ເຈົ້າແຂວງໆຈໍາປາສັກ ເຄື່ອນໄຫວ ຊຸກຍູ້ວຽກງານ ຮອບດ້ານ ຢູ່ເມືອງສຸຂຸມາ

ເຈົ້າແຂວງໆຈໍາປາສັກ ເຄື່ອນໄຫວ ຊຸກຍູ້ວຽກງານ ຮອບດ້ານ ຢູ່ເມືອງສຸຂຸມາ

August 22, 2020 0 By admin

ຂປລ. ວັນທີ 21 ສິງຫາ 2020 ນີ້, ຢູ່ທີ່ສະໂມສອນເມືອງສຸຂຸມາ, ທ່ານ ວິໄລວົງ ບຸດດາຄຳ ເຈົ້າແຂວງໆຈຳປາສັກ ພ້ອມຄະນະ ໄດ້ເຄື່ອນໄຫວຢ້ຽມຢາມ ຊຸກຍູ້ວຽກງານ ຮອບດ້ານຢູ່ເມືອງສຸຂຸມາ.

ໂດຍການຕິດຕາມຂອງທ່ານ ມະໄລທອງ ກົມມະສິດ ຮອງເຈົ້າແຂວງໆຈໍາປາສັກ, ມີ ຮອງປະທານ ສະພາປະຊາຊົນແຂວງ, ຄະນະກໍາມະການປ້ອງກັນຊາດ ປ້ອງກັນຄວາມສະຫງົບແຂວງ, ການນໍາພະແນກການຂອງແຂວງ, ຄະນະນໍາຂອງເມືອງ, ມີພະນັກງານຫຼັກແຫຼ່ງ, ເລຂາພັກບ້ານ ນາຍບ້ານ ກຸ່ມບ້ານ ອ້ອມຂ້າງເມືອງ ເຂົ້າຮ່ວມ.

ໃນໂອກາດດັ່ງກ່າວ, ທ່ານ ສົມສະໜິດ ສີສັງວອນ ຮອງເຈົ້າເມືອງໆສຸຂຸມາ ໄດ້ລາຍງານສະພາບການຈັດຕັ້ງປະຕິບັດ ແຜນພັດທະນາເສດຖະກິດ ສັງຄົມໃນ 6 ເດືອນ ປີ 2020 ດ້ານມະຫາພາກ ແຜນພັດທະນາເສດຖະກິດ ສັງຄົມຂອງເມືອງ ສູ້ຊົນໃຫ້ລວມຍອດຜະລິດຕະພັນພາຍໃນຂະຫຍາຍຕົວສະເລ່ຍ 8,8%, ສ້າງມູນຄ່າໃຫ້ບັນລຸໄດ້ໝົດປີ 554,85 ຕື້ກີບ, ສະເລ່ຍລາຍຮັບຕໍ່ຫົວຄົນ 8,9 ລ້ານກີບ ຫລື ເທົ່າກັບ 1.033 ໂດລາຕໍ່ປີ, ໃນນັ້ນ ຕ້ອງເຮັດໃຫ້ໂຄງປະກອບເສດຖະກິດຂອງຂະແໜງກະສິກໍາເພິ່ມຂຶ້ນ 4,5 ກວມ 46,58%, ຂະແໜງອຸດສາຫະກໍາເພີ່ມຂຶ້ນ 13% ກວມ 24,23%, ຂະແໜງບໍລິການເພິ່ມຂຶ້ນ 10% ກວມ 29,19% ຂອງລວມຍອດລາຍຮັບທົ່ວເມືອງ.

ຈາກນັ້ນ, ບັນດາ ການນໍາພະແນກການກໍໄດ້ມີຄໍາເຫັນໃນບາງບັນຫາ ຕິດພັນກັບການພັດທະນາເສດຖະກິດ ສັງຄົມ ຂອງເມືອງ ແລະແຂວງ ເປັນຕົ້ນແມ່ນ ສະພາບການຈັດເກັບລາຍຮັບເຂົ້າງົບປະມານ, ສະພາບການລົງທຶນຂອງລັດ, ເອກະຊົນພາຍໃນ ແລະຕ່າງປະເທດ, ການຜະລິດກະສິກໍາ ແລະການພັດທະນາຊົນນະບົດ ແກ້ໄຂຄວາມທຸກຍາກ, ສະພາບການພັດທະນາໃນຂົງເຂດ ວັດທະນະທໍາ ສັງຄົມ ແລະສະພາບການຈັດຕັ້ງປະຕິບັດ ມາດຕະການປ້ອງກັນການລະບາດຂອງພະຍາດໂຄວິດ 19 ແລະວຽກງານຮັກສາຄວາມສະຫງົບ ຄວາມເປັນລະບຽບຮຽບຮ້ອຍ ຕາມບໍລິເວນຊາຍແດນ.

ໂອກາດນີ້, ທ່ານ ວິໄລວົງ ບຸດດາຄໍາ ເຈົ້າແຂວງໆຈໍາປາສັກ ກໍໄດ້ມີຄໍາເຫັນ ຊີ້ນໍາຕໍ່ກອງປະຊຸມ ໃຫ້ສືບຕໍ່ສຸມໃສ່ ຊີ້ນຳ-ນຳພາ ທຸກຂະແໜງການ ສ້າງຂະບວນການ ຕ້ອນຮັບກອງປະຊຸມໃຫຍ່ ຂອງພັກ ໃຫ້ມີບັນຍາກາດຟົດຟື້ນດີ, ເອົາໃຈໃສ່ວຽກງານສຶກສາອົບຮົມ ການເມືອງ ແນວຄິດ, ຖືເອົາການຫັນລົງກໍ່ສ້າງຮາກຖານການເມືອງ ແລະພັດທະນາຊົນນະບົດ ເປັນວຽກງານງານຕົ້ນຕໍ ແລະສືບຕໍ່ເອົາໃຈໃສ່ຮັກສາຄວາມເປັນລະບຽບຮຽບຮ້ອຍ ສະພາບຊາຍແດນໃຫ້ມີຄວາມສະຫງົບໂດຍພື້ນຖານ.

ໃນຕອນບ່າຍວັນດຽວກັນ, ທ່ານ ເຈົ້າແຂວງໆຈຳປາສັກ ພ້ອມຄະນະ ໄດ້ເຄື່ອນໄຫວພົບປະໂອ້ລົມ ຄະນະພັກ, ອົງການປົກຄອງບ້ານ ແລະພໍ່ແມ່ປະຊາຊົນ ບ້ານໃຫຍ່ ບ້ານຫຽງ ແລະ ບ້ານລຽບຕາມຊາຍແດນ ເພື່ອຊຸກຍູ້ການຈັດຕັ້ງປະຕິບັດວຽກງານຮອບດ້ານຂອງບ້ານ ໃຫ້ມີຜົນສໍາເລັດໃໝ່ໃຫຍ່ຫລວງກວ່າເກົ່າ.

ໃນໂອກາດ ມາເຄື່ອນໄຫວຢ້ຽມຢາມ ຊຸກຍູ້ວຽກງານຢູ່ເມືອງສຸຂຸມາ ເທື່ອນີ້ ຄະນະຍັງໄດ້ ເຂົ້າສໍາຫລວດເບິ່ງຕະຫລາດເທດສະບານເມືອງສຸຂຸມາ, ດ່ານປະເພນີຊ່ອງຕາອູ ແລະສວນໝາກເຜັດຂອງປະຊາຊົນ ຢູ່ບ້ານບຸ່ງແກ້ວ ເພື່ອຊຸກຍູ້ໃຫ້ມີການພັດທະນາດີຂຶ້ນໄປເລື້ອຍໆ.

ຂ່າວ: ທັດຊະນະ ນັກຂ່າວຫ້ອງວ່າການແຂວງ.