ຊົມເຊີຍ! ອາຣເຊນໍລ ຊະນະ ລີເວີພູລ ຄວ້າແຊ້ມ ຄອມມູນິຕີ້ຊິວ ສະໄໝທີ 16

ຊົມເຊີຍ! ອາຣເຊນໍລ ຊະນະ ລີເວີພູລ ຄວ້າແຊ້ມ ຄອມມູນິຕີ້ຊິວ ສະໄໝທີ 16

August 30, 2020 0 By admin

ການແຂ່ງຂັນເຕະບານ ລາຍການ ຄອມມູນີຕີ້ຊິວ ປະຈຳປີ 2020 ຂັນປະເພນີ ທີ່ຄັດເອົາ ລີເວີພູລ ແຊ້ມພຣີເມ່ຍລີກ ພົບກັບ ອາຣເຊນໍລ ແຊ້ມເອຟເອຄັບ ກ່ອນເລີ່ມລະດູການໃຫມ່ 2020-21 ເມື່ອວັນທີ 29 ສິງຫາຜ່ານມາ, ທີ່ສະໜາມກິລາແຫ່ງຊາດອັງກິດ ເວັມບລີ ໂດຍປິດປະຕູບໍ່ໃຫ້ມີຜູ້ຊົມ ເພື່ອປ້ອງກັນການຕິດເຊື້ອໂຄວິດ-19.

ປືນໃຫຍ່ ອາຣເຊນໍລ ເປັນຝ່າຍຊິງໂອກາດຂຶ້ນນຳກ່ອນໃນເຄິ່ງເວລາທຳອິດ ຈາກຫົວໜ້າທີມ ປີແອ ເອເມຣິກ ໂອບາເມຢ໋ອງ ນາທີ 12′ ແຕ່ເຄິ່ງຫລັງ ຫົງແດງ ລີເວີພູລ ທວງປະຕູຄືນຈາກຕົວສຳຮອງ ທາກຸມິ ມິນາມິໂນະ ນາທີ 73′ ເປັນປະຕູທຳອິດໃນນາມນັກເຕະຫົງແດງ.

ຈົບເກມ 90′ ສະເໝີກັນ 1-1 ບໍ່ມີການຕໍ່ເວລາພິເສດ 30′ ນາທີ ຕັດສິນດ້ວຍການດວນຈຸດໂທດທັນທີ ແລະ ເປັນເດີກັນເນີ້ ຍິງໄດ້ຄົມກວ່າ ເອົາຊະນະ ລີເວີພູລ 5-4. 5 ຄົນຍິງບໍ່ພາດ: ໄຣສ໌ເນວສັນ, ໄມແລ້ນ ນາຍສ໌, ເຊດິກ ຊົວເຣຊ, ດາວິດ ລຸຍ ແລະ ໂອບາເມຢ໋ອງ, ສ່ວນຫົງແດງ 5 ຄົນ ຍິງບໍ່ເຂົ້າ 1 ຄົນຄື: ຣຽນ ບິວສະເຕີ ອີກ 4 ຄົນຍິງເຂົ້າໝົດຄື: ຊາລ່າ, ຟາບິນໂຢ້, ມິນາມິໂນະ ແລະ ເຄີຕິສ ໂຈ່ນ ຫົງແດງເສຍດວນຈຸດໂທດ ເປັນປີທີສອງຕິດຕໍ່ກັນ ປີ 2019 ເສຍໃຫ້ ແມນຊິຕີ້ ດ້ວຍສະກໍດຽວກັນ 4-5.

+ ອາຣເຊນໍລ ແລະ ລີເວີພູລ ລົງຫລິ້ນລາຍການນີ້ເປັນຄັ້ງທີ 23 ເດີກັນເນີ້ ໄດ້ແຊ້ມສະໄໝທີ 16 ໃນນີ້ເປັນແຊ້ມຮ່ວມ 1 ສະໄໝ ປີ 1991, ຂະນະທີ່ ຫົງແດງ ໄດ້ແຊ້ມ 15 ສະໄໝ ໃນນີ້ເປັນແຊ້ມຮ່ວມ 3 ສະໄໝ, ເປັນແຊ້ມຫລ້າສຸດປີ 2006.

+ ລີເວີພູລ ເປັນທີມດຽວທີ່ເສຍດວນຈຸດໂທດລາຍການນີ້ 2 ປີຕິດຕໍ່ກັນ ແລະ ເປັນຄັ້ງທີສອງ ຕໍ່ຈາກປີ 1983, 1984.

+ ອາຣເຊນໍລ ຊະນະ ດວນຈຸດໂທດ ເປັນຄັ້ງທີ 9 ຈາກ 11 ຄັ້ງຫລັງສຸດລວມທຸກລາຍການ.

ລວມສະຖິຕິການພົບກັນທັງສອງທີມໃນລາຍການນີ້ເປັນຄັ້ງທີ 4, ລີເວີພູລ ຊະນະ 2 ອາຣເຊນໍລ ຊະນະ 2 ປີ 1979 ລີເວີພູລ ຊະນະ 3-1, ປີ 1989 ລິເວີພູລ ຊະນະ 1-0 ແລະ ປີ 2002 ອາຣເຊນໍລ ຊະນະ 1-0 ແລະ ປີ 2020 ອາຣເຊນໍລ ຊະນະດວນຈຸດໂທດ 5-4 ເວລາປົກກະຕິສະເໝີກັນ 1-1. ສະເພາະລະດູການຜ່ານມາພົບກັນ 3 ນັດ ໃນພຣີເມ່ຍລີກ 2 ນັດ ລີເວີພູລ ຊະນະຢູ່ບ້ານ 3-1 ແລະ ອາຣເຊນໍລ ຊະນະຢູ່ບ້ານຕົນເອງ 2-1 ອີກໜຶ່ງນັດເປັນເກມ ລີກຄັບ ຮອບ 16 ທີມສຸດທ້າຍທີ່ແອນຟິວ ລີເວີພູລ ຊະນະດວນຈຸດໂທດ 5-4 ເວລາປົກກະຕິສະເໝີກັນ 5-5.

ໄຮໄລ້ການແຂ່ງຂັນຕາມລິ້ງລຸ່ມນີ້:

Photo: Arsenal, Liverpool FC