ຮອງເຈົ້າແຂວງສະຫວັນນະເຂດຕິດຕາມເບິ່ງການສຳເລັດ ການກໍ່້ສ້າງໂຄງການຕ້ານເຈື່ອນປ້ອງກັນຊົນລະປະທານ ແລະ ຄູປ້ອງກັນນໍ້າຖ້ວມ ເຂດເມືອງໄຊບູລີ.

ຮອງເຈົ້າແຂວງສະຫວັນນະເຂດຕິດຕາມເບິ່ງການສຳເລັດ ການກໍ່້ສ້າງໂຄງການຕ້ານເຈື່ອນປ້ອງກັນຊົນລະປະທານ ແລະ ຄູປ້ອງກັນນໍ້າຖ້ວມ ເຂດເມືອງໄຊບູລີ.

August 20, 2020 0 By admin

ດ້ວຍຄວາມເປັນຫ່ວງເປັນໃຍຂອງການນໍາແຂວງທີ່ມີຕໍ່ປະຊາຊົນໃນການຜະລິດເປັນສິນຄ້າຢູ່ຕາມທ້ອງຖິ່ນຕ່າງໆ, ດັ່ງນັ້ນມາໃນຕອນບ່າຍວັນທີ 19 ສິງຫາ 2020 ນີ້ ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ ພ້ອມດ້ວຍພະແນກການເງິນແຂວງ, ພະແນກແຜນການ – ການລົງທຶນ, ພະແນກກະສິກຳ ແລະ ປ່າໄມ້, ພະແນກພະລັງງານ ແລະ ບໍ່ແຮ່, ພະແນກໂຍທາທິການ ແລະ ຂົນສົ່ງ ແລະ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ ພ້ອມດ້ວຍ ອໍານາດການປົກຄອງເມືອງໄຊບູລີ, ໄດ້ລົງຕິດຕາມເບິ່ງໂຄງການສ້າງຕ້ານເຈື່ອນປ້ອງກັນຊົນລະປະທານ ທີ່ບ້ານກ້າງປາ ແລະ ເບິ່ງຄູປ້ອງກັນນໍ້າຖ້ວມໃນເຂດຕ່າງໆຂອງເມືອງໄຊບູລີ.


ທ່ານ ໜູຜາດ ທິລາວົງ ຜູ້ອຳນວຍການບໍລິສັດໜູຄຳກໍ່ສ້າງ ໃນນາມຜູ້ຮັບເໝົາກໍ່ສ້າງບັນດາຄູກັ້ນນ້ຳ ແລະ ໂຄງການຕ້ານເຈື່ອນແຄມເຊ ເຂດບ້ານກ້າງປາ ໄດ້ໃຫ້ສຳພາດຕໍ່ຜູ້ສື່ຂ່າວຂອງພວກເຮົາວ່າ: ໃນເມືອງໄຊບູລີ ທາງບໍລິສັດໜູຄໍາກໍ່ສ້າງແມ່ນໄດ້ຮັບເໝົາກໍ່ສ້າງຢູ່ 2 ໂຄງການ ຄື: ໂຄງການສ້າງຕ້ານເຈື່ອນປ້ອງກັນລະບົບຫົວງານຊົນລະປະທານ ບ້ານກ້າງປາ 1 ແລະ ຄູປ້ອງກັນນໍ້າຖ້ວມບ້ານດ້າງສະຫວັນຫາຫ້ວຍສີໄຄ ເຊິ່ງເປັນໂຄງການຟື້ນຟູຫຼັງນໍ້າຖ້ວມຈາກໄພພິບັດລະດູຝົນປີ 2019 ຜ່ານມາ.

ໃນຄູກັນນໍ້າຖ້ວມມີ 2ສັນຍາຄື: ແຕ່ບ້ານຕົ້ນແຫນຫາບ້າງບຶງເຊມີລວງຍາວ 660 ແມັດໜ້າທາງກວ້າງ 5 ແມັດ,ມີມູນຄ່າຢູ່1 ຕື້ 300 ລ້ານກວ່າກີບ,ສັນຍາທີ 2ແຕ່ບ້ານບຶງເຊຫາ ບ້ານຫາດຊາຍສູງມີລວງຍາວ1.210 ແມັດ ມີມູນຄ່າ800ລ້ານກ່ວາກີບ, ໃນ2ສັນຍາແມ່ນທາງບໍລິສັດໄດ້ຂຸ້ນຂ້ຽວພາຍຫລັງທີ່ໄດ້ເຊັນສັນຍາກັບເຈົ້າຂອງໂຄງການຄືພະແນກກະສິກຳແລະປ່າໄປແຂວງ.

ໄດ້ເລີ່ມກໍ່ສ້າງແຕ່ຕົ້ນເດືອນພຶດສະພາ2020ແລະໄດ້ສຳເລັດໃນວັນທີ10ກໍລະກົດ2020ໃຊ້ເວລາປະມານ2ເດືອນເຮັດໃຫ້ໂຄງການສຳເລັດຢ່າງຈົບງາມ, ສຳລັບໂຄງການສ້າງຕ້ານເຈື່ອນປ້ອງກັນລະບົບຫົວງານຊົນລະປະທານ ບ້ານກ້າງປາ 1 ເຊິ່ງແມ່ນຈັກສູບນໍ້າທີ່ຖືກຜົນກະທົບຮຸນແຮງຈາກໄພພິບັດ ຈຶ່ງມີການສ້ອມແປງ ແລະ ສ້າງຕ້ານເຈື່ອນມີມູນຄ່າການກໍ່ສ້າງທັງໝົດ 2 ຕຶ້ 9 ລ້ານກີບ ໄດ້ລົງມາຈັດຕັ້ງປະຕິບັດແຕ່ວັນທີ 25 ພຶດສະພາ ແລະ ໄດ້ສຳເລັດໃນວັນທີ25ມິຖຸນາ2020,ການສ້າງຕ້ານເຈື່ອນແມ່ນເບື້ອງລະ 50 ແມັດ ລວມເປັນ 100 ແມັດ ໄດ້ກໍ່ສ້າງດ້ວຍຫີນລຽງຖົມດ້ວຍຊາຍ ແລະ ປູດ້ວຍຜ້າສຸວະເຕັກຊັ້ນພື້ນຖານຮອງດ້ວຍຫີນຄູຂະໜາດ5,10 ຄວາມໜາຂອງຕະຝັ່ງແມ່ນ 50 ຊັງຕີແມັດ ມີຄູກັນນໍ້າຖ້ວມໜາສູງ 1ແມັດ, ກ້ວາງ 1 ແມັດ ເຊິ່ງການກໍ່ສ້າງໄດ້ສຳເລັດກ່ອນແຜນການ.


ໃນເວລາຕໍ່ມາ ທ່ານຮອງເຈົ້າແຂວງສະຫວັນະເຂດ ກໍ່ໄດ້ໄປເລາະເບິ່ງລະບົບຄູກັ້ນນໍ້າ ແລະ ຄອງຊົນລະປະທານຕາມຈຸດຕ່າງໆ ທີ່ໄດ້ຮັບການເປ່ເພໃນລະດູຝົນປີ 2019 ແລະໄດ້ຮັບການສ້ອມແປງສຳເລັດ ເພື່ອກະກຽມຕ້ານແລ້ງນາປີ 2020 ແລະສຸມໃສ່ການຜະລິດນາແຊງຂອງປະຊາຊົນໃນສົກປີ 2020-2021 ກໍ່ຄືການຜະລິດສະບຽງອາຫານໃຫ້ໄດ້ຕາມຄາດໝາຍທີ່ວາງໄວ້.

ພ້ອມນັ້ນທ່ານກໍ່ໄດ້ແນະນໍາໃຫ້ພາກສ່ວນທີ່ກ່ຽວຂ້ອງ ແລະ ອຳນາດການປົກຄອງເມືອງ ຈົ່ງເອົາໃຈໃສ່ຕໍ່ການຜະລິດຂອງປະຊາຊົນ, ຕິດຕາມກວດກາເບິ່ງຂໍ້ສະດວກ ຫຍຸ້ງຍາກຕໍ່ປັດໃຈການຜະລິດ ກໍຄືລະບົບຊົນລະປະທານຕ່າງໆ ເພື່ອສ້າງຄວາມສະດວກແກ່ການຜະລິດ, ເຊິ່ງປະຊາຊົນເມືອງໄຊບູລີ ຍາມໃດກໍ່ມີພື້ນຖານທີ່ດຸໝັ່ນ ປະຊາຊົນສຸມໃສ່ການປູກຝັງ ແລະ ລ້ຽງສັດເປັນສິນຄ້າ ດັ່ງນັ້ນອຳນາດການປົກຄອງແຕ່ລະຂັ້ນກໍ່ຕ້ອງສ້າງສິ່ງອຳນວຍຄວາມສະດວກແກ່ການຜະລິດຂອງປະຊາຊົນ.

ພາບ-ຂ່າວ: ວິລັດດາ ດວງຈັນທາ