ການຜະລິດກະສິກຳສົ່ງອອກຢູ່ແຂວງອຸດົມໄຊ ໄດ້ຮັບຜົນກະທົບ ຈາກການລະບາດພະຍາດໂຄວິດ-19 ເສຍຫາຍເກືອບ 1ຕື້ກີບ.

ການຜະລິດກະສິກຳສົ່ງອອກຢູ່ແຂວງອຸດົມໄຊ ໄດ້ຮັບຜົນກະທົບ ຈາກການລະບາດພະຍາດໂຄວິດ-19 ເສຍຫາຍເກືອບ 1ຕື້ກີບ.

August 20, 2020 0 By admin

ທ່ານ ຄຳພອນ ມູນລະໄມ ຫົວໜ້າພະແນກ ກະສິກຳ ແລະປ່າໄມ້ ແຂວງອຸດົມໄຊ ລາຍງານ ໃນໂອກາດເຂົ້າຮ່ວມກອງປະຊຸມສະໄໜສາມັນເທື່ອ ທີ9 ຂອງສະພາປະຊາຊົນ ແຂວງ ອຸດົມໄຊຊຸດທີ 1 ໃນວັນທີ 18 ສິງຫານີ້ ວ່າ: ໃນໄລຍະ 6 ເດືອນ ຜ່ານມາແຂວງອຸດົມໄຊ ກໍ່ເປັນ ແຂວງໜຶ່ງ ທີ່ໄດ້ຮັບຜົນກະທົບຫຼາຍດ້ານຈາກການລະບາດ ຂອງພະຍາດ ໂຄວິດ- 19 ໂດຍສະເພາະແມ່ນຂົງເຂດ ກະສິກຳ-ປ່າໄມ້ ລວມມູນຄ່າເສຍຫາຍເກືອບ 1ຕື້ກີບ.

ສິນຄ້າຫລັກທີ່ໄດ້ຮັບຜົນກະທົບລວມມີ ຫມາກໂມ,ຫມາກອຶ, ຫມາກຖົ່ວເບີ,ຫມາກກ້ວຍມັນດ້າງ ແລະ ອ້ອຍ. ເຊິ່ງຢູ່ໃນໄລຍະເກັບກ່ຽວ ແລະ ບັນຫາ ໃນການ ສົ່ງອອກໄປຕ່າງປະເທດ ໂດຍສະເພາະແມ່ນ ສປ ຈິນ. ບັນຫາດັ່ງກ່າວນອກຈາກມີຜົນກະທົບຕໍ່ບໍລິສັດຜູ້ລົງທຶນແລ້ວ ຍັງໄດ້ສົ່ງຜົນກະທົບຕໍ່ພໍ່ແມ່ປະຊາຊົນຜູ້ຜະລິດຕື່ມອີກ.


ທ່ານ ຄຳພອນ ມູນລະໄມ ໃຫ້ຮູ້ອີກວ່າ ນອກຈາກຜົນມີຜົນກະທົບຕໍ່ກັບການຜະລິດກະສິກຳແລ້ວ ຍັງສົ່ງຜົນຕໍ່ຄວາມຕ້ອງການ,ຕະຫລາດ ແລະ ລາຄາສິນຄ້າໃນທ້ອງຕະຫລາດມີການປ່ຽນແປງປະມານ 10-15%.


ເພື່ອສຸມໃສ່ແກ້ໄຂບັນຫາດັ່ງກ່າວ ທາງພະແນກກະສິກຳ ແລະ ປ່າໄມ້ແຂວງ ແມ່ນໄດ້ ນຳສະເໜີ ຫາພາກສ່ວນທີ່ກ້ຽວຂ້ອງ ໂດຍສະເພາະແມ່ນອົງການປົກຄອງແຂວງອຸດົມໄຊ ສ້າງຕັ້ງກອງທຶນແຮສຸກເສີນ ເພື່ອແກ້ໄຂເວລາວິກິດການໃຫ້ທັນເວລາ, ຊຸກຍູ້ໃຫ້ບັນດາບໍລິສັດຜູ້ສົ່ງເສີມການປູກຕ້ອງມີລະບົບເກັບຮັກສາຜົນຜະລິດໄວ້ໃຫ້ພຽງພໍແລະຍາວນານ ພ້ອມທັງມີລະບົບປະກັນໄພດ້ານຜົນຜະລິດກະສິກຳຢ່າງເໝາະສົມ.

ສຳລັບຊາວກະສິກອນທີ່ໄດ້ຮັບຜົນກະທົບລັດຖະບານຕ້ອງມີນະໂຍບາຍດ້ານຕ່າງໆເພື່ອເປັນການຕອບແທນຢ່າງເໝາະສົມເຊັ່ນ: ນະໂຍບາຍຍົກເວັ້ນການເກັບພາສີທີ່ດິນການຜະລິດກະສິກຳ, ຄ່ານ້ຳຊົນລະປະທານໃນໄລຍະໃດໜຶ່ງ, ຍົກເວັ້ນ ຫຼື ຕໍ່ເວລາການຊຳລະດອກເບ້ຍເງິນກູ້ ກໍລະນີທີ່ມີຊາວກະສິກອນກູ້ຢືມເງິນຈາກທະນາຄານ ແລະ ນະໂຍບາຍດ້ານອື່ນໆ. ພ້ອມນີ້ ຍັງມີແຜນຊຸກຍູ້ສົ່ງເສີມການຜະລິດກະສິກຳພາຍໃນໃຫ້ນັບມື້ເພີ່ມຂຶ້ນ ເພື່ອແນໃສ່ຕອບສະໜອງການຊົມໃຊ້ ພາຍໃນໃຫ້ພຽງພໍກັບຄວາມຕ້ອງການ.

ທີ່ມາ:ຂ່າວປະຈຳວັນ Daily News Oudomxay