ແຂວງສາ​ລະ​ວັນ ກຽມ​ຮັບ​ຮອງ​ເອົາ ຫໍພຣະໄຕປີດົກວັດກາງ ເຂົ້າເປັນມໍລະດົກທ້ອງຖີ່ນ

ແຂວງສາ​ລະ​ວັນ ກຽມ​ຮັບ​ຮອງ​ເອົາ ຫໍພຣະໄຕປີດົກວັດກາງ ເຂົ້າເປັນມໍລະດົກທ້ອງຖີ່ນ

August 20, 2020 0 By admin

ແຂວງສາລະວັນ ກຽມຮັບຮອງເອົາຫໍພຣະໄຕປີດົກວັດກາງ ເຂົ້າເປັນມໍລະດົກທ້ອງຖີ່ນ !!! ເມື່ອອາທິດທີ່ຜ່ານມາ, ພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງສາລະວັນ ຮ່ວມກັບ ຫ້ອງການ ອພສ ແຂວງ, ເຈົ້າອະທິການວັດສີມຸງຄຸນ, ຂະແໜງການ, ອົງການທີ່ກ່ຽວຂ້ອງຂັ້ນແຂວງ-ເມືອງ ໄດ້ຈັດກອງປະຊຸມປຶກສາຫາລື ກ່ຽວກັບການຂຶ້ນທະບຽນພຣະພຸດທະຮູບ ແລະ ເກັບກໍາຂໍ້ມູນເພື່ອກຽມທີ່ຈະຮັບຮອງເອົາ ຫໍພຣະໄຕປີດົກ ວັດກາງ ເມືອງ ແລະ ແຂວງສາລະວັນ ເປັນມໍລະດົກຂອງທ້ອງຖີ່ນ

ຫໍໄຕວັດກາງ ຕັ້ງຢູ່ ບ້ານວັດກາງ ເມືອງສາລະວັນ ແຂວງສາລະວັນ ເປັນຫໍໄຕທີ່ງົດງາມ ເປັນມໍລະດົກອັນລໍ້າຄ່າ ທາງດ້ານວັດທະນະທໍາ, ເປັນສີມືອັນປານີດ ຂອງນັກຈິດຕະກອນບູຮານ, ເປັນຄັງສາງພະໄຕປີດົກ ຂອງສາດສະໜາພຸດ ນັບແຕ່ປະຖົມມະການ ແປດໝື່ນທຳມະຂັນ ໜັງສືສູດເທດ ແລະ ຄຳສອນຕ່າງໆ ລ້ວນແຕ່ແມ່ນພູມປັນຍາຂອງນັກປາດ.

ສ້າງຂຶ້ນປີ ຄສ 1857 ທ້າຍການປົກຄອງ ຂອງສັກດີນາສະຫຍາມ, ໂດຍການເປັນເຈົ້າສັດທາ ຂອງພະເອກະລາດທີ 6; ທ້າວເຫງົ້າຊຽງກັນຍາ ແລະ ໄພ່ພົນໂຍທາ ໃນຂອບເຂດສາລະວັນ. ພະຍາເຫງົ້າຊຽງກັນຍາ ໄດ້ນິມົນ ອາຈານຄູຈາກເມືອງ ນະຄອນລາດຊະສີມາ, ການເປັນຊ່າງນຳພາ ການກໍ່ສ້າງ ຄູ່ກັບສິມຫຼັງເກົ່າ ຂ້າງຫ້ອງການ ປກສ ແຂວງສາລະວັນ ປັດຈຸບັນ, ໂດຍ ວັດສະດຸກໍ່ສ້າງ ແມ່ນໄມ້ກັບດິນ,ປະກອບມີ ເສົາ54 ຕົ້ນ, ວາດຊົງລາວບູຮານເຊັ່ນ: ໂດຍໃຊ້ ສິ່ວເຈາະຮູ, ຕອກລູກໄມ້ຄັດຕ່າງໆ ສ່ວນຫຼາຍແມ່ນໃຊ້ໄມ້ ເຊັ່ນ: ໄມ້ມັນປາ, ໄມ້ແຄນ, ໄມ້ດູ່ ເປັນຕົ້ນ ນອກຈາກນັ້ນ, ເພິ່ນຍັ່ງ ຄວັດຮູບພາບ ຕາມປ້ານລົມ, ສີໜ້າປະຕູທີ່ສະແດງເຖິງ ປະຫວັດສາດ ຂອງສາດສະໜາ ແລະ ຄວາມອຸດົມຮັ່ງມີ ສະໄໝບູຮານ.

ປີ ຄສ 1920 ຂ້າຫຼວງໃຫຍ່ ຂອງຝຣັ່ງ ປະຈຳອິນດູຈີນ ໄດ້ຮັບທຶນ ຈາກເຄືອຈັກກະພົບ ແລະ ປະເທດທຶນນິຍົມ ເພື່ອມາປະຕິສັງຂອນ ວັດຖຸບູຮານ, ວັດວາສາດສະໜາ; ສຳລັບ ແຂວງສາລະວັນ ກໍ່ໄດ້ຮັບທຶນປະຕິສັງຂອນ ຫໍໄຕຣດັ່ງກ່າວ ແລະ ພະຄູຈັນທາ ໄດ້ມອບໃຫ້ຊຽງປ້ອມ ບ້ານດົງໜ້ອງ ຜູ້ມີສີມືເປັນຜູ້ສ້ອມແປງຕົບແຕ່ງລວດລາຍ ທີ່ຊຳລຸດຊຸດໂຊມ ໃຫ້ກັບຄືນມາຄືເກົ່າ.

ປີ ຄສ 1970 ຫໍໄຕປີດົກ ທີ່ເຫຼື້ອມສະຫງ່າ ຄຽງຄູ່ກັບຊາວພຸດ ທີ່ເຄົາລົບນົບໄຫວ້ ຕາມຮີດ 12 ຄອງ 14, ໄດ້ຖືກຝູງບິນ T28 ຂອງ ສ.ອາເມລິກາ ໄດ້ຍິງທຳລາຍຫໍໄຕດັ່ງກ່າວ ກາຍເປັນເຖົ່າຖ່ານ ເຫລືອໄວ້ພຽງແຕ່ ເສົາບາງຕົ້ນທີ່ຍັງຊີ້ຟ້າ, ປັດຈຸບັນ ການຈັດຕັ້ງຂັ້ນເທິງ ແລະ ມວນຊົນ ແຂວງສາລະວັນໄດ້ຮ່ວມແຮງຮ່ວມໃຈ ແລະ ພະລັງສັດທາ ສ້າງຫໍໄຕຫຼັງໃໝ່ ຕາມແບບສະບັບເດີມ
ຮູບ: JiPrang Diary, InsideLaos