ເບັນເຊມ້າ ຊັດສອງປະຕູ! ມາດຣິດ ຄວ້າໄຊເໝືອ ບາເລັນເຊຍ ຕາມຫລັງ ບາຣຊ້າ 2 ຄະແນນ!!

ເບັນເຊມ້າ ຊັດສອງປະຕູ! ມາດຣິດ ຄວ້າໄຊເໝືອ ບາເລັນເຊຍ ຕາມຫລັງ ບາຣຊ້າ 2 ຄະແນນ!!

June 19, 2020 0 By admin

ການແຂ່ງຂັນເຕະບານ ລາລີກ້າ ແອັສປາຍ ລະດູການ 2019-20 ນັດທີ 29 ຄືນຜ່ານມາ, ຣຽວ ມາດຣິດ ແຊ້ມສູງສຸດ 33 ສະໄໝ ພົບກັບ ບາເລັນເຊຍ ທີ່ສະໝາມຊ້ອມຂອງມາດຣິດ ເອັສຕາດີໂອ ອາວເຟຣໂດ ດີ ສະເຕຟາໂນ້ ເນື່ອງຈາກສະໝາມ ຊານເຕຍໂກ້ ເບີນາບີວ ກຳລັງສ້ອມແປງ.

ນັດນີ້ ມາດຣິດ ຜົນງານດີຕໍ່ເນື່ອງ ທັງການຄອບຄອງບານ ແລະ ສ້າງສັນໂອກາດຍິງໄດ້ຫລາຍກວ່າທີມຢາມ ໂດຍສະເພາະໃນເຄິ່ງຫລັງ ແກ້ເກມມາດີໄດ້ 3 ປະຕູຈາກ ຄາຣິມ ເບັນເຊມ້າ ສອງປະຕູນາທີ 61′, 74′ ແລະ ມາຣໂກ ອາເຊັນຊີໂອ້ ໜຶ່ງປະຕູນາທີ 74′ ຈົບເກມ ມາດຣິດ ຊະນະ ບາເລັນເຊຍ 3-0 ເກັບເພີ່ມເປັນ 62 ຄະແນນຈາກ 29 ນັດ, ຕາມຫລັງ ບາຣຊ້າ ທີມນຳ 2 ຄະແນນເໝືອນເດີມ ເຫລືອອີກ 9 ນັດ.

ສອງປະຕູຂອງ ເບັນເຊມ້າ ໃນນັດນີ້ ກາຍເປັນປະຕູທີ 243 ລວມທຸກລາຍການກັບ ຣຽວ ມາດຣິດ ສູງສຸດເປັນອັນດັບ 5 ແຊງສະຖິຕິຂອງ ເຟຣ໋ອງ ປຸສກັສ ຕຳນານກອງໜ້າຊາວຮົງກາຣີ ທີ່ຍິງໄດ້ 242 ປະຕູ, ສ່ວນຜູ້ຍິງປະຕູສູງສຸດໃຫ້ສະໂມສອນ ຣຽວ ມາດຣິດ ແມ່ນ ຄຣິສເຕຍໂນ້ ໂຣນາວໂດ້ 450 ປະຕູ, ອັນດັບ 2 ຣາອູ ກອນຊາເລຊ 323 ປະຕູ, ອັນດັບ 3 ອາວເຟຣໂດ ດີ ສະເຕຟາໂນ້ 308 ປະຕູ ແລະ ອັນດັບ 4 ຊານຕິວລານ້າ 290 ປະຕູ.

ສ່ວນຜົນອີກໜຶ່ງຄູ່ວານນີ້ ເດປໍຣຕິໂວ້ ອາລາເບັສ ຊະນະ ຣຽວ ໂຊຊີແດັດ 2-0, ຄືນນີ້ມີແຂ່ງຂັນ ຄູ່: ກຣານາດ້າ ພົບ ບີຢາຣິວ ເວລາ 00:30 ແຂ່ງພ້ອມກັບ ມາຢໍລກ້າ ພົບ ເລກາເນັສ ແລະ ເຊບີຢ້າ ພົບ ບາຣຊ້າ ເວລາ 03:00.

Photo: LaLiga, Real Madrid C.F.