ຮອງເຈົ້າແຂວງສະຫວັນນະເຂດ ລົງຕິດຕາມເບິ່ງຕະຝັ່ງເຈື່ອນແຄມເຊບັ້ງໄຟ ເມືອງໄຊບູລີ ພ້ອມທັງມອບເຄື່ອງອຸປະໂພກ-ບໍລິໂພກ ໃຫ້ບ້ານທ່າຂາມ

ຮອງເຈົ້າແຂວງສະຫວັນນະເຂດ ລົງຕິດຕາມເບິ່ງຕະຝັ່ງເຈື່ອນແຄມເຊບັ້ງໄຟ ເມືອງໄຊບູລີ ພ້ອມທັງມອບເຄື່ອງອຸປະໂພກ-ບໍລິໂພກ ໃຫ້ບ້ານທ່າຂາມ

August 20, 2020 0 By admin

ວິທະຍຸກະຈາຍສຽງ ສະຫວັນນະເຂດ, ໃນຕອນເຊົ້າວັນທີ 19 ສິງຫາ 2020ນີ້ ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ ພ້ອມຄະນະພະແນກກະສິກຳ ແລະ ປ່າໄມ້, ພະແນກພະລັງງານ ແລະບໍ່ແຮ່,ພະແນກໂຍທາທິການ ແລະ ຂົນສົ່ງ ແລະ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ ພ້ອມດ້ວຍ ອໍານາດການປົກຄອງເມືອງໄຊບູລີໄດ້ລົງຕິດຕາມເບິ່ງຄວາມເສຍຫາຍຂອງປະຊາຊົນເຫດຕະຝັ່ງເຊາະເຈື່ອນແຄມເຊບັ້ງໄຟ ບ້ານ ທ່າຂາມ ແລະ ບ້ານຕ່າງໆ ລຽບແຄມເຊບັ້ງໄຟທີ່ໄດ້ຮັບຜົນກະທົບ.


ທ່ານ ອ່ອນລຳພັນ ບົວສີແກ້ວ ເຈົ້າເມືອງໄຊບູລີ ລາຍງານວ່າ: ບ້ານທີ່ຢູ່ໃກ້ແຄມເຊບັ້ງໄຟ ທີ່ໄດ້ຮັບຜົນກະທົບຈາກຕະຝັ່ງເຈື່ອນໃນທຸກປີ ມີ: ບ້ານປາກເຊບັ້ງໄຟ, ບົວໄຂ, ນາສັງ, ທ່າຂາມ, ແກ້ງໂພສີ, ກ້າງປາ, ດ້າງສະຫວັນ, ບຶງເຊ, ຫາດຊາຍສູງ, ສະກອງ ແລະ ບ້ານ ຜັກເພື້ອ, ໃນຕົ້ນເດືອນສິງຫາ ປີ 2020 ບ້ານທ່າຂາມ ຖືກຜົນກະທົບຈາກດິນເຊາະເຈື່ອນແຄມເຊ ມີຢູ່ 4 ຄອບຄົວ ຜົນເສຍຫາຍ ມີເລົ້າເຂົ້າ 1 ຫຼັງໄດ້ມ້າງອອກທັນ, ເຂົ້າເປືອກ 5 ສອບຕົກເຮ່ຍໃນເວລາຂົນຍ້າຍອອກ, ຫ້ອງນໍ້າເສຍຫາຍໃຊ້ບໍ່ໄດ້ມ້າງເອົາແຕ່ໄມ້ ແລະ ສັງກະສີ, ຕົ້ນໝາກ 4 ຕົ້ນ, ຕົ້ນພ້າວ 1 ຕົ້ນ ມູນຄ່າປະເມີນ 5 ລ້ານກວ່າກີບ ພ້ອມນັ້ນກໍ່ຍັງໄດ້ແຈ້ງລະດົມອໍານາດປົກຄອງບ້ານລະດົມແຮງຊ່ວຍກັນມ້າງເຮືອນຈໍານວນ 4 ຫຼັງ, ຫ້ອງນໍ້າ 1 ຫຼັງທີ່ມີຄວາມສ່ຽງ ແລະໄດ້ຍ້າຍອອກໄປປຸກບ່ອນໃໝ່.


ໂອກາດນີ້ທ່ານ ຮອງເຈົ້າແຂວງ ພ້ອມພະແນກການທີ່ກ່ຽວຂ້ອງມີພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ, ພະແນກພະລັງງານ ແລະ ບໍ່ແຮງ, ພະແນກ ກະສິກຳ ແລະ ປ່າໄມ້ ແລະ ພະແນກໂຍທາທິການ ແລະ ຂົນສົ່ງກໍ່ໄດ້ມອບເຄື່ອງຊ່ວຍເຫຼືອໃຫ້ ປະຊາຊົນບ້ານທ່າຂາມ ທີ່ໄດ້ຮັບຜົນເສຍຫາຍຈາກດິນ ເຊາະເຈື່ອນ ເຊິ່ງເຄື່ອງທີ່ນໍາມາມອບຄັ້ງນີ້ມີ ຕະປູ 8 ແລະ ຕະປູ 12 ລວມມີ 6ແກັດ, ນ້ຳດື່ມ 120 ແຟັກ, ໝີ່ 12 ແກັດ, ປາກະປ໋ອງ 6 ແພັກ ແລະ ເຂົ້າສານ 3 ສອບ 150 ກິໂລກຼາມ ໂດຍຕາງໜ້າຮັບຂອງທ່ານເຈົ້າເມືອງ ແລະ ອໍານາດການປົກຄອງບ້ານທ່າຂາມ.


ໃນເວລາຕໍ່ມາ ທ່ານຮອງເຈົ້າແຂວງສະຫວັນະເຂດ ພ້ອມຄະນະ ກໍ່ໄດ້ເລາະເບິ່ງຕາມຈຸດຕ່າງໆຕາມລຽບແຄມເຊບັ້ງໄຟ ເຊິ່ງບ້ານເຮືອນ, ວັດ, ໂຮງຮຽນ ກຳລັງໄດ້ຮັບຜົນກະທົບຈາກດິນເຊເຊາະເຈື່ອນ, ສະເພາະບ້ານບົວໄຂໄດ້ຮັບຜົນກະທົບໃນປີຜ່ານມາ ເຊິ່ງປະຊາຊົນທີ່ຢູ່ແຄມຝັ່ງເຊໄດ້ມ້າງເຮືອນໄປແລ້ວໃນຕົ້ນປີ 2019 ມີ 7 ຫຼັງ ແລະ ໃນປີ 2020 ມ້າງແລ້ວ 5 ຫຼັງ, ແລະຍັງມີແຜນຈະມ້າງອີກ 10 ຫຼັງ.


ຈາກການເລາະເບິ່ງຜົນເສຍຫາຍຕົວຈິງ ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ ກໍ່ໄດ້ເນັ້ນໜັກໃຫ້ອໍານາດປົກຄອງເມືອງ ແລະ ບ້ານ ຈົ່ງເອົາໃຈໃສ່ຕິດຕາມແຕ່ລະບ້ານທີ່ຢູ່ແຄມຝັ່ງເຊບັ້ງໄຟ ແລະ ເກັບກໍາຂໍ້ມູນຢ່າງລະອຽດພ້ອມທັງລາຍງານເປັນປະຈໍາ ເພື່ອສະເໜີໃຫ້ທາງການນໍາຂອງແຂວງໄດ້ຮັບຮູ້ ເພື່ອຈະໄດ້ມີການຄົ້ນຄວ້າປຶກສາຫາລືກັນ ແລະ ຊອກຫາສາເຫດທີ່ແທ້ຈິງທີ່ພາໃຫ້ເຫດການດິນເຊາະເຈື່ອນຄັ້ງນີ້ໄດ້ຮັບການ ແກ້ໄຂໄດ້ຢ່າງວ່ອງໄວ ແລະ ທັນການ.