ຫຼວງພະບາງ ທຸ້ມງົບ 1 ຕື້ກວ່າກີບ ປັບປຸງ 2 ແຫຼ່ງທ່ອງທ່ຽວຫຼັກ

August 17, 2020 0 By admin

ແຂວງຫຼວງພະບາງ ໃຊ້ງົບປະມານ 1 ຕື້ກວ່າກີບ ປັບປຸງແຫຼ່ງທ່ອງທ່ຽວນໍ້າຕົກຕາດກວາງຊີ ແລະ ພູສີ ເພື່ອແນໃສ່ໃນການອານຸລັກແບບຍືນຍົງ ແລະ ການອໍານວຍຄວາມສະດວກໄວ້ຮອງຮັບແກ່ນັກທ່ອງທ່ຽວ ເຊິ່ງລວມມີທັງໝົດ 8 ກິດຈະກໍາ ໂດຍແມ່ນບໍລິສັດສີສະນະກໍ່ສ້າງເປັນຜູ້ຮັບເໝົາກໍ່ສ້າງໄລຍະການກໍ່ສ້າງ 1 ປີ ໄດ້ເລີ່ມລົງມືກໍ່ສ້າງແຕ່ວັນທີ 8 ສິງຫາ 2020 ຫາ ວັນທີ 8 ສິງຫາ 2021 ຈະໃຫ້ສໍາເລັດ.

ທ່ານ ປອ ນາງ ສຸດາພອນ ຄົມທະວົງ ຫົວໜ້າພະແນກ ຖວທ ແຂວງຫຼວງພະບາງໃຫ້ສໍາພາດຕໍ່ທິມຂ່າວພວກເຮົາວ່າ: ສໍາລັບການປັບປຸງແຫຼ່ງທ່ອງທ່ຽວຄັ້ງນີ້ ໂດຍໄດ້ຮັບງົບປະມານຈາກແຂວງ ເພື່ອພັດທະນາສິ່ງອຳນວຍຄວາມສະດວກຢູ່ພາຍໃນອຸທິຍານນ້ຳຕົກຕາດກວາງຊີ ແລະ ທາດພູສີ ລວມມີ 8 ກິດຈະກໍາເຊັ່ນ: ປັບປຸງພູມິທັດບໍລິເວນດອນກ້ອງຂົວ, ປັບປຸງບໍລິເວນອ່າງອາບນ້ຳທີ 3, ກໍ່ສ້າງຮົ້ວກັນຄົນບຸກລຸກ, ປັບປຸງບໍລິເວນພື້ນທາງຍ່າງອ້ອມທາດພູສີ, ເຄື່ອງກວດບັດເຂົ້າຊົມລະບົບາບໂຄດ,ສ້າງທາງຄົນພິການ ປັບປຸງເນື້ອທີ່ເດີ່ນພາຍໃນຕາດກວາງຊີໃຫ້ກວ້າງຂວາງ, ແລະ ມີຄວາມສວຍງາມກວ່າເກົ່າ ແລະ ປັບປຸງທາງຂຶ້ນຕາດ ລວມມູນຄ່າທັງໝົດ 1.700 ລ້ານກວ່າກີບ ໂດຍແມ່ນບໍລິສັດ ສີສະນະ ກໍ່ສ້າງ ເປັນຜູ້ຮັບເໝົາກໍ່ສ້າງ ແລະ ປັບປຸງ ໄລຍະການກໍ່ສ້າງ 1 ປີ ໂດຍໄດ້ເລີ່ມລົງມືການກໍ່ສ້າງຕັ້ງແຕ່ວັນທີ 8 ສິງຫາ 2020 ຫາ ວັນທີ 8 ສິງຫາ 2021 ຈະໃຫ້ສໍາເລັດ 100%.

ທ່ານ ນາງ ສຸດາພອນ ຄົມທະວົງ ໃຫ້ຕື່ມອີກວ່າ: ໃນປີທີ່ຜ່ານມາພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ຍັງໄດ້ຮັບທືນຊ່ວຍເຫຼືອຈາກໂຄງການພັດທະນາພື້ນຖານໂຄງລ່າງ ເພື່ອການທ່ອງທ່ຽວເຊັ່ນ: ປັບປຸງຫ້ອງນ້ຳສະອາດໃຫ້ໄດ້ມາດຕະຖານອາຊຽນ ແລະ ປະກອບສິ່ງອໍານວຍຄວາມສະດວກຕ່າງໆ ເຂົ້າໃນການພັດທະນາວຽກງານທ່ອງທ່ຽວຂອງແຂວງຕື່ມອີກ.

ຂ່າວ: ສີສຸວັນ