ກະຊວງສຶກສາອອກແຈ້ງການ! ຊີ້ນໍາປະຕິບັດມາດຕະການຕໍ່ນັກສຶກສາລາວຢູ່ຫວຽດນາມ ທີ່ລັກໜີກັບປະເທດ

ກະຊວງສຶກສາອອກແຈ້ງການ! ຊີ້ນໍາປະຕິບັດມາດຕະການຕໍ່ນັກສຶກສາລາວຢູ່ຫວຽດນາມ ທີ່ລັກໜີກັບປະເທດ

August 15, 2020 0 By admin

ກະຊວງສຶກສາທິການ ແລະ ກີລາ ອອກແຈ້ງການ ສະບັບເລກທີ 2544/ຫກ ລົງວັນທີ 14 ສິງຫາ 2020 ເຖິງຫົວຫນ້າພະແນກສຶກສາທິການ ແລະ ກິລາ 3ແຂວງທີ່ກ່ຽວຂ້ອງ ຄື ແຂວງຄໍາມ່ວນ, ສະຫວັນນະເຂດ ແລະ ສາລະວັນ ກ່ຽວກັບ ສະພາບນັກສຶກສາລາວ ຈໍານວນ 54 ຄົນ ຮຽນຢູ່ ສສ ຫວຽດນາມ ຫນີອອກຈາກຫໍພັກກັບມາ ສປປ ລາວ.

ເປັນພຽງພາບປະກອບ

ໂດຍອີງຕາມ ຄໍາແນະນໍາ ຂອງກະຊວງການຕ່າງປະເທດ, ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດອັກເສບປອດສາຍພັນໃຫມ່ ໂຄວິດ-19 ກ່ຽວກັບຂັ້ນຕອນລະອຽດໃນການປະກອບ ເອກະສານຂໍອະນຸຍາດ ເຂົ້າ-ອອກ ສປປ ລາວ ສະບັບເລກທີ 1861/ຕປທ.ສພກ.

ເປັນພຽງພາບປະກອບ

ຫ້ອງການກະຊວງສຶກສາທິການ ແລະ ກິລາຂໍຖືເປັນກຽດແຈ້ງມາຍັງທ່ານຊາບວ່າ: ສະພາບການລະບາດຂອງ ພະຍາດອັກເສບປອດຈາກເຊື້ອຈຸລະໂລກສາຍພັນໃຫມ່ ໂຄວິດ-19 ຂອງປະເທດໃກ້ຄຽງ ແລະ ໃນໂລກ ຍັງເພີ່ມຂຶ້ນ, ລັດຖະບານຍັງສືບຕໍ່ປີດດ່ານຊາຍແດນທາງບົກ ແລະ ທາງອາກາດ ໃນຂອບເຂດທົ່ວປະເທດເພື່ອປ້ອງກັນ ແລະ ສະກັດກັ້ນການລະບາດຂອງພະຍາດໂຄວິດ-19 ຢູ່ ສປປລາວ.

ເຊິ່ງເປັນຜົນກະທົບຕໍ່ການເດີນທາງເຂົ້າ-ອອກ ຂອງນັກສຶກສາລາວທີ່ຮຽນຢູ່ຕ່າງປະເທດ ຫຼື ນັກສຶກສາຕ່າງປະເທດທີ່ຮຽນຢູ່ ສປປ ລາວ, ແຕ່ມາຮອດ ວັນທີ່ 31 ກໍລະກົດ 2020 ໄດ້ມີການລາຍງານຈາກ ສະຖານກົງສູນໃຫຍ່ ສປປ ລາວ ປະຈໍານະຄອນດານັງ ສສ ຫວຽດນາມ ວ່າ ໃນວັນທີ 24 ກໍລະກົດ 2020 ມີນັກສຶກສາລາວ ຈາກວິທະຍາໄລການແພດກວາງຈິ ໄດ້ລັກຫນີອອກຈາກຫໍພັກກັບມາລາວ ໂດຍບໍ່ໄດ້ອະນຸຍາດຈໍານວນ 54 ຄົນ.

ເປັນພຽງພາບປະກອບ

ເພື່ອປະຕິບັດຕາມບົດບັນທຶກກອງປະຊຸມຮ່ວມລະຫວ່າງ ທ່ານນາຍົກລັດຖະມົນຕີ ກັບຄະນະສະເພາະກິດ ເພື່ອປ້ອງກັນ ແລະ ຄວບຄຸມການແຜ່ລະບາດຂອງພະຍາດ ໂຄວິດ-19, ຫ້ອງການກະຊວງຈຶ່ງສະເຫນີໃຫ້ພະແນກ ສຶກສາທິການ ແລະ ກິລາ ແຂວງຄໍາມ່ວນ, ສະຫວັນນະເຂດ ແລະ ສາລະວັນ ປະຕິບັດດັ່ງນີ້:

1 ໃຫ້ຕິດຕາມນັກສຶກສາລາວທີ່ຫນີອອກຈາກຫໍພັກກັບມາ ສປປ ລາວ ໂດຍບໍ່ໄດ້ຮັບອະນຸຍາດທີ່ຢູ່ໃນຂອບເຂດຄວາມຮັບຜິດຊອບຂອງແຂວງຕົນ ໃຫ້ເຂົາເຈົ້າໄດ້ຮັບການຈໍາກັດບໍລິເວນ 14 ວັນ ຕາມລະບຽບການຂອງຄະນະສະເພາະກິດ ສປປ ລາວ ວາງອອກ;

 

2 ພາຍຫຼັງຄົບກໍານົດຈໍາກັດບໍລິເວນ 14 ວັນແລ້ວ, ຖ້າພວກກ່ຽວບໍ່ມີອາການເປັນໂຄວິດ-19 ໃຫ້ຮຽກໂຮມພວກກ່ຽວພ້ອມດ້ວຍຜູ້ປົກຄອງ ເພື່ອມາສຶກສາອົບຮົມແນວຄິດ ໂດຍຊີ້ໃຫ້ເຫັນຄວາມຜິດຂອງພວກກ່ຽວ ທີ່ລະເມີດລະບຽບກົດຫມາຍ ຂອງສອງປະເທດ ພ້ອມໃຫ້ຮັບຮູ້ ແລະ ເຂົ້າໃຈຕໍ່ຄວາມອັນຕະລາຍຂອງ ພະຍາດ ໂຄວິດ-19 ຖ້າຫາກກັບມາລະບາດຮອບສອງຄືນ. ຖ້າພວກກ່ຽວ ຫາກບໍ່ມາລາຍງານຕົວ ແລະ ບໍ່ໄດ້ຮັບການສຶກສາອົບຮົມ ແມ່ນບໍ່ອະນຸຍາດໃຫ້ກັບໄປຮຽນຄືນຢ່າງເດັດຂາດ; ກໍລະນີ ທີ່ມີຄວາມຈົງໃຈບໍ່ ມາລາຍງານຕົວແຕ່ກັບໄປຮຽນຄືນ ກະຊວງສຶກສາທິການ ແລະ ກິລາ ກໍ່ຄືກົມກິດຈະການນັກສຶກສາ ຈະບໍ່ອອກໃບຢັ້ງຢືນການສໍາເລັດການສຶກສາໃຫ້ພວກກ່ຽວ.

3 ໃຫ້ລາຍງານຜົນການປະຕິບັດແຈ້ງການສະບັບນີ້ມາຍັງຫ້ອງການກະຊວງສຶກສາທິການ ແລະກິລາ ໃນເວລາອັນຄວນ.