24 ສິງຫານີ້! ສປປ ລາວ ຈະເປັນເຈົ້າພາບ ຈັດກອງປະຊຸມຜູ້ນໍາຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 3

24 ສິງຫານີ້! ສປປ ລາວ ຈະເປັນເຈົ້າພາບ ຈັດກອງປະຊຸມຜູ້ນໍາຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 3

August 20, 2020 0 By admin

ກອງປະຊຸມຜູ້ນໍາຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 3 ໃນຮູບແບບກອງປະຊຸມທາງໄກ ຈະມີຂຶ້ນໃນວັນທີ 24 ສິງຫາ 2020 ໂດຍ ສປປ ລາວ ຈະເປັນເຈົ້າພາບ ພາຍໃຕ້ການເປັນປະທານຮ່ວມ ລະຫວ່າງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ຫລີ ເຄີ້ສຽງ ນາຍົກລັດຖະມົນຕີ ແຫ່ງ ສປ ຈີນ ແລະ ບັນດາຜູ້ນໍາຈາກ 4 ປະເທດສະມາຊິກ ຄື: ກໍາປູເຈຍ, ມຽນມາ, ໄທ ແລະ ຫວຽດນາມ ໂດຍພາຍໃຕ້ຄໍາຂວັນ: “ເພີ່ມທະວີການຮ່ວມມື ເພື່ອຄວາມສົມບູນພູນສຸກຮ່ວມກັນ” (Enhancing Partnership for Shared Prosperity).

ກອງປະຊຸມຄັ້ງນີ້, ຈະໄດ້ທົບທວນຄືນໝາກຜົນຂອງການຮ່ວມມືໃນໄລຍະຜ່ານມາ ແລະ ວາງທິດທາງໃນຕໍ່ໜ້າ ຂອງຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ. ພ້ອມດຽວກັນນັ້ນ, ກໍຈະໄດ້ປຶກສາຫາລື ແລະ ຮັບຮອງເອົາເອກະສານສໍາຄັນຈໍານວນໜຶ່ງ ເພື່ອເປັນພື້ນຖານໃຫ້ແກ່ການຈັດຕັ້ງຜັນຂະຫຍາຍຂອບການຮ່ວມມືດັ່ງກ່າວ. ນອກຈາກນັ້ນ, ຍັງຈະໄດ້ມີພິທີມອບ-ຮັບໜ້າທີ່ ການເປັນປະທານຮ່ວມໃນນາມປະເທດແມ່ນໍ້າຂອງຈາກ ສປປ ລາວ ໃຫ້ ມຽນມາ ສືບຕໍ່ໜ້າທີ່ເປັນປະທານຮ່ວມ ກັບ ສປ ຈີນ ໃນໄລຍະ 2 ປີຂ້າງໜ້າ.

ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ໄດ້ຖືກສ້າງຕັ້ງຂຶ້ນໃນປີ 2015 ໂດຍປະກອບມີ 6 ປະເທດສະມາຊິກ ຄື: ສປປ ລາວ, ກໍາປູເຈຍ, ມຽນມາ, ໄທ, ຫວຽດນາມ ແລະ ສປ. ຈີນ, ເຊິ່ງມີເປົ້າໝາຍການຮ່ວມມື ເພື່ອພັດທະນາເສດຖະກິດ-ສັງຄົມໃນພາກພື້ນແມ່ນໍ້າຂອງບົນພື້ນຖານ 3 ເສົ້າຄໍ້າ (ການເມືອງ-ຄວາມໝັ້ນຄົງ, ເສດຖະກິດ ແລະ ການພັດທະນາແບບຍືນຍົງ, ສັງຄົມ-ວັດທະນະທຳ ແລະ ການໄປມາຫາສູ່ຂອງປະຊາຊົນ) ແລະ 5 ຂົງເຂດບູລິມະສິດ (ການຄຸ້ມຄອງຊັບພະຍາກອນນໍ້າ, ການເຊື່ອມຈອດ, ກະສິກຳ ແລະ ລືບລ້າງຄວາມທຸກຍາກ, ສ້າງຄວາມອາດສາມາດໃນການຜະລິດ, ເສດຖະກິດຂ້າມຊາຍແດນ). ສປປ ລາວ ໄດ້ຮັບໜ້າທີ່ການເປັນປະທານຮ່ວມ ໃນນາມປະເທດແມ່ນໍ້າຂອງ ຕໍ່ຈາກ ກໍາປູເຈຍ ໃນ ປີ 2018-2020.

ຂ່າວ ແລະ ພາບ: ປະເທດລາວ Pathedlao