ທ່ານເຈົ້າແຂວງໄຊສົມບູນ ລົງຕິດຕາມຊຸກຍູ້ການລ້ຽງງົວ ຢູ່ຈຸດສຸມບ້ານອອມ ເມືອງອະນຸວົງ ແລະ 2 ບ້ານ ເມືອງທ່າໂທມ

ທ່ານເຈົ້າແຂວງໄຊສົມບູນ ລົງຕິດຕາມຊຸກຍູ້ການລ້ຽງງົວ ຢູ່ຈຸດສຸມບ້ານອອມ ເມືອງອະນຸວົງ ແລະ 2 ບ້ານ ເມືອງທ່າໂທມ

June 21, 2020 0 By admin

ທ່ານ ພົຕ ຄຳລຽງ ອຸທະໄກສອນ, ເຈົ້າແຂວງໄຊສົມບູນ ພ້ອມດ້ວຍຄະນະ ໄດ້ລົງຕິດຕາມ ແລະ ຊຸກຍູ້ການລ້ຽງງົວ ຂອງປະຊາຊົນ ຢູ່ບ້ານອອມ, ບ້ານກກໍໄຮ ເມືອງອະນຸວົງ, ບ້ານວຽງທອງ ແລະ ບ້ານນາຊົງ ເມືອງທ່າໂທມ ໃນວັນທີ 20 ມິຖຸນາ ນີ້ ໂດຍມີການນຳເມືອງອະນຸວົງ, ການນຳເມືອງທ່າໂທມ ແລະ ທ່ານ ຄຳໄພ ສົມຊະນະ, ປະທານບໍລິສັດ ກຸ່ມຄຳໄພຊະນະ ພ້ອມດ້ວຍທຸກພາກສ່ວນທີ່ກ່ຽວຂ້ອງ ຂອງແຂວງ ແລະ ສອງເມືອງ ເຂົ້າຮ່ວມ.


ສຳລັບການລ້ຽງງົວ ຂອງປະຊາຊົນ 2 ບ້ານ ຢູ່ເມືອງອະນຸວົງ ແລະ ປະຊາຊົນ 2 ບ້ານ ເມືອງທ່າໂທມ ໂດຍແມ່ນກຸ່ມບໍລິສັດ ຄຳໄພຊະນະ ເປັນຜູ້ສະໜັບໜູນ ແລະ ສະໜອງແນວພັນງົວ ໃຫ້ທັງໝົດ ຊຶ່ງປະຊາຊົນ ບ້ານອອມ ແລະ ບ້ານກໍໄຮ ເມືອງອະນຸວົງ ໄດ້ຮັບງົວທີ່ກຸ່ມບໍລິສັດ ຄຳໄພຊະນະ ລົງຊຸກຍູ້ສົ່ງເສີມ ມີຈຳນວນທັງໝົດ 209 ໂຕ ໂດຍການຊຸກຍູ້ລ້ຽງໃນໂຄງການ 2+3 ຊຶ່ງປະກອບມີ 104 ຄອບຄົວ ໃນຈຳນວນ 2 ບ້ານ. ປັດຈຸບັນເກີດລູກແລ້ວ 47 ໂຕ, ໃນນີ້ ບ້ານອອມ ປະກອບມີ 72 ຄອບຄົວ ໄດ້ຮັບງົວ ຈຳນວນ 145 ໂຕ, ປັດຈຸບັນເກີດລູກແລ້ວ 36 ໂຕ ແລະ ກຳລັງຖືພາ 11 ແມ່. ສຳລັບບ້ານກໍໄຮ ແມ່ນໄດ້ຮັບການຊຸກຍູ່ຈາກໂຄງການ 32 ຄອບຄົວ ໃນຈຳນວນງົວ 64 ໂຕ. ປັດຈຸບັນເກີດລູກແລ້ວ 11 ໂຕ ແລະ ກຳລັງຖືພາ 15 ແມ່. ພ້ອມດຽວກັນນີ້ ບ້ານວຽງທອງ ແລະ ບ້ານນາຊົງ ເມືອງທ່າໂທມ ໄດ້ຮັບແນວພັນງົວງວດທຳອິດ ຈຳນວນ 178 ໂຕ, ປັດຈຸບັນເກີດລູກແລ້ວ ຈຳນວນ 12 ໂຕ, ໃນນີ້ ບ້ານນາຊົງ 3 ໂຕ ແລະ ບ້ານວຽງທອງ 9 ໂຕ.

ການລົງຕິດຕາມຊຸກຍູ້ການລ້ຽງງົວ ຂອງປະຊາຊົນ ບ້ານອອມ, ບ້ານກໍໄຮ ເມືອງອະນຸວົງ ແລະ ອີກຈຳນວນ 2 ບ້ານ ຢູ່ເມືອງທ່າໂທມ ຂອງທ່ານ ພົຕ ຄຳລຽງ ອຸທະໄກສອນ, ເຈົ້າແຂວງໄຊສົມບູນ ຄັ້ງນີ້ ທ່ານໄດ້ເນັ້ນໜັກໃຫ້ພະແນກກະສິກຳ ແລະ ປ່າໄມ້ ແຂວງ ກໍຄືຫ້ອງການກະສິກຳ ແລະ ປ່າໄມ້ ທັງສອງເມືອງ ພ້ອມດ້ວຍທຸກພາກສ່ວນທີ່ກ່ຽວຂ້ອງ ຈົ່ງພ້ອມກັນສຸມທຸກກຳລັງແຮງ ແລະ ສະຕິປັນຍາ ຂອງຕົນ ລົງໃກ້ຊິດຕິດແທດເບິ່ງການລ້ຽງຂ້ອງປະຊາຊົນ ຢ່າງເປັນປົກກະຕິ ເພື່ອແນະນຳຄວາມຮູ້ກ່ຽວກັບເຕັກນິກການລ້ຽງ ຂອງເຂົາເຈົ້າ ໃຫ້ຖືກຕ້ອງຕາມຫຼັກວິຊາການ ໂດຍໝູນໃຊ້ລະບົບການລ້ຽງທີ່ທັນສະໄໝ ເພື່ອຮັບປະກັນດ້ານປະສິດທິພາບ ແລະ ໄດ້ຮັບໝາກຜົນທີ່ດີ ພ້ອມທັງຮຽກຮ້ອງໃຫ້ປະຊາຊົນ ຈົ່ງພ້ອມກັນເປັນເຈົ້າການສູງ ໃນການລ້ຽງ ແລະ ດູແລເບິ່ງແຍງ ຈຳນວນງົວ ທີ່ບໍລິສັດ ກຸ່ມຄຳໄພຊະນະ ໄດ້ສະໜອງໃຫ້ເທື່ອນີ້ ດ້ວຍຄວາມເອົາໃຈໃສ່ ເພື່ອໃຫ້ງົວຈຳນວນດັ່ງກ່າວ ເຕີບໃຫຍ່ຂະຫຍາຍຕົວ, ອອກແມ່ແຜ່ລູກ ແລະ ເພີ່ມຈຳນວນຂຶ້ນເລື້ອຍໆ ໃນອະນາຄົດ.

ໂອກາດດຽວກັນນີ້ ທ່ານໄດ້ສະແດງຄວາມຂອບອົກຂອບໃຈ ແລະ ຍ້ອງຍໍຊົມເຊີຍ ມາຍັງທ່ານ ຄຳໄພ ສົມຊະນະ, ປະທານບໍລິສັດ ກຸ່ມຄຳໄພຊະນະ ທີ່ໄດ້ປະກອບສ່ວນອັນສຳຄັນ ເຂົ້າໃນການຊຸກຍູ້ສົ່ງເສີມປະຊາຊົນປູກຝັງ-ລ້ຽງສັດ ເພື່ອຜະລິດເປັນສິນຄ້າ ຕາມແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມ ຂອງລັດ ດ້ວຍນໍ້າໃຈເສຍສະຫຼະຢ່າງສູງສົ່ງ ເພື່ອປັບປຸງຊີວິດການເປັນຢູ່ ຂອງປະຊາຊົນບັນດາເຜົ່າ, ເວົ້າລວມ, ເວົ້າສະເພາະ ກໍຄືປະຊາຊົນຊາວ ແຂວງໄຊສົມບູນ ໃຫ້ມີຖານະຊີວິດທີ່ດີຂຶ້ນ ແລະ ຫຼຸດພົ້ນອອກຈາກຄວາມທຸກຍາກ.

ນອກນີ້ ການລົງຕິດຕາມຊຸກຍູ້ການລ້ຽງງົວ ຂອງປະຊາຊົນສອງເມືອງ ຂອງທ່ານເຈົ້າແຂວງ ເທື່ອນີ້ ຍັງເປັນການຖືໂອກາດ ລົງຢ້ຽມຢາມ ແລະ ພົບປະໂອ້ລົມປະຊາຊົນ ນຳອີກ ທັງໝົດນັ້ນ ເພື່ອລົງຕິດຕາມການດຳລົງຊີວິດ ກໍຄືຄວາມສຸກທຸກຂອງປະຊາຊົນ ເພື່ອຊອກຫາຊ່ອງທາງຊ່ວຍເຫຼືອ ແລະ ປັບປຸງຊີວິດການເປັນຢູ່ ຂອງເຂົາເຈົ້າ ໃຫ້ໄດ້ຮັບການແກ້ໄຂດີຂຶ້ນເລື້ອຍໆ. ທັງສະແດງເຖິງຄວາມເປັນຫ່ວງເປັນໃຍ ຂອງຂັ້ນເທິງ ກໍຄືການນຳແຂວງໄຊສົມບູນ ຊຶ່ງຍາມໃດກໍຖືເອົາການແກ້ໄຂຄວາມທຸກຍາກ ຂອງປະຊາຊົນບັນດາເຜົ່າ ເປັນບັນຫາກົກ ແລະ ຕໍ່ເນື່ອງ ຕະຫຼອດມາ.

ຂ່າວ: ຈິນລະວອນ ວໍລະສົມບູນ, ພາບ: ພາພອນ ນະວົງໄຊ