ສະພາປະຊາຊົນແຂວງ ອຸດົມໄຊ ຮັບຮອງເອົາ ທ່ານ ຄຳພັນ ເຜີຍຍະວົງ ເປັນເຈົ້າແຂວງ

ສະພາປະຊາຊົນແຂວງ ອຸດົມໄຊ ຮັບຮອງເອົາ ທ່ານ ຄຳພັນ ເຜີຍຍະວົງ ເປັນເຈົ້າແຂວງ

August 18, 2020 0 By admin

Media Laos, ໃນຕອນເຊົ້າ ຂອງວັນທີ 18 ສິງຫາ 2020 ກອງປະຊຸມສະໄໝສາມັນເທື່ອທີ 09 ຂອງ ສະພາປະຊາຊົນແຂວງ ອຸດົມໄຊ ຊຸດທີ I ໄດ້ຄົ້ນຄວ້າ, ພິຈາລະນາ, ຮັບຮອງເອົາການແຕ່ງຕັ້ງເຈົ້າແຂວງ, ຮອງເຈົ້າແຂວງ, ໂຄງປະກອບກົງຈັກ ແລະ ບຸກຄະລາກອນຂອງອົງການປົກຄອງແຂວງ ອຸດົມໄຊ ໂດຍອີງຕາມ ກົດໝາຍ ວ່າດ້ວຍສະພາປະຊາຊົນຂັ້ນແຂວງ ສະບັບປັບປຸງປີ 2020 ມາດຕາ 12 ຂໍ້ 3 ແລະ ມາດຕາ 60, ອີງຕາມ ການສະເໜີຂອງຄະນະປະຈຳສະພາປະຊາຊົນແຂວງ ອຸດົມໄຊ ແລະ ອີງຕາມການສະເໜີຂອງທ່ານເຈົ້າແຂວງ- ແຂວງ ອຸດົມໄຊ.

ຜ່ານການຄົ້ນຄວ້າ ແລະ ປະກອບຄໍາຄິດຄໍາເຫັນຢ່າງເລິກເຊິ່ງຂອງ ສະມາຊິກສະພາປະຊາຊົນແຂວງ ຕໍ່ບົດສະເໜີ ຂອງຄະນະປະຈຳສະພາປະຊາຊົນແຂວງ ການສະເໜີຂອງທ່ານເຈົ້າແຂວງ – ແຂວງອຸດົມໄຊ. ກອງປະຊຸມ ໄດ້ຕົກລົງ ເລືອກຕັ້ງເອົາທ່ານ ປອ ຄຳພັນ ເຜີຍຍະວົງ ເປັນເຈົ້າແຂວງ – ແຂວງ ອຸດົມໄຊ, ຮັບຮອງເອົາ ການແຕ່ງຕັ້ງ ທ່ານ ສົມຈິດ ປັນຍາສັກ ແລະ ທ່ານ ອ່ອນແກ້ວ ອຸ່ນອາລົມ ເປັນຮອງເຈົ້າແຂວງ, ຮັບຮອງເອົາກົງຈັກການຈັດຕັ້ງຂອງອົງການປົກຄອງແຂວງອຸດົມໄຊ ເຊິ່ງປະກອບມີ 16 ພະແນກ 02 ອົງການທຽບເທົ່າພະແນກ ແລະ 02 ກອງບັນຊາການຂັ້ນແຂວງ, ຮັບຮອງເອົາບັນດາທ່ານຫົວໜ້າພະແນກການ, ຫົວໜ້າອົງການທຽບເທົ່າພະແນກ ແລະ ສອງກອງບັນຊາການຂັ້ນແຂວງ ເຊິ່ງປະກອບມີຄື:

ທ່ານ ພັອ ຄຳຢິນ ແສງສຸລີ ເປັນຫົວໜ້າການເມືອງ ແລະ ທ່ານ ພັອ ຄຳເຜີຍ ໂສມພັນ ເປັນຫົວໜ້າການທະຫານ ກອງບັນຊາການທະຫານແຂວງ; ທ່ານ ພັອ ສີວອນ ໄຊຍະວົງ ເປັນຫົວໜ້າກອງບັນຊາການປ້ອງກັນຄວາມສະຫງົບແຂວງ; ທ່ານ ນາງ ຈັນສະໝອນ ທິບພະຫົງ ເປັນປະທານອົງການກວດກາລັດແຂວງ; ທ່ານ ສຸຫວັດ ມະຫາວົງສະນັ່ນ ເປັນຫົວໜ້າຫ້ອງວ່າການແຂວງ; ທ່ານ ພົມມາ ວັນນະກຳ ເປັນຫົວໜ້າພະແນກ ພາຍໃນແຂວງ; ທ່ານ ນາງ ອຳໄພວອນ ປັນຍາລັກ ເປັນຫົວໜ້າພະແນກ ການຕ່າງປະເທດແຂວງ; ທ່ານ ປອ ສຸລິຍາ ສຸພິທັກ ເປັນຫົວໜ້າພະແນກການເງິນແຂວງ; ທ່ານ ຄຳແສງ ອາລີ ເປັນຫົວໜ້າພະແນກ ໂຍທາທິການ ແລະ ຂົນສົ່ງແຂວງ; ທ່ານ ນາງ ຈັນທະລາ ໄຊບຸນເຮືອງ ເປັນຫົວໜ້າພະແນກ ແຜນການ ແລະ ການລົງທຶນແຂວງ; ທ່ານ ຄຳພອນ ມູນລະໄມ ເປັນຫົວໜ້າພະແນກ ກະສິກຳ ແລະ ປ່າໄມ້ແຂວງ;

ທ່ານ ສອນທະນູ ສິງດາລາ ເປັນຫົວໜ້າພະແນກ ອຸດສາຫະກຳ ແລະ ການຄ້າແຂວງ; ທ່ານ ນາງ ຄຳໝັ້ນ ແກ້ວບຸນຫວນ ເປັນຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ; ທ່ານ ອາລຸນ ບຸນວິໄລ ເປັນຫົວໜ້າພະແນກ ພະລັງງານ ແລະ ບໍ່ແຮ່ແຂວງ; ທ່ານ ສົມແພງ ໄພຍະວົງ ເປັນຫົວໜ້າພະແນກ ວິທະຍາສາດ ແລະ ເຕັກໂນໂລຊີແຂວງ; ທ່ານ ບຸນທັນ ສຸລິຍະວົງ ເປັນຫົວໜ້າພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ;

ທ່ານ ຫຸມພັນ ອິນທະມຸງຄຸນ ເປັນຫົວໜ້າພະແນກ ສາທາລະນະສຸກແຂວງ; ທ່ານ ສົມສັກ ສຸພິໄລ ເປັນຫົວໜ້າພະແນກ ສຶກສາທິການ ແລະ ກິລາແຂວງ; ທ່ານ ນາງ ໄຊສະຫວັນ ນັນທະໄຊ ເປັນຫົວໜ້າພະແນກ ແຮງງານ ແລະ ສະຫວັດດີການ ສັງຄົມແຂວງ; ທ່ານ ສອນສຸວັນ ປັນຍາວົງ ເປັນຫົວໜ້າພະແນກ ຍຸຕິທຳແຂວງ. ສຳລັບພະແນກ ໄປສະນີ, ໂທລະຄົມມະນາຄົມ ແລະ ການສື່ສານແຂວງ ແມ່ນຈະໄດ້ປັບປຸງໃນຕໍ່ໄປ.