແລະແກ້ໄຂການລະບາດຂອງພະຍາດໂຄວິດ-19 ໃນໄໃນໄລຍະແຕ່ວັນທີ1-30ກັນຍາ 2020 ດັ່ງນີ້:

1. ເຫັນດີໃຫ້ສືບຕໍ່ປະຕິບັດ ບັນດາມາດຕະການຜ່ອນຜັນ, ມາດຕະການ ໃນການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດ ຂອງພະຍາດໂຄວິດ-19 ຄືກັນກັບມາດຕະການ ທີ່ໄດ້ປະຕິບັດ ໃນເດືອນສິງຫາ 2020 ຜ່ານມາ ຕາມທີ່ໄດ້ລະບຸໃນແຈ້ງການ ຂອງຫ້ອງວ່າການສຳນັກງານນາ ຍົກລັດຖະມົນຕີ ສະບັບເລກທີ 806/ຫສນຍ, ລົງວັນທີ 29 ກໍລະກົດ 2020 ແລະ ສະບັບເລກທີ 838/ຫສນຍ, ລົງວັນທີ 07 ສິງຫາ 2020 ຢ່າງເຂັ້ມງວດ, ໃນນັ້ນ ສະເພາະມາດຕະການທີ່ສືບຕໍ່ໂຈະມີດັ່ງນີ້:


1) ສືບຕໍ່ປິດບັນດາກິດຈະການຮ້ານບັນເທິງ, ຮ້ານຄາລາໂອເກະ ແລະ ຮ້ານເກມ. ສໍາລັບບັນດາຮ້ານບັນເທິງ ແລະ ຮ້ານຄາລາໂອເກະ ໃຫ້ພາກສ່ວນກ່ຽວຂ້ອງ ສືບຕໍ່ຕິດຕາມ ແລະ ກວດກາ ຕາມຄຳສັ່ງຂອງລັດຖະບານ ຜ່ານມາ, ຖ້າເຫັນວ່າຍັງມີການລະເມີດ ໃຫ້ມີການກ່າວເຕືອນ, ຖ້າຍັງຝ່າຝືນ ກໍ່ໃຫ້ດຳເນີນການຖອນໃບອະນຸຍາດຊົ່ວຄາວ.


2) ສືບຕໍ່ປິດດ່ານປະເພນີ ແລະ ດ່ານທ້ອງຖິ່ນ ສຳລັບການເຂົ້າ-ອອກ ຂອງບຸກຄົນທົ່ວໄປ ແລະ ການຂົນສົ່ງສິນຄ້າ, ຍົກເວັ້ນບາງດ່ານປະເພນີ ຫຼື ດ່ານທ້ອງຖິ່ນ ທີ່ໄດ້ຮັບອະນຸຍາດຈາກລັດຖະບານ ໃຫ້ລົດຂົນສົ່ງສິນຄ້າ ເຂົ້າ-ອອກ ໄດ້. ສ່ວນດ່ານສາກົນ ສືບຕໍ່ປິດສຳລັບການເຂົ້າ-ອອກ ຂອງບຸກຄົນທົ່ວໄປ, ຍົກເວັ້ນ ພົນລະເມືອງລາວ ແລະ ຊາວຕ່າງປະເທດ ທີ່ມີຄວາມຈຳເປັນຮີບດ່ວນ ໃນການເດີນທາງເຂົ້າ-ອອກ ສປປ ລາວ ທີ່ໄດ້ຮັບອະນຸຍາດ ຈາກຄະນະສະເພາະກິດ. ສໍາລັບການຂົນສົ່ງສິນຄ້າ ຜ່ານດ່ານສາກົນ ແມ່ນສາມາດເຂົ້າ-ອອກໄດ້ຕາມປົກກະຕິ.
3) ສືບຕໍ່ໂຈະການອອກວີຊາທ່ອງທ່ຽວ ແລະ ຢ້ຽມຢາມ ສໍາລັບບຸກຄົນ ທີ່ເດີນທາງມາຈາກ ຫຼື ຜ່ານປະເທດ ທີ່ຍັງມີການລະບາດ ຂອງພະຍາດໂຄວິດ-19. ສໍາລັບ ນັກການທູດ, ພະນັກງານອົງການຈັດຕັ້ງສາກົນ, ຊ່ຽວຊານ, ນັກລົງທຶນ, ນັກທຸລະກິດ, ວິຊາການ ແລະ ແຮງງານຕ່າງປະເທດ ທີ່ມີຄວາມຈໍາເປັນ ແລະ ຮີບດ່ວນ ສາມາດເຂົ້າມາປະຕິບັດວຽກງານ ຢູ່ສະຖານທູດ, ບັນດາກິດຈະການ ແລະ ໂຄງການຕ່າງໆ ໄດ້, ແຕ່ຕ້ອງຜ່ານການພິຈາລະນາເຫັນດີຈາກຄະນະສະເພາະກິດ.
4) ໃຫ້ສືບຕໍ່ໂຈະຊົ່ວຄາວສໍາລັບຍົນເຊົ້າເໝົາລໍາລະຫວ່າງປະເທດກ່ອນ ແລະ ໃຫ້ຄະນະສະເພາະກິດ ສົມທົບກັບກົມການບິນພົນລະເຮືອນ ແລະ ພາກສ່ວນກ່ຽວຂ້ອງ ສືບຕໍ່ອອກມາດຕະການໃໝ່ ໃຫ້ລະອຽດ ແລະ ຮັດກຸມ ສະເໜີມາຍັງລັດຖະບານ ເພື່ອຂໍການອະນຸມັດກ່ອນ ຈຶ່ງດຳເນີນການໄດ້.

2. ເຫັນດີໃຫ້ກໍານົດເອົາ ເວລາ 23:00 ໂມງ ຕາມດໍາລັດ ສະບັບເລກທີ 315/ລບ, ລົງວັນທີ 02 ຕຸລາ2017 ເປັນເວລາປີດຮ້ານອາຫານ ໂດຍໃຫ້ປະຕິບັດເປັນເອກະພາບໃນຂອບເຂດທົ່ວປະເທດ. ກ່ຽວກັບການປະຕິບັດບັນດາມາດຕະການປ້ອງກັນ, ຄວບຄຸມ ແລະ ສະກັດກັ້ນ ສໍາລັບຮ້ານອາຫານ ໃນໄລຍະຜ່ານມາ ທີ່ຍັງມີບາງທ້ອງຖິ່ນ ປະຕິບັດບໍ່ເປັນເອກະພາບກັນນັ້ນ, ມອບໃຫ້ຄະນະສະເພາະກິດ ອອກຄໍາແນະນຳສະເພາະ ໃຫ້ລະອຽດຕື່ມ.
3. ໃຫ້ກະຊວງປ້ອງກັນຄວາມສະຫງົບ ສົມທົບກັບອົງການປົກຄອງທ້ອງຖິ່ນ ສືບຕໍ່ເອົາໃຈໃສ່ຢ່າງເຂັ້ມງວດ ໃນການຕິດຕາມ, ກວດກາ ແລະ ຄຸ້ມຄອງ ຜູ້ລັກລອບເຂົ້າເມືອງ ທີ່ບໍ່ໄດ້ຜ່ານດ່ານຊາຍແດນ ມາຈຳກັດບໍລິເວນ ແລະ ເກັບຕົວຢ່າງໄປກວດຫາເຊື້ອພະຍາດ.
4. ມອບໃຫ້ຄະນະສະເພາະກິດ ເປັນໃຈກາງໃນການປະສານສົມທົບກັບພາກສ່ວນກ່ຽວຂ້ອງ ສືບຕໍ່ຕິດຕາມ ແລະ ກວດກາ ການປະຕິບັດບັນດາມາດຕະການຜ່ອນຜັນ, ມາດຕະການໃນການປ້ອງກັນ, ຄວບຄຸມສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ຂອງບັນດາຂະແໜງການ ແລະ ທ້ອງຖິ່ນຢ່າງໃກ້ຊິດ, ກໍລະນີມີບັນຫາໃດເກີດຂຶ້ນໃໝ່ ກໍໃຫ້ຮີບຮ້ອນແກ້ໄຂ ໃຫ້ທັນການ, ຖ້າຈໍາເປັນ ກໍໃຫ້ລາຍງານລັດຖະບານ ເພື່ອມີທິດຊີ້ນໍາ.

ໃນຕອນແລງ ວັນທີ31 ສິງຫາ 2020, ທ່ານ ຮສ. ດຣ. ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ຫົວໜ້າກອງເລຂາຄະນະສະເພາະກິດໂຄວິດ-19 ກໍໄດ້ຖະແຫລງຂ່າວ  ກ່ຽວກັບການສືບຕໍ່ປະຕິບັດບັນດາມາດຕະການຜ່ອນຜັນ, ມາດຕະການໃນການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດ ຂອງພະຍາດໂຄວິດ-19 ໃນໄລຍະແຕ່ ວັນທີ 1- 30 ກັນຍາ 2020.