ຝົນຕົກໜັກເຮັດໃຫ້ 7 ບ້ານຂອງເມືອງພຽງຖືກນໍ້າຖ້ວມ

August 21, 2020 0 By admin

ຈາກສະພາບຝົກຕົກໜັກໃນຕ້ອນແລງຂອງວັນທີ 20 ສິງຫາ 2020 ຕະຫຼອດຄືນຈົນເຖີງຕ້ອນເຊົ້າຂອງວັນທີ 21 ສີງຫາ 2020ນີ້ໄດ້ສົ່ງຜົນໃຫ້ປະລິມານນ້ຳຝົນ ແລະ ແມ່ນ້ຳຫຼາຍສາຍມີລະດັບນ້ຳສູງຂື້ນໂດຍສະເພາະແມ່ນ ນ້ຳຕອມ, ນ້ຳຕານ ແລະ ນ້ຳລວກໄດ້ໄຫຼເຂົ້າຖ້ວມບ້ານເຮືອນ ໄຮ່ນາຮົ້ວສວນເສັ້ນທາງການສັນຈອນ ແລະ ຂົ້ວຂ້າມທາງເຂົ້າບ້ານຂອງປະຊາຊົນ 7 ບ້ານຄື: ບ້ານນາແຄມ, ນາຊີງ, ນາກອກ ບ້ານກາງ, ຫຼວຍຊາກ, ປາກຊອງ, ນາມໍ້ ເມືອງພຽງ ແຂວງໄຊຍະບູລີ

ໂດຍສະເພາະ ແມ່ນເຂດບ່ອນຮາບພຽງ, ຈຸດຮັບນ້ຳຂອບເຂດທີ່ຕໍາ ສົ່ງຜົນເຮັດໃຫ້ສັດລ້ຽງ, ເຄຶ່ອງໃຊ້ສອຍ, ເຮືອນຊານບ້ານຊ່ອງ, ໄຮ່ນາຮົ້ວສວນ ແລະ ຖະໜົນຫົນທາງໄດ້ຮັບຄວາມເສຍຫາຍຈຳນວນໜຶ່ງ.

ຕໍ່ກັບສະພາບການດັ່ງກ່າວທາງຄະນະພັກອຳນາດການປົກຄອງເມືອງເຊິ່ງນຳໂດຍທ່ານ ເສິດ ແສງສຸລິນ ເຈົ້າເມືອງໆພຽງພ້ອມທັງທິມງານຂອງ ສະມາຊິກສະພາແຫ່ງຊາດເຂດເລືອກຕັ້ງທີ່ 7 ແຂວງໄຊຍະບູລີ ຄະນະສະເພາະກິດຕ້ານໄພພິບັດຂັ້ນເມືອງ ເຈົ້າໜ້າທີ ແລະ ພາກສ່ວນທີ່ກ່ຽວຂ້ອງໄດ້ລົງຕິດຕາມເຝົ້າລະວັງ ໃຫ້ການຊ່ວຍເຫຼືອພໍ່ແມ່ປະຊາຊົນທີ່ຖືກຜົນກະທົບດ້ວຍການຂົນຍ້າຍເຄຶ່ອງຂອງ ແລະ ສັດລ້ຽງອອກໄປໄວ້ເຂດທີປອດໄພພ້ອມທັງເກັບກຳຂໍ້ມູນຄວາມເສຍຫາຍ ເພຶ່ອໃຫ້ການຊ່ວຍເຫຼືອໃນເບື້ອງຕົ້ນ.

ຕໍ່ກັບສະພາບການດັ່ງກ່າວ ທາງຄະນະພັກອຳນາດການປົກຄອງເມືອງກໍ່ໄດ້ສະແດງຄວາມເປັນຫ່ວງເປັນໄຍ ແລະ ຮຽກຮ້ອງມາຍັງທຸກພາກສ່ວນທີ່ກ່ຽວຂ້ອງ ແລະ ປະຊາຊົນທີ່ຢູ່ໃນຂອບເຂດທີ່ມີຄວາມສ່ຽງ ຈົ່ງໄດ້ມີສະຕິພ້ອມກັນເຝົ້າລະວັງສະພາບການດັ່ງກ່າວເພຶ່ອຫຼີກລ້ຽງຜົນກະທົບຜົນເສຍຫາຍທີ່ຈະສົ່ງຜົນສະທ້ອນຕໍ່ຊີວິດ ແລະ ສັບສີນ ໃຫ້ໄດ້ຮັບຜົນກະທົບໜ້ອຍທີ່ສຸດ.

ຂໍ້ມູນ: ຈາກນັກຂ່າວເມືອງພຽງ.