ເຈົ້າແຂວງສະຫວັນນະເຂດ ລົງຕິດຕາມຈັດຕັ້ງປະຕິບັດໂຄງການກໍ່ສາງລະບົບນໍ້າປະປາ ພາຍໃນເທດສະບານເມືອງນອງ ແລະ ບ້ານອ້ອມຂ້າງ.

ເຈົ້າແຂວງສະຫວັນນະເຂດ ລົງຕິດຕາມຈັດຕັ້ງປະຕິບັດໂຄງການກໍ່ສາງລະບົບນໍ້າປະປາ ພາຍໃນເທດສະບານເມືອງນອງ ແລະ ບ້ານອ້ອມຂ້າງ.

June 19, 2020 0 By admin

ວິທະຍຸກະຈາຍສຽງ ສະຫວັນນະເຂດ, ໃນໂອກາດທີ່ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມຄະນະນໍາຂອງແຂວງ ແລະ ພາກສ່ວນນັກທຸລະກິດ ໄດ້ລົງຢ້ຽມຢາມເບິ່ງໂຄງການລຶບລ້າງຄວາມທຸກຍາກ ທີ່ເມືອງນອງ ໃນວັນທີ 17 ມິຖຸນາ 2020.ຜ່ານມານີ້ ທ່ານເຈົ້າແຂວງ ພ້ອມຄະນະ ກໍ່ໄດ້ໄປຢ້ຽມຢາມເບິ່ງ ໂຄງການກໍ່ສ້າງລະບົບນ້ຳປະປາ ໃນເທດສະບານເມືອງນອງ.


ທ່ານ ລັດຕະນະ ດວງມາລາ ທີ່ປຶກສາໂຄງການຊັນວິດ ຫຼືໂຄງການຂະຫຍາຍໂຄງລ່າງນ້ຳສະອາດ ແລະ ໂພຊະນາການລາຍງານໃຫ້ຮູ້ວ່າ:ວ່າ: ໂຄງການຊັນວິດ ຫຼືໂຄງການຂະຫຍາຍໂຄງລ່າງນ້ຳສະອາດ ແລະ ໂພຊະນາການ ແມ່ນໄດ້ຮັບທຶນຈາກສະຫະພາບເອີຣົບ ໂດຍຜ່ານທະນາຄານເຢຍລະມັນ, ໂຄງການແມ່ນພາຍໃຕ້ການຊີ້ນຳຂອງກະຊວງໂຍທາທິການ ແລະ ຂົນສົ່ງ ໃນນັ້ນແມ່ນຕ້ອງຂະຫຍາຍໂຄງລ່າງນ້ຳສະອາດ ແລະ ໂພຊະນາການ.

ສະເພາະການຈັດຕັ້ງປະຕິບັດການກໍ່ສ້າງລະບົບອ່າງນ້ຳ ແລະ ລະບົບວາງທໍ່ຕ່າງໆ ຂອງໂຄງການທີ່ເມືອງນອງ ແມ່ນບໍລິສັດໜູຄຳກໍ່ສ້າງເປັນຜູ້ຮັບເໝົາ ໃນມູນຄ່າ 9ຕື້ 500 ລ້ານກ່ວາກີບ, ໃນນັ້ນແມ່ນມີການກໍ່ສ້າງຢູ່ 7 ບ້ານຄື: ບ້ານນອງວິໄລ, ດົງນາສານ, ສະດີ, ຫີນສະຫວ່າງ, ປູນຍາງ, ປູນຕົງ ແລະ ບ້ານປູນສີເຢີງ ເຊິ່ງໄດ້ເລີ່ມກໍ່ສ້າງທີ່ບ້ານນອງວິໄລ ເທດສະບານເມືອງນອງກ່ອນ, ໂຄງການໄດ້ເລີ່ມຈັດຕັ້ງປະຕິບັດໃນວັນທີ 13 ພຶດສະພາ 2020 ແລະ ຈະໃຫ້ສຳເລັດ 100% ໃນເດືອນເມສາ 2021 ນີ້.


ເຊິ່ງທ່ານເຈົ້າແຂວງສະຫວັນະເຂດ ກໍໄດ້ເນັ້ນໃຫ້ບໍລິສັດຮັບເໝົາ ບໍລິສັດໜູຄໍາກໍ່ສ້າງ ຕ້ອງໄດ້ເອົາໃຈໃສ່ເຮັດໃຫ້ຖືກຕ້ອງຕາມຫຼັກວິຊາການ ແລະ ເຮັດໃຫ້ສຳເລັດຕາມຄາດໝາຍທີ່ວາງໄວ້ ທັງນີ້ ກໍເພື່ອເປັນການປະກອບສ່ວນພັດທະນາໃຫ້ເມືອງນອງມີໃບໜ້າໃໝ່ ມີລະບົບນ້ຳປະປາທີ່ສະອາດໃຊ້ ແລະ ພັດທະນາໄດ້ຕາມແຜນງານຂອງກອງປະຊຸມໃຫຍ່ຂັ້ນຂອງຕົນທີ່ວາງໄວ້.