ປະຊາຊົນ ກຸ່ມນາຊະລອນ ເມືອງບົວລະພາ ສ້າງຂົວບ້ານວັງເງືອກ

ປະຊາຊົນ ກຸ່ມນາຊະລອນ ເມືອງບົວລະພາ ສ້າງຂົວບ້ານວັງເງືອກ

June 21, 2020 0 By admin

ຂປລ. ລາຍງານຂ່າວຈາກຫ້ອງການຖະແຫລງຂ່າວເມືອງບົວລະພາ ແຂວງຄຳມ່ວນ ໃຫ້ຮູ້ວ່າ: ອຳນາດການປົກ ຄອງ ແລະ ພໍ່ແມ່ປະຊາຊົນ ໃນ 10 ບ້ານຂອງກຸ່ມນາຊະລອນ ໄດ້ພ້ອມກັນສ້າງຂົວທີ່ສ້າງຂົວໄມ້ ໂດຍໃຊ້ໄມ້ປ່ອງ ເປັນຖານຂອງຂົວ ແລະ ປູດ້ວຍແປ້ນມີຄວາມຍາວປະມານ 34 ແມັດ.


ໃນທ້າຍອາທິດຜ່ານມານີ້ ຢູ່ທີ່ ບ້ານວັງເງືອກ ເມືອງບົວລະພາ ແຂວງ ຄຳມ່ວນ, ທ່ານ ວົງມາ ໄຊສີຈັນ ຫົວໜ້າ ຄະນະກໍ່ສ້າງຮາກຖານ ການເມືອງກຸ່ມນາຊະລອນ ພ້ອມດ້ວຍຄະນະ ຮ່ວມກັບ ຫ້ອງການ ໂຍທາທິການ ແລະ ຂົນສົ່ງເມືອງ, ພາກສ່ວນທີ່ກ່ຽວຂ້ອງ ໂດຍສະເພາະແມ່ນອົງການຈັດຕັ້ງກຳມະບານໃນແຕ່ລະຂົງເຂດວຽກງານ ຕາມສຳນັກງານຫ້ອງການພາຍໃນເມືອງ ແລະ ບັນດາການຈັດຕັ້ງບ້ານ, ນາຍບ້ານ ຕະຫລອດຮອດ ພໍ່ແມ່ປະຊາຊົນ ກຸ່ມນາຊະລອນ ໄດ້ພ້ອມກັນ ສ້າງຂະບວນການ ສ້າງແປງຂົວ ຂ້າມນ້ຳ ເຊນ້ອຍ ບ້ານວັງເງືອກ ເມືອງບົວລະພາ.

ການຈັດກິດຈະກໍາດັ່ງກ່າວ ຍັງເພື່ອ ສ້າງຂະບວນການຮັບຕ້ອນພິທີປະກາດຮັບຮອງບ້ານວັດທະນະທຳໃໝ່, ເປັນການ ຟື້ນຟູ ແລະ ປັບປຸງ ປົວແປງ ພື້ນຖານໂຄງລ່າງ ເປັນຕົ້ນແມ່ນ ລະບົບເສັ້ນທາງ ແລະ ຂົວ ເພື່ອເຮັດໃຫ້ ການສັນຈອນໄປ – ມາ ຂອງພໍ່ແມ່ປະຊາຊົນພາຍໃນບ້ານ ແລະ ການສັນຈອນໄປ – ມາ ລະຫວ່າງບ້ານ ຫາ ບ້ານ ແລະ ລະຫວ່າງບ້ານ ຫາ ເມືອງໃຫ້ມີຄວາມສະດວກຂຶ້ນຕື່ມ ເພື່ອສືບຕໍ່ຈັດຕັ້ງປະຕິບັດຜັນຂະຫຍາຍມະຕິກອງປະຊຸມໃຫຍ່ຄັ້ງທີ XIຂອງອົງຄະນະພັກເມືອງບົວລະພາ ກໍ່ຄື ປະຕິບັດແຜນພັດທະນາເສດຖະກິດ-ສັງຄົມ ທີ່ໄດ້ວາງຄາດໝາຍໄວ້ໃຫ້ປະກົດຜົນເປັນຈິງໃນແຕ່ລະໄລຍະ.


ພ້ອມກັນນັ້ນ, ກໍ່ເພື່ອເປັນການປຸກລະດົມ ຄວາມສາມັກຄີ ຂອງພໍ່ແມ່ປະຊາຊົນ ພາຍໃນກຸ່ມບ້ານ ແລະ ສ້າງຮັດແໜ້ນຄວາມສາມັກຄີ ລະຫວ່າງການນຳຂອງເມືອງ ກັບພໍ່ແມ່ປະຊາຊົນທຸກຊັ້ນຄົນ ໃກ້ຊິດຕິດແທດ ກັບຊີວິດຕົວຈິງຂອງພໍ່ແມ່ປະຊາຊົນຊາວເມືອງບົວລະພາ ເພື່ອພ້ອມກັນແກ້ໄຂບັນຫາຈຸດອ່ອນ ແລະ ຂໍ້ຄົງຄ້າງ ໃຫ້ບັນລຸເທື່ອລະກ້າວ.