ນັກທຸລະກິດເຂົ້າສຳປະທານເນື້ອທີ່ 100 ເຮັກຕາ ຢູ່ແຂວງຄຳມ່ວນ ເພື່ອປູກໝາກມ່ວງ, ໝາກພ້າວ ແລະ ໝາກກ້ຽງເປັນສິນຄ້າ

ນັກທຸລະກິດເຂົ້າສຳປະທານເນື້ອທີ່ 100 ເຮັກຕາ ຢູ່ແຂວງຄຳມ່ວນ ເພື່ອປູກໝາກມ່ວງ, ໝາກພ້າວ ແລະ ໝາກກ້ຽງເປັນສິນຄ້າ

August 24, 2020 0 By admin

Media Laos, ພິທີເຊັນສັນຍາວ່າດ້ວຍການສໍາປະທານເນື້ອທີ່ດິນຈຳນວນ 100 ເຮັກຕາ ເພື່ອພັດທະນາໂຄງການກະສິກຳປູກຝັງຢູ່ເຂດບ້ານໂພນເຍຍນ້ອຍ, ເມືອງທ່າແຂກ, ແຂວງຄໍາມ່ວນ ຈັດຂຶ້ນໃນວັນທີ 21 ສິງຫາ 2020 ລະຫວ່າງ ອົງການປົກຄອງແຂວງຄໍາມ່ວນ ຕາງຫນ້າລົງນາມໂດຍທ່ານ ເດດສັກດາ ມະນີຄຳ ຫົວຫນ້າພະແນກແຜນການ ແລະ ການລົງທຶນ ກັບ ທ່ານ ງໍ ໄຊຍະວົງ ຜູ້ອຳນວຍການບໍລິສັດ ງໍ ໄຊຍະວົງ ພັດທະນາກະສິກຳຈຳກັດຜູ້ດຽວ ພ້ອມພະຍານສອງຝ່າຍເຂົ້າຮ່ວມເປັນສັກຂີພິຍານ.


ໂຄງການດັ່ງກ່າວເປັນຮູບແບບການລົງທຶນເອກະຊົນພາຍໃນ 100%. ຈໍານວນເນື້ອທີ່ 100 ເຮັກຕາ. ທາງບໍລິສັດໄດ້ຈັດສັນເຂົ້າໃນການພັດທະນາກະສິກຳປູກຝັງປະເພດໄມ້ໃຫ້ໝາກຄື: ນຳໃຊ້ເຂົ້າໃນການປູກໝາກມ່ວງ 95,5 ເຮັກຕາ, ໝາກກ້ຽງ 2 ເຮັກຕາ, ໜາກພ້າວ 2 ເຮັກຕາ ແລະ ອີກ 0,5 ເຮັກຕາແມ່ນນຳໃຊ້ເຂົ້າໃນການປຸກສ້າງທີຢູ່ອາໄສ.

ຕາມສັນຍາໃນການສຳປະທານໂຄງການມີໄລຍະ 30 ປີ. ນອກນີ້ທາງບໍລິສັດຍັງເຫັນດີປະຕິບັດພັນທະຕ່າງໆຕໍ່ລັດຕາມລະບຽບກົດຫມາຍ ພ້ອມທັງປະກອບສ່ວນພັນທະພັດທະນາສັງຄົມ, ດ້ານສິ່ງແວດລ້ອມ. ສ່ວນດ້ານນະໂຍບາຍທາງບໍລິສັດຈະໄດ້ຮັບການຍົກເວັ້ນເກັບຄ່າເຊົ່າທີ່ດິນ, ຍົກເວັ້ນອາກອນກຳໄລ ແລະ ຍົກເວັ້ນດ້ານອື່ນໆ ຕາມໄລຍະເວລາທີ່ໄດ້ກຳນົດໃນກົດຫມາຍວ່າດ້ວຍສົ່ງເສີມການລົງທຶນ.