ທໍາລາຍລະເບີດບໍ່ທັນແຕກຢູ່ເມືອງຕະໂອ້ຍ ແຂວງສາລະວັນ

ທໍາລາຍລະເບີດບໍ່ທັນແຕກຢູ່ເມືອງຕະໂອ້ຍ ແຂວງສາລະວັນ

August 25, 2020 0 By admin

ຄະນະນຳຂັ້ນແຂວງພ້ອມດ້ວຍທິມງານຂັ້ນເມືອງລົງທຳລາຍລະເບີດບໍ່ທັນແຕກຢູ່ ເມືອງຕະໂອ້ຍ ໃນວັນທີ 24 ສິງຫາ 2020 ຢູ່ທີ່ບ້ານຕຸແຕງ.

ນຳທິມ ໂດຍ ທ່ານ ຄຳຕາ ໂຮ່ຊົງເລື່ອງ ກຳມະການພັກແຂວງ ຫົວໜ້າພະແນກ ຮສສ ແຂວງສາລະວັນ, ທ່ານ ເພັດສະໝອນ ຫຼວງລາດ ຮອງເຈົ້າເມືອງຜູ້ຊີ້ນຳວຽກງານວັດທະນະທຳສັງຄົມ, ມີທ່ານ ໜູຕຽມ ຄຳປະເສີດ ຮອງຫົວໜ້າພະແນກພົວພັນຕ່າງປະ​ເທດ, ມີພະແນກການທີ່ກ່ຽວຂ້ອງ ພ້ອມດ້ວຍພະນັກ ງານເກັບກູ້ລະເບີດບໍ່ທັນແຕກເຂົ້າຮ່ວມ.


ຈຸດປະສົງການລົງມາຄັ້ງນີ້ ແມ່ນເພື່ອທຳລາຍລະເບີດທີ່ຍັງບໍ່ທັນແຕກຈຳນວນ 1 ໜ່ວຍ ປະເພດລູກໂບມ ມີເນື້ອ 2 ກວ່າແຮັກຕາ ທີ່ທຳການຜະລິດປະເພດມັນຕົ້ນ ຂອງປະຊາຊົນບ້ານຕຸງແຕງເພື່ອໃຫ້ເຂົາເຈົ້າສະດວກໃນການທຳມາຫາກິນ. ພ້ອມກັນນີ້ພະນັກງານເກັບກູ້ລະເບີດບໍ່ທັນແຕກຍັງໄດ້ລາຍງານກ່ຽວກັບສະພາບຕົວຈິງວ່າ: ໃນປັດຈຸບັນທິມງານເກັບກູ້ລະເບີດບໍ່ທັນແຕກ ໄດ້ມີແຜນງານທີ່ຈະສຳຫຼວດຕື່ມພື້ນທີ່ ດັ່ງກ່າວວ່າຍັງມີລະເບີດ ຫຼື ລູກປືນຫຼາຍສໍ່າໃດ.​


ຕອນທ້າຍ ທ່ານ ເພັດສະໝອນ ຫຼວງລາດ ຮອງເຈົ້າເມືອງຜູ້ຊີ້ນຳວຽກງານວັດທະນະທຳ-ສັງຄົມ ກໍ່ໄດ້ມີຄວາມເຫັນຕໍ່ການທຳລາຍລະເບີດຄັ້ງນີ້. ກ່ອນອື່ນທ່ານກໍ່ໄດ້ຍ້ອງຍໍຊົມເຊີຍທິມງານເກັບກູ້ລະເບີດທີ່ໄດ້ເອົາໃຈໃສ່ຂອງວຽກງານນີ້ຢ່າງເຂັ້ມງວດ, ເຊິ່ງມັນສະແດງໃຫ້ເຫັນເຖິງຜົນງານ ແລະ ຜົນສຳເລັດທີ່ຕາມມາ. ແຕ່ເຖິງຢ່າງໃດກໍ່ຕາມ ແຕ່ລະວຽກງານຕ້ອງໄດ້ເອົາໃຈໃສ່, ມີການວາງແຜນ, ການປະສານງານ ກັບຫ້ອງການທີ່ກ່ຽວຂ້ອງຂັ້ນເມືອງ ແລະ ຂັ້ນບ້ານໃຫ້ລະອຽດຂື້ນຕື່ມ ເພື່ອສະດວກໃນການລົງຈັດຕັ້ງປະຕິບັດຕົວຈິງ.

ໂດຍ:ນັກຂ່າວເມືອງຕະໂອ້ຍ