ກອງບັນຊາການທະຫານເມືອງສະໜາມໄຊ ແຂວງອັດຕະປື ຊັບຊ້ອນຫນ້າທີ່ໃໝ່ຫຼາຍຕໍາແຫນ່ງ

ກອງບັນຊາການທະຫານເມືອງສະໜາມໄຊ ແຂວງອັດຕະປື ຊັບຊ້ອນຫນ້າທີ່ໃໝ່ຫຼາຍຕໍາແຫນ່ງ

August 27, 2020 0 By admin

Media Laos,ໃນວັນທີ 25 ສິງຫາ 2020 ນີ້, ກອງບັນຊາການທະຫານເມືອງສະໜາມໄຊ ຈັດພິທີປະກາດການແຕ່ງຕັ້ງຫົວໜ້າພະແນກ ແລະ ຮອງຫົວໜ້າພະແນກພະລາທິການ ແລະ ມອບ-ຮັບໜ້າທີ່ລະຫວ່າງຜູ້ເກົ່າ ແລະ ຜູ້ໃໝ່ ໂດຍການເປັນປະທານຂອງ ສະຫາຍ ພັນໂທ ສຸດທະນູສອນ ພິດາວົງ ຄະນະພັກກອງບັນຊາການ ຮອງຫົວໜ້າຫ້ອງພະລາທິການ ກອງບັນຊາການທະຫານແຂວງອັດຕະປື, ມີສະຫາຍ ພັນໂທ ບຸນຄ້ຳ ເກີດມະນີວົງ ກຳມະການພັກເມືອງ ເລຂາຄະນະພັກຮາກຖານ ຫົວໜ້າການເມືອງ ກອງບັນຊາການທະຫານເມືອງສະໜາມໄຊ , ມີຄະນະພັກ-ຄະນະກອງບັນຊາການ ພ້ອມດ້ວຍພະແນກການ, ພະນັກງານ-ນັກຮົບເຂົ້າຮ່ວມ.


ສະຫາຍ ຮ້ອຍເອກ ພູໄຂ ສີປະເສີດ ຊ່ວຍວຽກພະແນກພະນັກງານ, ຫ້ອງການເມືອງ ກອງບັນຊາການທະຫານແຂວງອັດຕະປື ຂຶ້ນຜ່ານຂໍ້ຕົກລົງຂອງກອງບັນຊາການທະຫານແຂວງອັດຕະປື, ສະບັບເລກທີ 351/ກບຊ, ລົງວັນທີ 11 ສິງຫາ 2020 ວ່າດ້ວຍອະນຸມັດໃຫ້ນາຍທະຫານພັັກການເພື່ອກຽມຮັບເບ້ຍບຳນານ ອີງຕາມກົດໝາຍນາຍທະຫານກອງທັບປະຊາຊົນລາວ (ສະບັບປັບປຸງ) ພາກທີ III ໝວດທີ 1 ມາດຕາ 33 ວ່າດ້ວຍອາຍຸກະສຽນຮັບບຳນານຂອງນາຍທະຫານ.

ໄດ້ຕົກລົງອະນຸຍາດໃຫ້ສະຫາຍ ພັນຕີ ບຸນມີ ໄຊຍະນາມ ຫົວໜ້າພະແນກພະລາທິການ ກອງບັນຊາການທະຫານເມືອງສະໜາມໄຊ ພັກການເພື່ອກຽມຮັບເບ້ຍບຳນານ,ຂໍ້ຕົກລົງສະບັບເລກທີ 345/ກບຊ, ລົງວັນທີ 11 ສິງຫາ 2020 ວ່າດ້ວຍແຕ່ງຕັ້ງພະນັກງານຂັ້ນຫົວໜ້າພະແນກ, ຮອງພະແນກຢູ່ກອງບັນຊາການທະຫານເມືອງສໜາມໄຊ ທີ່ຂື້ນກັບກອງບັນຊາການທະຫານແຂວງ, ໂດຍອີງຕາມກົດໝາຍນາຍທະຫານກອງທັບປະຊາຊົນລາວ(ສະບັບປັບປຸງ) ພາກທີ II ໝວດທີ 4 ມາດຕາ 26 ວ່າດ້ວຍການແຕ່ງຕັ້ງ, ຍົກຍ້າຍນາຍທະຫານ, ກອງບັນຊາການທະຫານແຂວງຕົກລົງແຕ່ງຕັ້ງ ສະຫາຍ ພັນຕີ ຄອນສະຫວັນ ອຸດທະຈິດ ເປັນຫົວໜ້າພະແນກພະລາທິການ ກອງບັນຊາການທະຫານເມືອງ ແລະ ແຕ່ງຕັ້ງສະຫາຍພັນຕີ ວົງທອງ ນ້ອຍສົມພູ ເປັນຮອງຫົວໜ້າພະແນກພະລາທິການ, ໃນພິທີໄດ້ຮັບຟັງການຜ່ານບົດບັນທຶກມອບ-ຮັບໜ້າທີ່ ຫົວໜ້າພະແນກພະລາທິການ ລະຫວ່າງ ຜູ້ເກົ່າ ແລະ ຜູ້ໃໝ່ ໂດຍແມ່ນສະຫາຍ ພັນຕີ ບຸນມີ ໄຊຍະນາມ ຫົວໜ້າພະແນກພະລາທິການຜູ້ເກົ່າ ຂຶ້ນຜ່ານເນື້ອໃນວຽກງານຕ່າງໆໃນຂົງເຂດພະລາທິການ, ເພື່ອເປັນບ່ອນອີງເຮັດໃຫ້ຜູ້ສືບທອດປ່ຽນແທນ ສືບຕໍ່ຈັດຕັ້ງປະຕິບັດໃນຕໍ່ໜ້າໃຫ້ໄດ້ຮັບໝາກຜົນຕາມຈຸດປະສົງ ແລະ ຄາດໝາຍ, ຈາກນັ້ນໃນພິທີຍັງໄດ້ ເຊັນບົດບັນທຶກມອບ-ຮັບໜ້າທີ່ ລະຫວ່າງສະຫາຍ ພັນຕີ ບຸນມີ ໄຊຍະນາມ ຫົວໜ້າພະແນກພະລາທິການ ຜູ້ເກົ່າ ກັບ ສະຫາຍ ພັນຕີ ຄອນສະຫວັນ ອຸດທະຈິດ ຫົວໜ້າພະແນກພະລາທິການຜູ້ໃໝ່.


ຕອນທ້າຍ ຂອງພິທີໄດ້ຮັບຟັງການໂອ້ລົມຈາກຄະນະປະທານ ເຊິ່ງກອນອື່ນ ສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຄະນະພັກ-ຄະນະບັນຊາ ກໍຄືພະແນກພະລາທິການ ທີ່ຍາດມາໄດ້ໃນໄລຍະຜ່ານມາ ແລະ ຮຽກຮ້ອງໃຫ້ຜູ້ທີ່ໄດ້ຮັບໜ້າທີ່ໃໝ່ຈົ່ງຍົກສູງນໍ້າໃຈຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບມອບ-ໝາຍ, ສືບຕໍ່ເປັນຫຼັກແຫຼ່ງເປັນແບບຢ່າງນໍາໜ້າຮອບດ້ານໃນກໍາລັງປະກອບອາວຸດຂັ້ນທ້ອງຖິ່ນ, ພ້ອມທັງເນັ້ນໜັກໃຫ້ຜູ້ທີ່ໄດ້ຮັບການແຕ່ງຕັ້ງຄັ້ງນີ້ຈົ່ງຍົກສູງຄວາມຮູ້ຄວາມສາມາດໃນການຊີ້ນຳ-ນຳພາໃຫ້ມີຄວາມໜັກແໜ້ນເຂັ້ມແຂງ,ມີຄວາມຮັບຜິດຊອບສູງຕໍ່ໜ້າທີ່ການເມືອງທີ່ໄດ້ມອບໝາຍ, ຕັ້ງໜ້າເຝິກຝົນຫຼໍ່ຫຼອມຕົນເອງທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດເພີ່ມທະວີຄວາມສາມັກຄີພາຍໃນພາຍນອກໃຫ້ແໜ້ນແຟ້ນ, ມີການປຶກສາຫາລືໃນໝູ່ຄະນະ, ມີຄວາມເປັນເອກະພາບໃນທຸກວຽກງານ, ຢຶດໝັ້ນຫຼັກການລວມສູນປະຊາທິປະໄຕ, ສືບຕໍ່ເຮັດວຽກງານສຶກສາອົບຮົມການເມືອງ-ນຳພາແນວຄິດເປັນປະຈຳໃຫ້ລົງເລິກໃກ້ຊິດຕິດແທດຕົວຈິງກັບບັນດາໜ້າວຽກ, ໂດຍສະເພາະແມ່ນວຽກງານພະລາທິການໃຫ້ມີຄວາມເຂັ້ມແຂງ ແລະ ຕິດພັນກັບຂະບວນການຕ່າງໆເພື່ອຈັດຕັ້ງນຳພາກົມກອງກ້າວຂຶ້ນຢ່າງບໍ່ຢຸດຢັ້ງ.

ຂ່າວ: ຄຳໃສ ແດນວົງສາ