ເປີດສວນອະນຸລັກຊີວະນາໆພັນທີ່ເປັນຢາພື້ນເມືອງ ຢູ່ເມືອງຄູນຄຳ ແຂວງຄຳມ່ວນ

ເປີດສວນອະນຸລັກຊີວະນາໆພັນທີ່ເປັນຢາພື້ນເມືອງ ຢູ່ເມືອງຄູນຄຳ ແຂວງຄຳມ່ວນ

August 19, 2020 0 By admin

Khammouane News, ໃນວັນທີ 14 ສິງຫາ 2020 ຢູ່ທີສະໂມສອນຫ້ອງວ່າການ ເມືອງຄູນຄໍາ ໄດ້ຈັດພິທີ ເປິດສວນອະນຸລັກຊີວະນາໆພັນທີ່ເປັນຢາພື້ນເມືອງ ໂດຍມີ ທ່ານ ອິນທະວົງ ແກ້ວອ່ອນໄຂ ຮອງເຈົ້າເມືອງໆຄູນຄໍາ, ທ່ານ ປອ ບຸນເລືອງ ດວງເດືອນ ຫົວໜ້າສະຖາບັນການແພດ ແລະ ຢາພື້ນເມືອງ ກະຊວງສາທາລະນະສູກ, ທ່ານ ດຣ ທອນລະຂັນ ໄຊປັນຍາ ຫົວໜ້າພະແນກສາທາລະນະສຸກ ແຂວງຄໍາມ່ວນ.

ມີບັນດາທ່ານໃນຂະແໜງການຢາຈາກກະຊວງສາທາລະນະສຸກ, ພະແນກສາທາລະນະສຸກ ແຂວງຄໍາມ່ວນ, ຕະຫຼອດຮອດວິຊາການຫ້ອງການສາທາລະນະສຸກ ເມືອງ, ຫ້ອງການກະສິກໍາ ແລະ ປ່າໄມ້ເມືອງ, ຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງເຂົ້າຮ່ວມ.


ໃນພິທີ ທ່ານ ອ່ອນວິໄລ ສຸລິຍາ ຮອງຫົວໜ້າສະຖາບັນການແພດ ແລະ ຢ່າພື້ນເມືອງ ກະຊວງສາທາລະນະສຸກໄດ້ໃຫ້ກຽດຂຶ້ນຜ່ານປະຫວັດຄວາມເປັນມາຂອງສວນອະນຸລັກພຶດຊີວະນາໆພັນທີ່ເປັນຢາພື້ນເມືອງ ເຊີ່ງວຽກງານການອະນຸລັກຊີວະນາໆພັນແມ່ນວຽກໜຶ່ງທີ່ມີຄວາມສໍາຄັນໃນການປະກອບສ່ວນປົກປັກຮັກສາປ່າໄມ້, ເຄື່ອງປ່າຂອງດົງ, ຊັບພະຍາກອນທໍາມະຊາດ ແລະ ຕົ້ນໄມ້ທີ່ເປັນຢາ ເພື່ອຮັກສາສິ່ງແວດລ້ອມ, ປ້ອງກັນດິນ, ແຫຼ່ງນໍ້າ, ພູມອາກາດ ທັງເປັນການອະນຸລັກພັນພືດ, ສັດ, ສິ່ງທີ່ມີຊີວິດໃຫ້ມີຄວາມອຸດົມສົມບູນ ແລະ ຍືນຍົງ.


ໃນປະຈຸບັນທົ່ວປະເທດມີສວນອະນຸລັກຊີວະນາໆພັນທີ່ເປັນຢາພື້ນເມືອງທັງໜົດ 26 ແຫ່ງ, ມີເນື້ອທີ່ປະມານ 5.000 ກວ່າເຮັກຕາ, ສວນຊີວະນາໆພັນທີ່ເປັນຢາພື້ນເມືອງເຂດນ້ຳສະນາມ, ເມືອງຄູນຄໍາ, ແຂວງຄໍາມ່ວນ ແຫ່ງນີ້ແມ່ນຢູ່ໃນອັນດັບທີ່ 26 ຂອງປະເທດ ແລະ ເປັນພື້ນທີ່ແຫ່ງທໍາອິດຂອງ ເມືອງຄູນຄໍາ ແຂວງຄໍາມ່ວນ ມີເນື້ອທີ່ປະມານ 300 ເຮັກຕາ, ຫຼັງຈາກນັ້ນຜູ້ທີ່ເຂົ້າຮ່ວມກອງປະຊຸມໄດ້ສຸມສະຕິປັນຍາໃນການປະກອບຄໍາຄິດຄໍາເຫັນ ເພື່ອເຮັດໃຫ້ສວນຊີວະນາໆພັນທີ່ເປັນຢາພື້ນເມືອງເຂດນ້ຳສະນາມໃຫ້ມີຄວາມອຸດົມສົມບູນ ແລະ ຍືນຍົງຕະຫຼອດໄປ.


ໃນຕອນທ້າຍຂອງພິທີທ່ານປະທານໄດ້ມີຄໍາເຫັນຊີ້ນໍາຕໍ່ກອງປະຊູມ, ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ອົງການສາທາລະນະສຸກນັບແຕ່ຂັ້ນສູນກາງຈົນຮອດທ້ອງຖິ່ນທີ່ໄດ້ເອົາໃຈໃສ່ຕໍ່ວຽກງານ ການປູກພືດສະໜຸນໄພ ທີ່ເປັນຢາພື້ນເມືອງ, ໃນນັ້ນທ່ານໄດ້ເນັ້ນບັນຫາການປົກປັກຮັກສາປ່າໄມ້, ເຄື່ອງປ່າຂອງດົງ, ຊັບພະຍາກອນທໍາມະຊາດທີ່ເປັນຢາ, ສິ່ງແວດລ້ອມ, ປ້ອງກັນດິນ, ແຫຼ່ງນໍ້າ, ພູມອາກາດອັນອຸດົມສົມບູນ ການປົກປັກຮັກສາປ່າໄມ້ໃຫ້ຍືນຍົງ ແລະ ການນຳໃຊ້ປ່າໄມ້ໃຫ້ເກິດປະໂຫຍດສູງສຸດ.