ພັອ ຄຳພອນ ສີກຸມພົນ ເປັນເລຂາຄະນະພັກ ກອງບັນຊາການປ້ອງກັນຄວາມສະຫງົບ ແຂວງຄຳມ່ວນ

ພັອ ຄຳພອນ ສີກຸມພົນ ເປັນເລຂາຄະນະພັກ ກອງບັນຊາການປ້ອງກັນຄວາມສະຫງົບ ແຂວງຄຳມ່ວນ

June 21, 2020 0 By admin

ກອງປະຊຸມໃຫຍ່ຄັ້ງທີ III ຂອງອົງຄະນະພັກກອງບັນຊາການປ້ອງກັນຄວາມສະຫງົບ ແຂວງຄຳມ່ວນ ໄດ້ດຳເນີນຂຶ້ນໃນລະຫວ່າງວັນທີ 18-19 ມິຖຸນາ 2020 ພາຍໃຕ້ການເປັນປະທານຂອງສະຫາຍ ພັອ ຄໍາພອນ ສີກຸມພົນ ຮັກສາການເລຂາພັກ ຫົວໜ້າກອງບັນຊາການ ປກສ ແຂວງ, ໂດຍການເປັນກຽດເຂົ້າຮ່ວມຂອງສະຫາຍ ໂອໄດ ສຸດາພອນ ກຳມະການສູນກາງພັກ, ເລຂາພັກແຂວງ, ເຈົ້າແຂວງຄໍາມ່ວນ, ມີບັນດາສະຫາຍຄະນະຊີ້ນຳກອງປະຊຸມໃຫຍ່ຂັ້ນແຂວງ, ຜູ້ຕາງໜ້າກົມໃຫຍ່ການເມືອງ ກະຊວງ ປກສ, ພະແນກການອ້ອມຂ້າງແຂວງ, ຄະນະກອງບັນຊາການ 10 ເມືອງອ້ອມຂ້າງແຂວງ ຕະຫຼອດເຖິງສະມາຊິກພັກສົມບູນຈຳນວນ 185 ສະຫາຍ ເຂົ້່າຮ່ວມ.

ກອງປະຊຸມໄດ້ຮັບຟັງການຜ່ານຮ່າງລາຍງານການເມືອງ, ຕີລາຄາຜົນງານການນຳພາຈັດຕັ້ງປະຕິບັດວຽກງານປ້ອງກັນຄວາມສະຫງົບໃນໄລຍະ 5 ປີຜ່ານມາ ແລະ ບົດສຳຫຼວດການນຳພາລວມຂອງອົງຄະນະພັກ ປກສ ເຊິ່ງທົ່ວອົງຄະນະພັກ ປກສ ແຂວງຄຳມ່ວນ ມີ 2 ຄະນະພັກຮາກຖານ, ມີ 9 ໜ່ວຍພັກຮາກຖານ ແລະ ມີ 9 ໜ່ວຍພັກທີ່ຂຶ້ນກັບຄະນະພັກຮາກຖານ, ມີສະມາຊິກພັກ 722 ສະຫາຍ ທຽບໃສ່ກອງປະຊຸມຄັ້ງທີ່ຜ່ານມາ ສະມາຊິກພັກເພີ່ມຂຶ້ນ 302 ສະຫາຍ, ສາມາດສ້າງສະມາຊິກພັກແຂງໄດ້ 640 ສະຫາຍ ເພີ່ມຂຶ້ນ 394 ສະຫາຍ ເທົ່າກັບ 160%, ເລືອກໄດ້ໜ່ວຍພັກປອດໃສ, ເຂັ້ມແຂງ, ໜັກແໜ້ນໄດ້ 17 ໜ່ວຍພັກ, ຂະຫຍາຍສະມາຊິກພັກໃໝ່ໄດ້ 168 ສະຫາຍ ເພີ່ມຂຶ້ນ 68 ສະຫາຍ.

ວຽກງານປົກປັກຮັກສາຄວາມເປັນລະບຽບຮຽບຮ້ອຍໃນສັງຄົມ ໄດ້ເຄື່ອນໄຫວສະກັດກັ້ນ, ແກ້ໄຂບັນຫາອາດສະຍາກຳຕ່າງໆ ສາມາດມ້າງລາຍຄະດີໄດ້ທັງໝົດ 2.235 ລາຍ, ກັກຜູ້ຖືກຫາໄດ້ 2.282 ຄົນ ໃນນີ້ ແກ້ໄຂສໍາເລັດ 1.863 ລາຍ, ກໍາລັງດໍາເນີນ 372 ລາຍ ທຽບໃສ່ 5 ປີຜ່ານມາຄະດີຫຼຸດລົງ 19%, ມີອຸປະຕິເຫດເກີດຂຶ້ນທັງໝົດ 844 ລາຍ, ຜົນເສຍຫາຍພາຫະນະເປ່ເພ 1.513 ຄັນ, ຄົນໄດ້ຮັບບາດເຈັບ 1.314 ຄົນ, ເສຍຊີວິດ 147 ຄົນ ມີນັກໂທດ, ຜູ້ຖືກຫາ, ຜູ້ຖືກດັດສ້າງທັງໝົດ 3.821 ຄົນ.

ໃນນີ້ ຄົນຕ່າງປະເທດ 268 ຄົນ, ໄດ້ຮັບອະໄພຍະໂທດປ່ອຍຕົວ 122 ຄົນ, ຜ່ອນໂທດ 439 ຄົນ, ປ່ອຍຕົວຕາມກົດໝາຍ 2.051 ຄົນ. ພ້ອມນີ້ຄະນະພັກກຳລັງປ້ອງກັນຄວາມສະຫງົບແຂວງ ຍັງໄດ້ວາງຄາດໝາຍສູ້ຊົນໃນຕໍ່ໜ້າ ເປັນຕົ້ນ: ສູ້ຊົນນຳພາຈັດຕັ້ງປະຕິບັດ 4 ຄາດໝາຍ 4 ແຜນງານ, ເສີມຂະຫຍາຍທາດແທ້, ມູນເຊື້ອຂອງກຳລັງປ້ອງກັນຄວາມສະຫງົບ, ຮັບປະກັນໃຫ້ແຂວງຄຳມ່ວນ ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍ ແລະ ປອດໄພໂດຍພື້ນຖານ.

ປັບປຸງແບບແຜນວິທີນຳພາຂອງຄະນະພັກ-ຄະນະບັນຊາແຕ່ລະຂັ້ນ ໃຫ້ເຂົ້າສູ່ລະບອບ-ລະບຽບ ເທື່ອລະກ້າວ, ກໍ່ສ້າງ ແລະ ປັບປຸງກຳລັງປ້ອງກັນຄວາມສະຫງົບໃຫ້ໜັກແໜ້ນທາງດ້ານການເມືອງ-ແນວຄິດ, ເຂັ້ມແຂງທາງດ້ານການຈັດຕັ້ງ ແລະ ມີຄວາມຊຳນິຊຳນານທາງດ້ານວິຊາສະເພາະ, ຜັນຂະຫຍາຍແນວທາງການຕ່າງປະເທດຂອງພັກ ສອດຫ້ອຍເຂົ້າທຸກວຽກງານປ້ອງກັນຄວາມສະຫງົບດີ, ປັບປຸງວຽກງານເສນາທິການ ຮັບປະກັນຊີ້ນຳ-ບັນຊາ ໂລ່ງລ່ຽນ, ວ່ອງໄວ ແລະ ທັນສະໄໝເປັນກ້າວໆແລະ ບັນດາວຽກງານທີ່ຈະຕ້ອງໄດ້ສຸມໃສ່ໃນຕໍ່ໜ້າອີກຈຳນວນໜຶ່ງ.


ກອງປະຊຸມໄດ້ດຳເນີນການປ່ອນບັດເລືອກເອົາຄະນະພັກຊຸດໃໝ່ ຈຳນວນ 11 ສະຫາຍ ໃນນັ້ນໄດ້ເປັນເອກະພາບເລືອກເອົາຄະນະປະຈຳອົງຄະນະພັກ 3 ສະຫາຍຄື: ສະຫາຍ ພັອ ຄຳພອນ ສີກຸມພົນ, ສະຫາຍ ພັອ ພົມມາ ເດດຂຸນຟອງ ແລະ ສະຫາຍ ພັທ ສຸວັດ ເທບສົມບັດ, ເລືອກເອົາເລຂາ-ຮອງເລຂາ ປະກອບມີ: ສະຫາຍ ພັອ ຄຳພອນ ສີກຸມພົນ ເປັນເລຂາ, ສະຫາຍ ພັອ ພົມມາ ເດດຂຸນຟອງ ເປັນຮອງເລຂາ ແລະ ເລືອກເອົາປະທານ-ຮອງປະທານກວດກາ ປະກອບມີ: ສະຫາຍ ພັທ ສຸວັດ ເທບສົມບັດ ເປັນປະທານກວດກາ ແລະ ສະຫາຍ ພັທ ຄຳສິງ ນົນທະສອນ ເປັນຮອງປະທານກວດກາພັກໃນຊຸດໃໝ່.

 

ແຫຼງທີ່ມາ: Khammouane News,